هونەرمەند رۆستەم ئاغالە لە نێوان بینینی منداڵ و ڕەتكردنەوەی گەورەبووندا

تەڵعەت تاهیر
Sep 4, 2018

هونەرمەندی شێوەكار و فۆتۆگرافەر رۆستەم ئاغالە ، یەكێكە لەو هونەرمەندە شێوەكارییانەی كە ساڵانێكی زۆرە مشتومڕێكی زۆر دەربارەی بەرهەمە هونەرییەكانی لە ئارادایە ، كەم هونەرمەند هەیە هێندەی ئەو رووبەڕووی نەیاران و تێبینی و رەخنەی نەشیاو بووبێتەوە ، كە جاربووە پەیوەندیشی بە هونەرەوە نەبووە ! كەم هونەرمەندیش هەیە هێندەی ئەو هونەرەكەی سەرنجی بیانیەكان راكێشێت و ببێتە جێی سەرنج و ستایشی بینەرە بیانیەكان ، رۆستەم لە نێوان گلەیی هاوەڵەكانی و ستایشی بینەرەكانیدا هەمیشە تاكە وەڵامی لە ڕێی تابلۆوە بووە ، ئەوەی ئاگاداری شریتی عومری ئاغالە بێت ، پێی سەیر دەبێت چۆن بیست ساڵ لەمەوبەر وازی لە هونەر نەهێناوە ؟ ، رۆستەمی بەردەم لێشاوی رەخنە بە باوەڕبوونی بە بەهرە و توانای خۆی ئێستا بۆتە رەنگێكی گەرم لە ناوەندە پەیوەندی ساردەكەی هونەری كوردی .

 

ئاغالە و ناوەندی هونەری و وەهمی تەجرید

ناوەندی ئەدەبی و هونەری كوردی ، وەكو ناوەندێكی بێ‌ مێژوو ( مێژووی ئیبداعی ) هەمیشە ناوەندێكی وابەستە و لاسایكەرەوە بووە ، بەشێكی بەرچاو لە هونەری كوردی پاشكۆی مۆدێل و ستایلی خوازراو بووە ، هەندێ‌ لە شێوەكاران ستایلی هونەریان لە مەلزەمەكانەوە دەهێنا و بە بینەرە بەستەزمانەكانی كوردیان دەفرۆشتەوە ، بێ ئەوەی بزانن ، یان بیانەوێ‌ تێبگەن ، كە بەجیهانیبوون لێرەوە دەست پێدەكات ، رۆمانەكانی ماركیز  بچووكترین وردەكارییەكانی ژیانی كۆڵۆمبیەكانی لەخۆ گرتووە ، ئەگەر بێت و وانەبوایە كەس ئاوڕی لێنەدادەیەوە ، بە جیهانیبوونی هەر هونەرێك لە لۆكاڵییەوە دەست پێدەكات و لێرەوە دەپەڕێتەوە دنیا ، ئەوانەی رەخنەیان لە هونەری رۆستەم دەگرت ئەوانە بوون كە پێیان وابوو لە خواستنی ستایلی خۆرئاواوە دەبنە پێشەنگ ، گلەیی و ناتۆرەیان لە لۆكاڵیبوونی بەرهەمەكانی رۆستەم دەگرت ، دواتر دەرچوو هەرچی خۆرئاواییە زیاتر بەرەو هونەری ئاغالە دەكشێت و گرنگی پێدەدات ، چونكە بەرجەستە كردنی رۆحی خۆماڵییە و هەڵگری تامە هونەرییەكانی رۆژهەڵاتە ، فرۆشتنەوەی بەرهەمی خوازراوی خۆرئاوا بە خۆرئاواییەكان بەهەدەر دانی توانا و بەهرەیە ، نمایشكردنی كاڵایەكی ناسرا و باوە و كەس گرنگی پێنادات ، بەهرەمەندی راستەقینە هاواری خۆی بە گۆرانی خەڵكی ناگۆڕێتەوە ، دەریشچوو رۆستەم لە مەودای دوور چەند براوەی گرەوی داهێنانە و چەند خۆڕاگریش بوو لەبەردەم ئەو هەموو هێرشە ناڕەوایانەی دەكرایە سەری ، شێوەكار گرنگ نییە بتوانێت باش لە بارەی شێوەكارییەوە قسە بكات ، گرنگ ئەوەیە باش بتوانێت تابلۆ بنەخشێنێت .

گۆرانیبێژ گرنگ نییە بتوانێت باش لەبارەی هونەرەوە قسە بكات ، گرنگ ئەوەیە بتوانێت باش گۆرانی بچڕێت و نەشاز نەكات ، هێرشی تەجرید خوازەكان بۆ سەر رۆستەم دەرچوو كە هێرشێكی نابەجێیە و ئەوە خۆرئاوا خۆی خەریكە باوەڕی بە رەنگ نامێنێت و دەگەڕێتەوە بۆ نمایش كردنی ئایدیا و ئەندێشە ، لە رێگەی هونەری پۆست مۆدەرنێتە دەگەڕێتەوە بۆ باوەشی ژیان خۆی ، دەگەڕێتەوە بۆ باوەشی خودی ئینسان ، دەگەڕێتەوە بۆ گەڕاندنەوەی جوانیەكانی دنیا و ئەو پەرشوبڵاوییە و ئەو فرەییەی كە لە جیهاندا هەیە . ئەوانەی ئێمە لێرەوە دەڕۆن و خۆرئاواش لەوسەر گەڕایەوە ، ئەوانەی ئێمە ژیانیان بە جۆگەلە شوبهاند و لە وەهمی پەڕینەوەدان ، كەچی خۆرئاوا گەڕایەوە بۆ ئەو قووڵییەی جیهان و ئینسان كە چەشنی دەریایە .

 

ئاغالە و فەیروز

رەنگە خوێنەر ، یان خودی رۆستەمیش سەبارەت بەم تایتڵە پرسیار بكەن ، ئاخر بۆ فەیروز ؟ لە راستیدا خانمە هونەرمەندی ناوداری عەرەب : فەیروز ، هەمیشە بەوە ناسراوە كە گۆرانییەكانی داكۆكی لە منداڵبوونەوە و گەورەنەبوون دەكات ، گۆرانیەكانی هی ئەو منداڵانەیە كە نایانەوێت لەسەر جۆللانە بێنە خوارەوە ، نایانەوێت گۆی زەوی بە تۆپە لاستیكەكانیان بگۆڕنەوە ، دەیانەوێت لە ڕێی بینینە جوانەكانەوە ، ناشیرینیەكانی دنیا و رۆژگار فەرامۆش بكەن ، تابلۆكانی ئاغالە لە وێناكردنی سروشت بە چاو و بینینی منداڵانەوە بەهایەكی پاك و سۆزدار دەبەخشنە شتەكان ، لە هونەری ئەودا دەشێت گوێدرێژێك چەشنی بووكێك بڕازێتەوە و كورتانە رەنگدارەكەی لە كەوای ژنێكی نازەنین بچێت ، هێنانەوە و گەڕاندنەوەی جوانی بۆ كورتانی گوێدرێژێك ، یان پردێكی رووخاو ، یان درەختێكی سووتاو ، مەغزای گەڕاندنەوەی دنیابینیەكە كە پڕە لە سۆز و بەزەیی ، پڕە لە بەرائەت و لەخۆبووردەیی ، كە ئەمانە هەمووی لە دنیای منداڵانەوە هەڵدەقوڵێت ، لای منداڵێك دەشێت سێبەری درەختێكی سووتاو بكرێتە نیشتمان ، دەكرێت بانگدانی كەڵەشێرێك یان باعاندنی بەرخێك بكرێتە سروود و هوتاف ، زمانی رەنگ لە تابلۆكانی رۆستەمدا ، زمانی یادەوەرییە ، رەنگ دەبێتە رووداوێك كە لە قوژبنێكی رابردووماندا هەڵكوڕماوە ، گرنگی تابلۆكانی رۆستەم بە پلەی یەكەم لەوەدایە كە ئەو پێش ئەوەی بۆ بینەر رەسم بكات ، بۆ خودی خۆی دەیكات ، ئەو بە شوێن گەڕاندنەوەی تامەكانی یادەوەری خۆیدا دەگەڕێت ، بۆیەشە ناكەوێتە ژێر كاریگەری هیچ هونەرمەندێك ، چونكە لە ژێر كاریگەریەكی قوڵتر دایە كە منداڵی خۆیەتی ، ئەو لە كالیفۆرنیاش بژی ئەو دەرگا كۆن و پیسانەی كۆیە بەرۆكی بەرنادەن ، ئەو كۆڵانە تەسك و تروسكانەی كۆیە خەیاڵی فراوان و بیرۆكە و ئەندێشەی گەورەی پێدەبەخشن ، بێگومانم كاتێك لەبەر سپلیتەكەی گەلەری زامواش دانیشتووە بۆنی گیای سەر مەنجەڵە ماستەكانی كۆیە دەكات ، رۆستەم لەو یادەوریانە دەربچێت ، رووبەرووی گەورەبوون دەبێتەوە ، ئەو كاتەش دەبێتە كەسێكی ئاسایی و بەدەم كڕینی پەتاتە و سەودا كردنی پارچە قوماشێكەوە شین و مۆر دەبێتەوە . گەورەبوون و دووركەوتنەوە لە منداڵی بۆ هەر هونەرمەندێك ، واتای دووركەوتنەوە لە كانیەكانی بەهرە دەگەیەنێت .