كۆڕێكی ماتەمینی بۆ زانای عێراقی دكتۆر ئەحمەد مەتڵوب


بنكەی روناكبیریی گەلاوێژ لە رۆژی چوارشەممەی رێكەوتی 8/8/ 2018 كۆڕێكی ماتەمینیی بۆ زانای عێراقیی كۆچكردوو دكتۆر ئەحمەد مەوتڵوب ساز كرد، تیایدا هەر یەك لە دكتۆر فایق مستەفا و دكتۆر نەوزاد ئەحمەد ئەسوەد بە هەردوو زمانی كوردی و عەرەبی باسی رۆڵ و كاریگەریی زانای كۆچكردوویان كرد بەسەر ئەدەبی عەرەبی و زانكۆكانی عێراق و كوردستاندا.
بەو پێیەی دكتۆر فایق ئاشنایەتیییەكی نزیكی لەگەڵ زانای كۆچكردوودا هەیەو بۆ ماوەی پتر لە چل ساڵ هاوڕێی یەكتر بوون، بەو بۆنەیەوە دكتۆر فایق بە درێژی باسی بیرەوەرییەكانی خۆی لەگەڵ دكتۆر ئەحمەد مەتڵوبدا كردو هەروەها باسی بیۆگرافیای ئەدەبی و زانستیی ناوبراوی كردو دەربارەی كتێبە چاپكراوەكانی قسەی كرد كە نزیكەی چل كتێبی لە بواری ئەدەب و رەخنەو رەوانبێژیدا چاپ كردووە، هەروەها باسی گیانی لەخۆبردوویی و خاكەڕایی زانای ناوبراوی كردو وتی لە ژیانمدا سێ‌ كەسایەتیی گرنگم بینیوە كە زۆر موتەوازیع و خاكەڕا بوون، ئەوانیش: عەبدولكەریم قاسم و مام جەلال و دكتۆر ئەحمەد مەتڵوبن.
شایانی باسە دكتۆر ئەحمەد مەتڵوب لەساڵی 1936 لە شاری تكریت لەدایك بووەو لە رێكەوتی 21/7/2018 لە شاری بەغدا بە نەخۆشی كۆچی دوایی كرد. لەساڵی 1967 وەزیری رۆشنبیری عیراقی بووەو لە ساڵی 2007یشەوە سەرۆكی كۆڕی زانیاریی عێراق بووە. پسپۆری سەرەكیی بریتی بوو لە رەوانبێژی عەرەبی كە كتێبەكانی وەك سەرچاوەیەكی سەرەكی لە زانكۆكانی عیراق و كوردستتاندا دەخوێنرێن.


ئەم بابەتە 7 جار خوێندراوەتەوە
بابەتی لەیەکچوو