Roman.jpg

رۆمانی رۆژێک له‌و ساڵانه‌ هه‌ڵده‌گرم بڵاوده‌کرێتەوە

بڵاوکراوەکانی نووسیار لە وەرزی نوێی کتێبەکانیدا به‌مزوانه‌ ڕۆمانی (ڕۆژێک له‌و ساڵانه‌ هه‌ڵده‌گرم)ی ڕۆماننووس ئارام محه‌مه‌د چاپ و بڵاوده‌کاته‌وه،  بەمەش بڵاوکراوەکانی نووسیار یەکەمین ڕۆمانی خستە نێو زنجیرەی خەرمانەی نووسیار بۆ ڕۆمان.

له‌باره‌ی ئه‌م به‌رهه‌مه‌وه‌، ڕۆماننووس ئارام محه‌مه‌د لە لێدوانێکى تایبەت بە سایتى گەلاوێژ وتى: ''به‌شێکی ئه‌ده‌بی گێڕانه‌وه‌، خه‌ریکی ئاوڕدانه‌وه‌یه‌ له‌ ڕابردوو، تاوه‌کو ئێستا و داهاتوو بخاته‌ به‌رده‌م تێگه‌یشتنێکی ڕوون و ئاڵۆزییه‌کان شڕۆڤه‌ بکات. ئه‌م کاره‌ ئه‌زموونێکی جیاوازی منه‌، له‌ بواری گێڕانه‌وه‌دا، جه‌خت کردنه‌وه‌یه‌ له‌سه‌ر چه‌مکێکی گرنگ، که‌ خه‌ریکه‌ ده‌که‌وێته‌ په‌راوێزه‌وه‌، ئه‌ویش چه‌مکی ئازادیی تاکه‌، له‌به‌رده‌م پرسیاری ئه‌وه‌ی ئایا به‌ ڕاستی ئێمه‌ ده‌زانین ئازادی چییه‌، کاتێک به‌ر ئه‌و پانتاییه‌ که‌وتین چیمان لێهات، ئه‌ی ئێسته‌ چی بکه‌ین؟  بۆ ڕۆچوون له‌ ورده‌کارییه‌کان، پێویستمان به‌ قسه‌کردنه‌، گێڕانه‌وه‌ ده‌رگا‌ی ڕزگاربوونه‌‌ له‌ مۆته‌که‌ی ئه‌و حه‌کایه‌ته‌ی، که‌ نزیکه‌ی سی ساڵه‌ وه‌ک تارماییه‌ک به‌سه‌ر تاکه‌وه‌یه''.

لە پەڕەگرافێکى رۆمانەکەدا هاتووە:

''ئێستاکه‌ هیچ شتێک وه‌ک نووسین ئارامبه‌خش نییه‌، ئه‌وه‌تا له‌ به‌رانبه‌رتدا وه‌ستاوم و قسه‌ت بۆ ده‌که‌م. لێره‌ و له‌و ماوه‌یه‌دا ده‌توانم بارته‌قای هه‌موو ناخۆشییه‌کانی ژیانم چێژ له‌و گفتوگۆیه‌ وه‌ربگرم. ده‌مه‌وێت له‌ناو ئه‌و نووسینه‌دا تێر لێت بڕوانم و ئه‌و کارانه‌ی نیوه‌چڵنیان نه‌مکردوون، ته‌واویان بکه‌م. ده‌زانم ئه‌مه‌ کارێکی ئاسان نییه‌، لێ له‌ناو ئه‌و دۆخه‌دا قاڵ بوومه‌ته‌وه‌. ئیتر ئاوایه‌، مرۆڤ که‌ لایڕوون بوو بۆ کوێ ده‌چێت، باشتر ڕێگه‌که‌ ده‌بڕێت''.

ئارام محه‌مه‌د لە چەند دێرێکدا:

- ناوى تەواوى: ئارام محه‌مه‌د عەبدولڕەحمان

- پیشەى ئەدەبى: ڕۆماننووس

- لە رۆژى 25/10/١٩٨٤ لە ناحییه‌ی بالیسان سه‌ر به‌ پارێزگای هه‌ولێر لە دایکبووە.

- لە ساڵى 1998 خوێندنى سەرەتایى لە خوێندنگاى سه‌روچاوه‌ی تێکه‌ڵاو تەواو کردووە.

- لە ساڵى 2004 خوێندنى ناوەندى و ئامادەیى لە خوێندنگای (ئاراسن) له‌ شارۆچکه‌ی سه‌روچاوه‌ی سه‌ر به‌ رانیه‌ تەواو کردووە.

- لە ساڵى 2008  بڕونامەى به‌کالۆریۆسی له‌ زمانی ئینگلیزی لە زانکۆی دهۆک وه‌رگرتووه‌.

- لە ساڵی 2012 خەڵاتی لاوی ساڵی وه‌زاره‌تی ڕۆشنبیری بۆ بواری ڕۆمان وەرگرتووە.

- لە ساڵی 2013 بۆ چیڕۆکی (دەزگیرانی گۆڕستان) لە ڤیستیڤاڵی هەتاو بۆ ئەدەبی گەنجان خەڵاتی دووەمی چیڕۆکی وەرگرتووە.

- لە ساڵی 2014 بۆ چیڕۆکی (زمانی دیوار) خەڵاتی یەکەمی ڤیستیڤاڵی گەلاوێژی بۆ بواری چیڕۆک وەرگرتووە.

- لە زۆربە ی ڕۆژنامه‌ و پاشکۆ ئەدەبییەکانی کوردستان، چیرۆک و وتاری ئه‌ده‌بی بڵاوکردۆ‌ته‌وه‌.

خاوەنی چەند ڕۆمان و کۆمه‌ڵه‌ چیڕۆکە بەناوەکانى:

- سه‌مای سڕبوون، رۆمان، 2012.

- خه‌وتوو، رۆمان، 2014.

- مه‌رگی مێژوونووس، رۆمان، 2016.

- ده‌رگه‌کانیش هیلاکن، چیرۆک، 2018.

- رۆژێک لەو ساڵانە هەڵدەگرم، رۆمان، 2020.


ئەم بابەتە 120 جار خوێندراوەتەوە