هەنگاوێك بەئاڕاستەی نزیكبونەوە‌و ئاوێتەبونی كولتورە جیاوازەكان

خەلیل عەبدوڵڵا، نوسەر: سەرباری جیاوازیە سیاسیەكان، لەرابردوەوە تاوەكو ئەمڕۆ، هەمیشە گەلاوێژ، زمانێكی هاوبەش بوە بۆ لێكنزیككردنەوەی گەلان

سابیر عەبدوڵڵا، وەرگێڕ: گەلاوێژ، دەریخست هێشتا هیوایەك ماوە، بۆ دیالۆگی نێوان نەتەوەكان

كامەران رەئوف، شانۆكار: بەهۆی گەلاوێژەوە، ئەدەب‌و كلتور‌و ناسنامەی كوردمان بەخشیەوە بەو میوانانەی هاتونەتە كوردستان

گەلاوێژنامە:

لەدوەم رۆژی فێستیڤاڵی ئەمساڵی گەلاوێژدا، ژمارەیەك لەنوسەران‌و رۆشنبیرانی بەناوبانگی عەرەب‌و ئێرانی، چەند پانێڵێكی گرنگیان تایبەت بەبواری وەرگێڕان‌و كاریگەریی لەسەر ئەویدی، پێشكەشكرد‌و هێندەی تر كاریگەری هەبو لەسەر نزیكبونەوە‌و بەریەكەوتنی شارستانیەت‌و كلتورە جیاوازەكان، هاوكات بەشێك لەمیوانان‌و ئامادەبوانیش، بەگرنگیەوە باسیان لەو جۆرە پانێلانە كرد‌و رایانگەیاند، بابەتەكانیان بەلاوە گرنگ بوە‌و زانیاری نوێشیان لێ وەرگرتوە.

خەلیل عەبدوڵا، نوسەر بە"گەلاوێژنامە"ی راگەیاند: لەم هەلومەرجە قەیراناوییە سیاسی‌و ئابورییەی كوردستانی پیا تێدەپەڕێت، گرنگی لایەنی رۆشنبیری لەم فێستێڤاڵەدا دەردەكەوێت، چونكە فێستیڤاڵەكە، بۆخۆی زمانێكە بۆ گفتوگۆی نێوان شارستانیەتە جیاوازەكانی نەتەوەكان‌و پەیامی هونەر‌و رۆشنبیری وڵاتانی دیكە، لەسەردەمە جیاوازەكان‌و قەیرانەكاندا بەئێمەی كورد دەگەیەنێت، سەرباری جیاوازیە سیاسیەكان، لەرابردوەوە تاوەكو ئەمڕۆ، هەمیشە فێستیڤاڵی ئەدەبی‌و روناكبیری گەلاوێژ، زمانێكی هاوبەش بوە بۆ لێكنزیككردنەوەی گەلان.

سابیر عەبدوڵا، وەرگێڕ، بۆ "گەلاوێژنامە"، ئاماژەی بەوەكرد: ساڵانە كەسانی دەستەپژێری كۆمەڵگای كوردی‌و بیانیەكان، بەهۆی گەلاوێژەوە دێنە كوردستان‌و ئەمساڵیش بۆخۆم لەبابەتەكانی بواری وەرگێڕان، كەڵكی زۆرم وەرگرتوە.

رونیشیكردەوە، گرنگە بەشێوەیەكی بەردەوام كەسانی ئەكادیمی‌و پسپۆڕ قسەیان هەبێت لەسەر كایە مەرعریفی‌و ئەقڵیەكان‌و مامەڵەكردنی كوردیش لەگەڵ زمانەكانی فارسی‌و عەرەبی‌و ئینگلیزی، بەشێكە لەتێكەڵبونی كلتور‌و شارستانیەتەكان‌و ئاوێتەبونیان بایەخی زۆری بۆ كۆمەڵگای كوردی هەیە، بۆیە گەلاوێژ، دەریخست هێشتا هیوایەك ماوە، تاكو دایالۆگی نێوان نەتەوەكان لەم فێستیڤاڵەدا‌و لەساڵانی ئایندەدا گڕوتینی زیاتر بەخۆوە ببینێت.

كامەران رەئوف، شانۆكار، بە"گەلاوێژنامە"ی راگەیاند: هەبون‌و بەردەوامی ئەم جۆری فێستیڤاڵانە بۆ دۆخی ئێستای هەرێمەكەمان بایەخدارە، چونكە زۆر دوركەوتوینەتەوە لەكۆمەڵگای جیهانی، بەڵام جارێكی تر بەهۆی گەلاوێژەوە، ئەدەب‌و كلتور‌و ناسنامەی كوردمان بەخشیەوە بەو بیانیانەی هاتونەتە كوردستان‌و پێیاندەڵێین ئێمە میلەتێكین خاوەن كولتوری خۆمانین‌و بابەتەكانی بواری وەرگێڕان زۆر گرنگ بون و زانیاری نوێ‌و بەكەڵكمان لێوەرگرت.

نەرمین عوسمان، میوان بۆ "گەلاوێژنامە"، وتی "بونی فێستیڤاڵەكە، بەدیدارێكی گرنگی بواری رۆشنبیری‌و فەرهەنگ‌و كلتوری دەزانم، بەتایبەت لەمساڵدا كە سەرباری قەیرانەكان، بەڵام بەجیاوازی بیروبۆچونەكانەوە، ئازایەتیەكی گەورە بوە، واتە  لەكۆمەڵگاكەماندا‌و خودی سازدانی گەلاوێژ، ئازایانە‌و ئازادی ویستوە.

ناوبراو، هێمای بۆ ئەوەشكرد: بەشداری مەلا بەختیار، بەخستنەروی سەرنج‌و تێبینیەكانی كارێكی  ئازایانە بو، چونكە رەخنەی لەبیری سەلەفیەت گرت‌و بەعەرەبەكانیشی وت ئێوە میوانی ئێمەن، بەڵام ئاگاداری ئەوەبن، ئێوەش هێشتا لەبواری وەرگێڕان دواكەوتن‌و وەك پێویست نەتانتوانیوە پێشبكەون.

 


ئەم بابەتە 9 جار خوێندراوەتەوە
بابەتی لەیەکچوو