MalaBaxtyar_Asoswara.jpg

ئاسۆ... شاری خەمباران کرد!

ئەمساڵ، شارى سلێمانى، خۆشتر لەساڵانى قەیران و پاشکەوتى موچە، خۆى ئامادەکردووە بۆ پێشوازى ساڵى نوێ، بێ ئاگا لەوەى، بەهەرمەندێکى شارەکە، دڵى لە لێدان دەکەوێت و سەراپا سلێمانى غەمگین دەبن.

سەرى ساڵ، بابا نوئێل دەردەکەوێ و نوقڵ و نەبات دەبەخشێتە مناڵان، ئاسۆى عومەر سوارە، بەسیما گەشەکەى و بەرنامە گەشاوەکانى و ژیاندنەوەى یادگارەکانى شار، بەردەوام بابا نوئێل ئاسا لە تەلەفزیۆن دەردەکەوێت و لە شانۆگەرى و فیلمەکاندا نوقڵ و نەباتى هونەرى دەبەخشێتە کوردەوارى.

ئاسۆ، رەچەڵەکى پێنجوێنیە و بنەماڵەکەى (1946) دواى بومەلەرزەکەى زێدەکەى، هاتونەتە سلێمانى و چاوى لە رۆژگارە نەگریسەکەى زەمانى (زەعیم سدیق) هەڵهێناوە، هێشتا لە پۆلى سێى سەرەتایى دا دەبێ، بەهرەمەندى خونجە دەکات و بەشدارى چالاکى خوێندنگاکەى دەبێ، کە تەمەنى بۆ هەرزەکارى هەڵدەکشێ، ئیدى لەخۆى رادەبینێ بچێتە تیپى هونەرى لاوانى سلێمانى، هەمان ساڵ کە هێشتا نەونەمامى (15) ساڵیە، خونچەى هونەرى دەپشکوێ و بە شانۆگەریى (دڵدارانى باران) لە فێستیڤاڵى (1979) هەولێردا، بەشدارى دەکات. پێچەوانەى بەهرەى هونەرى، بەشى کارگێڕى تەکنیکى لە بەغداد تەواو دەکات، بەڵام هەمیشە خولیاى هونەر بووە... ئەویش هونەرى دەربەستى ئازادى، چونکە بە هەموو هەستەکانى، ئاڵا هەڵگرى کوردایەتى و دوا رۆژى سەرکەوتنى کوردستانەکەى بووە. لەسەر ئەم هەڵوێستەى و هەڵبژاردنى دەقە پەیامامدارەکانیشی چەندینجار گیراوە و لێپێچینەوەى لەگەڵدا کراوە، بەڵام کۆڵى نەداوە.

بەهرە جۆراو جۆرەکانى لە هونەرى نواندن و نوسین و کارگێڕى، گەیاندیانە بەڕێوەبەرى کارگێڕى بنکەى روناکبیریى گەلاوێژ و لە ساڵى (2007)، تەواوى چالاکى و فێستیڤاڵەکانى گەلاوێژ، بەسەرپەرشتى ئاسۆ کراون. سەرەنجام متمانەى دەستەى باڵاى بنکە و پاشان جێگرى سەرۆکى وەرگرتووە.

لە فیلمى (ژانى گەل) و پاشان لە دراماى (گەردەلول)دا دەبێتە ئەستێرەیەکى گەشى بوارى سنەما و دراما. (30) ساڵى رەبەق، ئاسۆى هونەریى ساماڵ دەکرد و ئومێدى بەرهەمى باشترى دەبەخشێتە هونەر دۆستان. بەو هەموو ماندووبونە، ئۆقرەى نەدەگرت، عشقی سلێمانی بەرنامەى (وێنەکانى دوێنێ)ى لە کوردساتدا بە ئاوێتەکردنى سەلیقەى نایابى پێشکەشکار و نواندن و پرسیارکردن لەسەر وێنە بە وێنە و یادگارى بە یادگارى کەسەیاتیەکانى شار، لاپەڕە نەزانراوەکانى مێژووى سلێمانى دەخستەوە یادەوەرى نەوەى سۆسیال – میدیا!

ئاسۆ، لە بۆتەى سلێمانیدا توابوەوە، بەڵام لە رەچەڵەکى خۆى کە پێنجوێنە، هەڵنەگەڕابوەوە، بۆیە، یەکەمین کتێبى بەناوى (پێنجوێن مەملەکەتى گوڵە زەردە) ساڵى (2015) نوسى. دوەم کتێبى بەناوى (سلێمانى و خاکى – 830 لاپەڕە) رەنگاو رەنگ لەژێر چاپدایە.. هەروەها سیناریۆى (سنور) وەکو درامایەکى تەلەفزیۆنى نوسیووە، ئەمەش، هەروەکو نوسینى (رەبەن). هەزار مەخابن، تەواوى ئەم نوسینەى پێش ئەوەى چاپ بکرێن، نەخۆشى ئاسۆى بەهرەمەندى گەورە و، خۆشەویستى شارەکە و شۆڕەسوارى لە (30/12/2019)دا کاتژمێر (11)ى پێشنیوەڕۆ بۆ دونیاى نەمرى لێ فڕاندین و دڵى هەڵقرچاندین.

لە تەمەنى (55) ساڵیدا، کە تەمەنى پێگەیشتن و تێگەیشتنێتى بەرهەمى نایاب نایاب بخاتە خزمەت هونەر بەگشتى، جەڵتەى دڵ، ئەم دڵە پرٍاوپڕەى لە هونەر و  جوامێرى، لە لێدانى هەمیشەیى خست و لەسەر شانۆوە، خستییە ژێر شانۆى ژیانى نەمرى.. ژیانێک، راستە ئاسۆعومەر سوارەى تیادا نەماوە، بەڵام بە دڵنیاییەوە بەهرە و خۆشەویستى لە ئاسۆى هۆگرانى هونەر و سوارچاکانى کوردەوارى، بەدرەوشاوەیى دەمێنێتە. لە ژیانیشیدا، چى چاندبوو، بەرەکەى لەناو دەریاى خۆشەویستى خەڵکى سلێمانی دا دوریەوە. ئاپۆرەى سەر قەبران و مەراسیمى تازیەکەى، کە هەزاران ئەمکدارى سلێمانى، بەخەمێکى قوڵ و فرمێسکى وەفاوە، دەستى نزاى خوالێخۆشبونیان بۆ بەرزدەکردەوە، دەرى خست، ئاسۆ لە دڵى شاردا، هەروەکو ئاسۆى دواڕۆژ ئاوا نابێ.

بنکەى روناکبیریى گەلاوێژ، لە کاتێکدا بە سوێى مەرگى ئاسۆوە دەتلێتەوە، لەهەمان کاتدا، شانازى دەکەین، کە (12) ساڵى رەبەقە ئاسۆ لەبن ساباتى بنکەدا، بەوپەڕى خۆشەویستى و چالاکى بەردەوامیەوە، یەکێکە لە رابەرەکانى بنکەکەمان و تاهەتایە، وێردى سەر زمانى بنکەى روناکبیریى گەلاوێژە، هەروەکو چۆن، لەسەر وێردى هەموو هونەرمەندێک و کوردێکى دڵسۆز دەمێنێتەوە. لە (20/4/2020)یشد١ (23)هەمین فێستیڤاڵى گەلاوێژ بەناوى (ئاسۆ)وە لە ژێر دروشمى (ئاسۆ دەدرەوشێتەوە) سازدەدەین، مەراسیمى چلەکەشى هەر لەلایەن بنکەى گەلاوێژەوە، بەیارمەتى هاوسەر و مناڵەکانى و تەواى دۆستەکانى ئەنجام دەدەین.

بنو ئاسۆى هاوڕێ و هاوپێناومان. وەجاخى هونەرى و دڵسۆزى و کورد پەروەریت رۆشنە، بنو، هاوڕێکانت بەردەوامن.

بنکەى روناکبیرى گەلاوێژ

شەوى سەرى ساڵى

2019 -2020

 


ئەم بابەتە 149 جار خوێندراوەتەوە