kteb.jpg

بەبەشداری چەندین دەزگای بڵاوكردنەوە، پێشانگایەكی كتێب دەكرێتەوە

بەبەشداری چەندین دەزگای بڵاوكردنەوە، پێشانگایەكی كتێب دەكرێتەوە

داشكاندنی لە(25% تا 50%) بۆ كتێبەكان دەكرێت

گەلاوێژنامە:

ئەمڕۆ پێنجشەممە رێكەوتی 5/4/2018 لەشاری سلێمانی، هاوكات لەگەڵ دەستیپێكردنی كارەكانی بیست‌و یەكەمین فێستیڤاڵی گەلاوێژدا، لەلایەن بنكەی روناكبیری گەلاوێژ، بەمەبەستی برەودان بەكتێب‌و خوێندنەوە‌و بەهاوكاری چەندین دەزگای پەخش‌و روناكبیری، پێشانگایەكی گەورەی كتێب لەهۆڵی كتێبخانەی گشتی دەكرێتەوە‌و ماوەی چوار رۆژیش بەردەوام دەبێت، كە تیایدا داشكاندنی بەرچاو بۆ زۆربەی سەرچاوە جیاوازەكانی كتێب، بەڕێژەی لە(25% تا 50%) دەكرێت.

لەپێشانگاكەی ئەمڕۆدا، چەندین سەرچاوەی جیاوازی كتێب بەزمانەكانی (كوردی‌و و عەرەبی‌و فارسی‌و ئینگلیزی) خراونەتەرو، هاوكات لەگەڵ بەردەوام بوونی قەیرانی داراییشدا، بەمەبەستی باشتر خزمەتكردنی خوێنەران لەم پێشانگایەدا، داشكاندنی بەرچاو بەڕێژەی لە(25% تا 45%) و بۆ سەرچاوەكانی دیكەی كتێب كراوە، هەروەها بۆ زۆربەی كتێبە كوردیەكانیش تا رێژەی لە(50%) داشكاندنیان بۆ دەكرێت.

هەرچەندە فیستیڤاڵی ئەمساڵی گەلاوێژ، ماوەی سێ رۆژ بەردەوام دەبێت، بەڵام پێشانگای كتێبەكە، لەرێكەوتی 5/4  8/4/2018، بەردەوامی دەبێت، واتە رۆژێك دوای فیستیڤاڵەكە كۆتایی پێدێت.

لەپێشانگاكەی ئەمساڵدا، دەزگا‌و شوێنە رۆشنبیرییەكانی وەك (دار میزوبوتامیا، دار التنویر، دار قنادیل، دار الرافدین، دار الزمان، دار التكوین، دار الجمل، دار المتوسگ، المكتبە العلمیە، دەزگای سەردەم، ناوەندی غەزەلنوس، ناوەندی ئەندێشە، دەزگای جەمال عیرفان، بەڕێوەبەرایەتیی راگەیاندن‌و چاپ‌و بڵاوكردنەوەی سلێمانی، دەزگای سارا، خانەی سمۆرە، ناوەندی رۆشنگەریی چاودێر، ناوەندی ئایدیا) بەشداریان تێدا كردووە.

 

 


ئەم بابەتە 32 جار خوێندراوەتەوە