World-Poetry-Day.png

ئەمڕۆ، جگە لە جەژنى سەرى ساڵى کوردى، رۆژى جیهانى شیعرەیشە

ساڵانە لە رۆژێکى وەکو ئەمڕۆدا 21/3، کە هاوکاتە لەگەڵ جەژنى نەورۆزى کوردان یەکەم رۆژی ساڵی نوێی کوردیی، لەهەمانکاتدا بە رۆژی جیهانی شیعریش لەلایەن (رێکخراوی یونسکۆ - رێکخراوی جیهانی بۆ پەروەردە و رۆشنبیری) دیاری کراوە، هەر بۆیە لەم رۆژەدا ئەدیبان بەتایبەتى شاعیر و هەوادارانى شیعر چەندین چالاکى و مەراسیم بەڕێوەدەبەن.

رێکخراوی یونسکۆ لە ساڵى 1999 لە سێهەمین دانیشتنی خۆیدا، رۆژى 21/3ى هەموو ساڵیکی وەک رۆژی جیهانی شیعر دیاریکرد، لە دوای دیاریکردنی ئەو رۆژە بۆ شیعر، ڕێکخراوى یونسکۆ رایگەیاند "شیعر دەتوانێت رۆڵێکی کۆمەڵایەتی هەبێت و هۆکارێک بێت بۆ هوشیاری و بە ئاگایی خوێنەر و وەرگر، شیعر دەتوانێت کۆمەک و هاوکار بێت بۆ مرۆڤی خوێنەر لە زانینی پێگە و رۆڵی خۆیان لە گۆرانکارییکانی جیهاندا".

ئامانج لە راگەیاندنی ئەم رۆژە رێکخراوی یۆنیسکۆ تازەکردنەوەی دانان و بەخشینی هێزە بە بزووتنەوە شیعرییە نیشتمانی و ناوچەیی و نێودەوڵەتییەکان ، هەروەها پارێزگاریکردنە لە هەمەرەنگیی زمان لە رێگەی شیعرەوە، هەروەها پاراستنی ئەو زمانانەی روبەڕووی مەترسی لەناوچوون بوونەتەوە.

ساڵانەش لە کوردستان بە چەندین شێوازى جیاواز یادى ئەم رۆژە دەکرێتەوە، بەڵام یادى ئەمڕۆژە هاوکاتە لەگەڵ بڵاوبونەوەى نەخۆشیەکى مەترسیدار (کڕۆنا)، هەر بۆیە بەشێک لە شاعیران بە بڵاوکردنەوەى دەقە شیعرییەکانیان یادى ئەم رۆژە بەرز رادەگرن.

سایتى گەلاوێژ لەمڕۆژەدا جوانترین پیرۆزبایى لە شاعیرانى کورد دەکات، بەڵێنیش دەدەین هەمیشە لە خزمەتى بوارى ئەدەبیدا بین، هەموو تواناکنمان دەخەینەگەڕ بۆ خزمەتى ئەدەب و ئەدیبان، لێرەشەوە رایدەگەیەنین سایت و پەیجى گەلاوێژ هەمیشە لە خزمەتیاندایە بۆ بڵاوکردنەوەى بەرهەمەکانیان..


ئەم بابەتە 53 جار خوێندراوەتەوە