دڵدارەکەم داعشە لە چاپخانەیە

وابڕیارە بەمزوانە رۆمانى (دڵدارەکەم داعشە) لە نوسینى رۆماننوسی میسری هاجەر عەبدولسەمەد و وەرگێڕانى نووسەر حەسەن یاسین کە لە عەرەبییەوە وەریگێڕاوەتە سەر زمانى کوردى و ئێستاکە لە چاپخانە هەموو کارەکانى تەواو بووە و لە دوو هەفتەی ئایندەدا بڵاودەکرێتەوە.

لە بارەى رۆمانەکە نووسەر و وەرگێڕ (حەسەن یاسین) بە سایتى گەلاوێژى راگەیاند: دڵدارەکەم داعشە کە یەکەمین بەرهەمی خاتوون هاجەر عەبدولسەمەدە، رۆمانێکە باس لە کێشە کۆمەڵایەتییەکانی کۆمەڵی میسر، ستەمی کۆمەڵایەتی، کاریگەریی گروپە توندڕەوەکان و رۆڵی خراپیان لە برەوپێدانی توندوتیژی و قۆزتنەوەی کەسانی خاوەن کێشەی کۆمەڵایەتی و ناردیان بۆ نێو دۆزەخی داعش دەکا.

هەروەک ئاماژەى بۆ ئەوەش کرد، کۆمەڵکوژیی ژنانی ئێزدی لەڕێگەی کوشتنی ژنێکی ئێزدی لەدوای داگیرکردنی شەنگال، لەنێو رۆمانەکەدا حزوری هەیە و هەوڵمداوە ئەم وەرگێڕانە ئەوەی پێوەدیارنەبێ کە ئەم بەرهەمە لەبنەڕەتدا بەزمانێکیتر نووسراوە!

 

حه‌سه‌ن یاسین لە چەند دێرێکدا:

- ناوى تەواوى: حه‌سه‌ن یاسین عه‌بدولڕه‌حمان.

- نوسەر و وەرگێڕ

- ساڵى 1965 لە شارى هەولێر لە دایکبووە.

- لە ساڵى 1992 بڕوانامەى به‌کالۆریۆسى له‌ کۆمه‌ڵناسی لە کۆلێژی ئادابى زانکۆی سه‌لاحه‌ددین بەدەستهێناوە.

- لە ساڵى 2007 بڕوانامەى دووەمى به‌کالۆریۆسى له‌زانسته‌ سیاسییه‌کان، لە به‌شی یاسا و سیاسه‌تى فاکه‌ڵتی زانسته‌ مرۆڤایه‌تییه‌کانى زانکۆی سلێمانی بەدەستهێناوە.

- لە ساڵى 2019 بڕوانامەى ماسته‌رى له‌ به‌شی کۆمه‌ڵناسی، کۆلێجی ئادابى زانکۆی عه‌ین شه‌مس لە قاهیره بەدەستهێناوە.

- لە مانگى 4ى 1981 تێکه‌ڵ به‌کاری سیاسیی نهێنی بووه‌ له‌نێو چوارچێوه‌ی رێکخراوی کۆمه‌ڵه‌ی ره‌نجده‌رانی کوردستان (یه‌کێتیی نیشتمانیی کوردستان).

- له‌ رۆژى 17/4/1987 له‌سه‌ر کاری سیاسی له‌لایه‌ن ده‌زگای ئه‌منی هه‌ولێره‌وه‌ بۆ ماوه‌ی ٦ مانگ گیراوه.

- چەندین جار گیراوەو ئازار و ئەشکەنجە دراوە.

- له ‌ساڵی 1989 له‌هه‌ولێر به‌نهێنی رۆژنامه‌ی (ئاسۆی کرێکار)ی ده‌رکردووه.‌

- له‌ ساڵى 1995 تاکو ساڵى 2001 ئەندامی مەکتەبی راگەیاندن و ئەندامی ده‌سته‌ی نووسه‌رانی رۆژنامه‌ی (ئاڵای ئازادی) و پاشان بەڕێوەبەری رادیۆی مەرکەزی و رادیۆی سلێمانی بووه‌.

- له ساڵی 1998 له‌سلێمانی یه‌که‌مین رۆژنا‌مەی ئه‌هلیی ده‌رکردووه‌ به‌ناوی (رۆژنامه‌نووس) و سه‌رنووسه‌ری رۆژنامه‌که‌ بووه‌ و رۆڵیان له‌ ره‌خنه‌گرتن له‌ حزبه‌ ئیسلامییه‌ سیاسییه‌کانی هه‌رێمی کوردستان هه‌بووه.

- له‌رادیۆ و ته‌له‌فزیۆندا کاری نووسه‌ری ‌و هه‌واڵسازی ‌و به‌ڕێوه‌به‌ریی کردووه.

- له‌ گۆڤاره‌کانی (بیروهۆشیاری) و (نۆڤین)  وه‌ک نووسه‌ر و به‌ڕێوه‌به‌ری نووسین و سه‌رنووسه‌ر کاری کردووه‌و لێکۆڵینه‌وه‌ی له‌و گۆڤارانه‌ بڵاوکردۆته‌وه‌.

- له‌ رۆژنامه‌ی (هه‌واڵ) به‌ڕێوه‌به‌ری نووسین بووه‌.

- لە چەندین رۆژنامە و گۆڤار وتارى بڵاوکردۆتەوە و گۆشەى تایبەتى هەبووە لەباره‌ی کاروباری رێکخراوه‌ ئیسلامییه‌ توندڕه‌وکانه.

- له ساڵى ‌2006 لێکۆڵینه‌وه‌یه‌کی به‌ناوی (مێژووی پێوه‌ندییه‌ نهێنییه‌کانی نێوان ئه‌نسارولئیسلام و رێکخراوی قاعیده‌) بڵاوکردۆته‌وه ‌و ساڵی ٢٠٠٦ وه‌ک کتێبیش چاپ و بڵاویکردۆته‌وه‌.

- جێگری سه‌رنووسه‌ری گۆڤاری که‌لتوور بووه‌.

- ئه‌ندامی ئه‌نجومه‌نی (سه‌نته‌ری لێکۆڵینه‌وه‌ی ستراتیجیی کوردستان)ه‌.

- لە ساڵى 2006 تاکو ساڵى 2008 سه‌رنووسه‌ری گۆڤاری (دۆسێی ئیسلام) بووه‌، که‌ گۆڤارێکی لێکۆڵینه‌وه‌یی بووه‌و بایه‌خی به‌ ئیسلام، ئیسلامی سیاسی و سۆسیۆلۆجیی ئایین داوه.

- لە ساڵی 2005 کتێبی (36 وانە لەبارەی رۆژنامەنووسی و  رۆژنامەنووسیی کوردییەوە)ی لەلایەن دەزگای چاپ و بڵاوکردنەوەی بەدرخانەوە چاپ و بڵاوکردۆتەوە.

- ساڵى 2019 بەهاوبەشی لەگەڵ عوسمان حەمەڕەشید گورونەوە کتێبی (بەکر سدقی، گیانی نەتەوەیی و رەوتی رووداوەکان)ی عەزیز یاوەریان لە عەرەبییەوە وەرگێڕاوە.

- ساڵى 2019 رۆمانی (دڵدارەکەم داعشە)ی خاتونی میسری هاجەر عەبدولسەمەدی لەعەرەبییەوە وەرگێراوەتە سەر زمانى کوردى.

 


ئەم بابەتە 69 جار خوێندراوەتەوە
بابەتی لەیەکچوو