لەدوەم رۆژی فێستیڤاڵدا، رەهەندە كولتوری‌و رۆشنگەرییەكانی وەرگێڕان، بوە دیالۆگی نەتەوە جیاوازەكان

لەلایەكی دیكەوە، دوێنێ لەبەردەوامی دووەمین ڕۆژی فێستیڤاڵدا وەرگێڕان و كاریگەرییەكانی لەسەر كرانەوەو رۆشنگەری تەوەری سەرەكی گفتوگۆكان بوو، لەپانێڵی یەكەمدا فازڵ سامر نوسەر و ڕەخنەگری عێراقی باسیلەوەكرد، پڕۆسەی وەرگێڕان، پڕۆسەی گەیاندنی كلتوری نەتەوەیەكی دیكەیە بەنەتەوەیەكی دیكە، ئەمەش پڕۆسەیەكی مەزنە‌و گرنگە بۆ تێگەیشتن لەنەتەوەكانی دیكە و دروستكردنی پەیوەندی لەنێوان كلتور و نەتەوەكاندا، هاوكات جیهانێكی شارستانی بەهەموو پێكهاتەكەیەوە بەنەتەوەیەكی دیكە دەگەیەنێت.

ئەوەی زۆر گفتوگۆی لەناو بەشداربووانی پانێڵەكە دروستكرد، وتەكانی شەوقی عەبدول ئەمیر شاعیر و وەرگێڕ بوو، كە لەهەمان پانێڵدا باسی لەدەوڵەمەندی زمانی عەرەبی بەرامبەر زمانەكانی دیكە كرد، لەبەرامبەردا بەشێك لەمیوانەكان پێیان وابوو هەر زمانێك تایبەتمەندی خۆی هەیە و هەندێك زمانی دیكەی وەك زمانی كوردی هەمان تایبەتمەندی زمانی عەرەبی هەیە.

لەپانێڵی دووەمدا سەڵاح ئەلوەدیع شاعیر و چالاكوانی مەدەنی، ئاماژەی بەوەكرد: وەرگێڕان هەر بەتەنها رۆڵی گواستنەوەی دەقێك نییە، بەڵكو دەبێتە بوارێكی ڕۆشنگەری، وەرگێڕان پڕۆسەیەكە بەقوڵی دەچێتە ناو ئاشنابون بەئەوی تر، بۆیە ئەوەی ناكرێت خیانەتی لێ بكەن قوڵایی ئەو بابەتەیە كە نوسراوە.

هاوكات، ئیكرام عەبدی شاعیر و وەرگێڕ باسیلەوەكرد، وەرگێڕان كارێكی ئاسان نییە و تەنها گۆڕینی زمان نییە، بەڵكو پێویستی بەزیندوێتی و ناخ و ڕوحی كلتورەكەیان هەیە، پێویستە بخوێنیتەوە لەبارەی مێژوو و كلتور و لایەنی كۆمەڵایەتی ئەو نەتەوەیەوە.

ناوبراو پێیوابوو، ئەگەر وەرگێڕان نەمێنێت ئەوی تر نامێنێت و وەرگێڕانی شیعریشی بەقورسترین وەرگێڕان ناو زەند كرد.

لەهەمان پانێلدا، سەعد محەمەد ڕەحیم وەرگێڕ و نوسەر باسی وەرگێڕانێكی كلتوری كرد، كە چۆن كلتورێك وای لێدێت شایەنی وەرگێڕان بێت، واتە خۆی بەرجەستە بكات و بۆ خەڵكیش بەرجەستە‌و كراوە بێت.

پاش تەواوبوونی دوو پانێڵی یەكەم، مەلا بەختیار سەرپەرشتیاری گشتی فێستیڤاڵی گەلاوێژ، باسی لەگرنگی وەرگێڕان كرد، بەتایبەت لەزمانەكانی ڕۆژهەڵاتی ناوەڕاست كە لەرووی ڕۆشنبیری و كلتورەوە هەژارن، ڕەخنەی لەوەرگێڕەكانی كورد گرت، كە وەرگێڕانی سەركەوتویان نییە و سەقەتن، هاوكات وەرگێڕانی ناو نەتەوەی عەرەبیشی بەئاستێكی نزم وەسفكرد، وەك بەڵگەی قسەكانیشی راپۆرتی نەتەوە یەكگرتووەكانی باسكرد، كە شەش ڕاپۆرتی لەسەر وەرگێڕانی زمانی عەرەبی بڵاوكردۆتەوە‌و باسلەوەدەكەن، لەهەزار ساڵی ڕابردوودا، هەرچی كتێبێك لەناو نەتەوەی عەرەبدا نوسرابێت یان وەرگێڕدرابێت بایی یەك ساڵ كتێبی فیلەندا نابێت.

هەر پەیوەست بەو بابەتە، مەلا بەختیار، باسی لەگەشەسەندنی عەقڵیەتی سەلەفی كرد لە وڵاتانی عەرەبی‌و ناوچەكە، ئەمەشی بە هۆكاریی دواكەوتویی ئاستی رۆشنگەری‌و كۆمەڵایەتی ئەم كۆمەڵانە وەسف كردو و ڕایگەیاند، گەورەترین كارەسات لەڕۆژهەڵاتی ناوەڕاست ئەوەبوو، كە ئەدەبیاتی سەلەفی یان عەقڵیەتی سەلەفی زاڵبوو.

ئەوەشی خستەڕوو، ئەم كاریگەریە رۆحیەی عەقڵی سەلەفی، دەبێت لەباخچەی ساوایانەوە بۆ زانكۆ كاری لەسەربكرێت، چونكە خەتەرترین لەشكری بێ چەكە، بەڵام هەركات بیانەوێت چەكداردەكرێن.

 لەپاشنیوەڕۆی هەمان رۆژدا دوو پانێڵ بۆ نوسەرە ئێرانییەكان سازدرا و بەهەمانشێوە باسیان لە وەرگێڕان‌و رۆشنگەری كردو دیسان دیالۆگی كولتوری ‌و زمانی لەنێوان نەتەوە جیاوازەكانی نێو فێستیڤاڵدا هێنایە ئاراوە. 

.

 


ئەم بابەتە 7 جار خوێندراوەتەوە
بابەتی لەیەکچوو