69432234_n.jpg

٥ی ئەم مانگە، گەلاوێژ دەستپێدەكات

بەبەشداری چەندین دەزگای بڵاوكردنەوە پێشانگەیەكی كتێب دەكرێتەوە

32 هونەرمەند بە كارەكانی سیرامیك، شێوەكاری، نەحت، بەشداری پیشانگەیەكی هاوبەش دەكەن

رۆژی ٥/٤/٢٠١٨ لەهۆڵی تەوار، بنكەی روناكبیریی گەلاوێژ، بەدروشمی (بەرەو تێپەڕاندنی چوارچێوە داخراوەكان) بیستویەكەمین فێستیڤاڵی نێودەوڵەتیی گەلاوێژ كە سێ‌ رۆژ دەخایەنێت بەڕێوەدەبات.

فێستیڤاڵی ئەمساڵ، سەرباری دواكەوتنی لەوادەی خۆیداو ئەو بارە ناهەموارەی روی لەهەرێمی كوردستان كردوە، بەڵام بەوپەڕی بەرپرسیارێتێەوە چالاكییەكانی وەك ساڵانی تر پێشكەش دەكرێن.

تەوەری سەرەكی گفتوگۆی توێژینەوە عەرەبی‌و فارسییەكان بریتییە لە (وەرگێڕانی ئەوی دی لەڕوی رۆشنبیریەوە)، ئەمە جگە لە پێشكەشكردن‌و خوێندنەوەی ئەو شیعرو لێكۆڵینەوە كوردییانەی كە رەزامەندییان لەسەر دراوەو پەسەند كراون، تا بەشداری بكەن لەپێشبڕكێ‌‌و بخوێندرێنەوە.

 

لەهەمان كاتدا خەڵاتی (فوئاد مەجید میسری) دەبەخشرێتە چیرۆكنوس‌و رۆماننوسێكی كورد، هەروەها خەڵاتی تایبەتی (كوردستان) دەبەخشرێتە نوسەرێكی ئێرانی، ئەمە جگە لەچەند خەڵاتێكی تر.

لەفێستیڤاڵی ئەمساڵدا چەند نوسەرو شاعیرێك لەوڵاتانی مەغریب‌و میسرو ئێرانەوە داوەت كراون.

هەر لە فێستیڤاڵی ئەمساڵدا، بنكەی روناكبیری گەلاوێژ، لەزنجیرە چالاكییەكانیدا بەمەبەستی برەودان بە كتێب‌و خوێندنەوەو بەهاوكاری چەندین دەزگای پەخش‌و روناكبیری، پێشانگەی كتێب لەهۆڵی كتێبخانەی گشتی دەكاتەوەو پێنج رۆژ لەكاتەكانی بەیانیان‌و پاش نیوەڕوان بەردەوام دەبێ‌، دەزگاو شوێنە رۆشنبیرییەكانیش بریتین لە: دار میزوبوتامیا، دار التنویر، دار قنادیل، دار الرافدین، دار الزمان، دار التكوین، دار الجمل، دار المتوسط، المكتبة العلمیة، دەزگای سەردەم، ناوەندی غەزەلنوس، ناوەندی ئەندێشە، دەزگای جەمال عیرفان، بەڕێوەبەرایەتیی راگەیاندن‌و چاپ‌و بڵاوكردنەوەی سلێمانی، دەزگای سارا، خانەی سمۆرە، ناوەندی رۆشنگەری چاودێر، ناوەندی ئایدیا.

لەهەمان وادەی دەستپێكردنی فێستیڤاڵدا، (گروپی هونەریی دڵخواز) لەهۆڵی تەوارو بۆماوەی چوار رۆژ، پێشانگەیەكی هاوبەش بەناوی (بەرخودانی عەفرین) بۆ هەر سێ‌ جۆری (سیرامیك، شێوەكاریی، نەحت) دەكاتەوەو ٣٢ هونەرمەند بەكارە جیاجیاكانیان بەشدارییان تێدا كردوە كە (٢٢) كاری شێوەكاری و (١٢) كاری سیرامیك‌و (١٢) كاری پەیكەر دەگرێتە خۆی.

 


ئەم بابەتە 33 جار خوێندراوەتەوە