× ![]()
كورتە چیرۆك
ئەحمەد جاسم
ئەم چیرۆكە لە پێشبڕكێی بیست و یەكەمین فێستیڤاڵی گەلاوێژ بەشدار بووە.
رەڤین
حەمیدی ئەو پێچوولكا بچووك و دێمێ وێ وەك بەفرێ، دانا بەر پێن خوە. هەر دوو دەستێن خوە، ب چوكێن خوە ڤەنان و بناڤ چاڤێن گرێ، تەماشای پشت خوە كر و پاشان زڤری و ئاڤریەك ل دەر دووڕان دا. چپكێن بارانێ ڕاناوەستن، نە ب تەنێ عەردی پشت ل وان كربوو، بەلكۆ ئاسمانی ژی دڤیا یا خوە ب سەر دا بكەت. ل ئالیێ چەپێ، رۆندك ژ چاڤێن هەڤژینا وی یا بێ چارە، هشك نابن. ل ئالیێ ڕاستێ، كۆخ كۆخا بابێ وی یە، هندەك جار وەسا بێ سەرو بەر دبیت، دێ بێژی رح د سەردا چوو! دایكا ب ناڤ سالڤە چوویی، پشتیەكێ بار ژخوە مەزنتر، یێ ل پشتا خوە كری، هەر وەك شێرەك ل سەر برینا خوە بڕێڤە دچیت و دڤێت چ ل خوە دیار نەكەت. لێ هەیهات، هەر ناڤبەرەكێ، چاڤێن وێ تەر دبن و ڕوندكێن داخ روویێن وێ یێن قورمچی، د سوژن. زڤڕی سەحكەتە بەرپێن خوە، ئەو پێچوولكا بچووك یا دگریت. بێهنا وی چك بوو و ڕوندك بێ حەمدی وێ ژ چاڤێن وێ هاتنە خار. بەرێ دەستێن لەرزوك بۆ ئەسمانی بلند كرن "ما تە چ ژ مە دڤێت؟ ما مولك و عەرشێ تە بەسی تە نینە، خوە پێڤە پێڤە مژوول بكەی! تو بۆ ڤێ د ئینیە سەرێ مە، بۆ چ هێزا خوە ل بەلەنگازا دیار دكەی؟"
ئەستەغفیروللاهـ، كۆڕێ من خو كوفری نەكە، ئەڤە قەدەرا خۆدێ یە! بابێ وی گۆت.
دایكا دل شكەستی لێ ڤەگێڕا
ـ لێ نەگرە حەجی، نێ هەكە، هندەك شیری بۆ جەگەرا خوە پەیدا نەكەت، دێ ل پێش چاڤێن وی مریت. ما بیرا تە ناهێت، هەكو ئەو یێ بچیك و زەرك هاتیێ، هینگێ حەویان بتە نەدكەت و ڕەنگێ تە ژی ژ خەم هەلگرتنا وی، زەر و پێتی ببوو.
بەردەوامی دا ڕێكێ و چەند دەم دەرباز دبوو، پتر دێمێ حەمیدی تێكدچوو. هزرێن بەرێ ئەو كویر بر و ئەڤ گوتنە ژ دەڤێ وی دەركەفتن: "هەكەر كچ بوو، ناڤێ وێ بكەینە چ..!؟".
بهێلە هەتا ئەو ڕوژە بهێت، كۆر بیت یان كچ بیت، دێ ناڤەكی لێ دانین، كو بیرا مە ل وان ڕۆژا بینیت، ئەز قوربان.
دێ هەرە نازێ، ئەڤە ئەز دێ بمە باب و تو دێ بیە دەیك، مامە چ دی ژ خودێ دڤێت.
گرییا رەڤینا ساڤا ل بەر سینگێ وی جرفەك ئینایێ و ژ دالغێن خوە ڤەگەڕاند، لێ هەر بەردەوامی دا رێكێ و جار جار سەحدكرە وی رووبارێ ل رەخێ خوە، كانێ چەوا هەر تشتی دگەل خوە دبەت، ژ خوە د پرسی "ما دادییە هەر تشت بچیت!!؟" .
د بەردەوامییا ڕێكێ دا، سەحدكرە بەراهیكا خوە و ژبلی دیمەنێن گری و شینیێ، چ دی نەدهاتە بەرچاڤان. دایكەك یا دگریت، هەر وەكو زارۆیێ وێ ژ برسان دا، رح دسەر دا چوو. ل وێڤەتر، كیفینێن زەلامەكینە و جەگەرا وی یا ل سەر دەستێن وی و وێڤەتر، سێ چار زەلامەك مژوولی كولانا گورەكینە بوو. پیرەمێرەكێ بێ تاقەت، داخوازێ ژ خێزانا خوە دكەت، وی بهێلن و چ دی پێن وی نەشێن، كەلەخێ وی د دویف وانرا بخشینیت. هەر تشتەك بەرەڤ چوونە و ڤێ چوونێ ژی چ وەغەرێن دروست ل پێشیێ نینن، بەلكۆ چوونەكا سار، وەكی وی باكوزیركێ ب ناڤ چاڤێن وی دكەڤیت.
ئەو ژی یێ هزرا خوە دكەت، پشتی شیرێ (ڕەڤینێ) نەمای. ما خوەنە ئەڤ دیمەنە، دێ دگەل وی ژی خوە دووبارە كەن. د ڤان هزر و تەخمینان دا، گرییا ڕەڤینێ جرڤەك ڤێ ئێخست. سەحكرە ناڤ چاڤێن وێ و ژبلی دێمەكێ زەر و پێتی، چاڤێن وێ ئێدی نا برسقن، بتنێ دەڤێ وێ یێ گازندا ژ ڕزقێ خوە دكەت..! زڤڕی سەحكرە دەیك و باب و هەڤژینا خوە.
دێ چ كەی حەمید؟ نازێ هوسا بدلەكێ داخ، ئەڤ پرسە ژێكر.
بێی كو بەرسڤ بدەت، پێچولك باش نخافت و دانا سەر وێ كەلەكا بەرا یا د كەڤیتە، دناڤبەرا وان و رووباری دا. هەڤژینا وی ما گۆهشی، د دانێن وێ قرقچین و بلەز بەرەڤ وی چوو و كچا خوە هەمبێزكر.
ـ ئەز ناهێلم تو پرتا مێلاكا من بهێلیە ل ڤێرە و بچی، تە دڤێت تۆ هەرە، ئەز دێ مینمە ل دەڤ نازدارا خوە..!
هێش نازێ ئاخفتنا خوە بدووماهی نە ئینای، حەمیدی شەقەكا غەزەبی، ل ڕوویێ وێدا. بابێ حەمیدی، گۆپالێ خوە ب هێز ل عەردی دا و بلەز چو دەڤ وان و ب دلەكێ شكەستی گۆتە نازێ: "كچا من، ئەڤە دێ هوسا دناڤ دەستێن مە دا مریت، بلا ل ڤێرە بیت، بەلكۆ هندەك دڤێ رێكێ دا دەرباز ببن و پیچەكا شیری ڤێ هەبیت و دگەل خوە ببەن، نێ گۆنەهە".
نازێ گوهدارییا وان نەكر، ب لێڤێن شین كچا ب سینگێ خوەڤە كرە نوژ و بەردەوامی دا ڕێكێ...
ـ ئێ و پاشی چ لێ هات؟
بلا هەتا ڤێرە بەس بیت، ڕابە دەستێن خوە بشوو، دێ نۆكە بابێ تەهێت و فراڤینێ دانم.
زناری نە ڕازیبونا خوە ب ئەنیەكا گرێ دیاركر، دایكا وی نەڤیا بڤی شێوەی وی بهێلیت. كۆرێ من خو گۆهدار بكە تمامەتییا چیرۆكێ ب شەڤێ بەری بنڤی، دێ بۆتە بێژم.
دگەل چوونا وی، ڕەڤین ب چاڤێن تژی بەزی وێنێ دایكا خوە، ئەوێ دانایە تەنشت تەلەڤزیونێ. دگەل خوە بر و بەرەڤ پەنجەرێ چوو. ژ دەرڤە بارانەكا هوورك یا دباریت و هەلمێ نیڤا پەنجەرێ یا دا گرتی، ب تلا بەرانێ ل سەر شیشا پەنجەرێ نڤێسا (ئەگەر دایك نەبیت، ژیان نابیت).
ئەم بابەتە 105 جار خوێندراوەتەوە
