رۆژگاری وشك و چاوی تەڕ

تەڵعەت تاهیر
Oct 6, 2018

1

چەند ئازایە ئەدەب ،

نیشتیمان دەكاتە چەترێك :

بەشی سەری هەموومان بكا .

چەند ترسنۆكە سیاسەت ،

نیشتیمان دەكاتە كڵاوێك :

بەشی سەری هەموومان بكا .

2

ئەبجەدیەتیش تێمانناگا:لە ئەلفەوە براكوژی دەكەین ،

لە یائەوە خۆشەویستی .

هەمیشە لە هەمان ڕوبار مەلە دەكەین : پشتەملی مێژوو دەخوێنینەوە ،

كەچی گلەیی لە دنیا دەكەین : روخساری خۆیمان نیشان نادا .

3

ڕەشایی پێڵووە ڕەشەكانی  پیرەمێردێكی شەنگالی ،

ڕەشایی كونە لووتە گچكەكانی

منداڵێكی هەڵكوڕماوی بەر ئاگرێكی ون لە عەربەت ،

ڕەشایی كراسێكی ئاودامانی پیرەژنێكی مەخموری :

نابنە مەرەكەب

بۆ نووسینەوەی چاوبڕین لە ئاسمانێكی وشك و

ڕاكشان لەسەر عەرزێكی تەڕ .

4

شەنگال سەلماندی :

نەك لە زماندا ،

نەك لە حوكمڕانیدا ،

نەك لە مێژوودا ،

نەك لە ئەدەبدا ،

نەك لە ژیاندا :

تەنانەت لە مەرگیشدا كۆنخواز و كۆنەپەرستین و

فۆڕمەكانی مردنمان تازە ناكەینەوە .

 

5

هەموو ئەو عەقڵانەی ،

دەچنەوە بەردەركی زەعیم :

عەقڵ نین ، پێن .

هەموو ئەو پێیانەی ،

ناچنەوە بەردەركی زەعیم :

پێ‌ نین ، عەقڵن .

6

لە شەڕدا

چەمكەكانی هەتاویش پێچەوانە دەبنەوە :

ڕوناكی دەمی تفەنگەكان :

ڕوناكی لە ماڵەكان دەكوژێننەوە و

تیشك دەبێتە یەكێك ،

لە مورادیفەكانی تاریكی .

7

چ ئافاتێكە ،

گوڵەبەڕۆژەكانیش ستایشی شەو دەكەن :

لەوەتەی هاتنی خەلافەتی ڕۆژهەڵات .