كۆتاییهاتنی سەرۆكایەتیی من لە گەلاوێژ

د. نەوزاد ئەحمەد ئەسوەد

من بۆ ماوەی هەشت ساڵ سەرۆكی بنكەی روناكبیریی گەلاوێژ بووم، لە 2011 هەتا 2019، واتە هەشت فێستیڤاڵی گەلاوێژم بەرێوە بردووە، لەكاتێكدا لە پەیرەو و پرۆگرامی گەلاوێژدا ماوەی سەرۆكایەتی بە سێ‌ ساڵ دیاری كراوە. واتە من دوو خول زیاترە سەرۆكی گەلاوێژ بووم كە ئیتر دەبوایە خۆم داوای گۆڕینی سەرۆكی گەلاوێژ بكەم، لە چەند ساڵی پێشووشدا ئەم مەسەلەیەم لەلای برادەرانی خۆمان باس كردووە. لە رێكەوتی 1/6/2019 نامەیەكی تایبەتیم ئاراستەی ناوەندی رۆشنگەریی چاودێر كرد بۆ گۆڕینی سەرۆكایەتیی گەلاوێژ، ئەوەبوو لە رێكەوتی 6/7/2019 لە كۆبونەوەیەكی فراواندا بەناوی "كۆبوونەوەی مەراسیمی گۆڕینی سەرۆكی گەلاوێژ" لە كتێبخانەی چاودێردا و بە ئامادەبوونی سەرپەرشتیاری گشتیی فێستیڤاڵ بەرێز كاك مەلا بەختیار و سەرپەرشتیاری ناوەندی رۆشنگەریی چاودێر بەرێز كاك سامی هادی و سەرجەم ستافی بنكەی روناكبیریی گەلاوێژ و ژمارەیەك لە نووسەران و رۆشنبیران، مەراسیمەكە بەرێوەچوو، پێشتر بریار درابوو ژنێكی چالاك و رۆشنبیر بكرێت بە سەرۆكی بنكەی روناكبیریی گەلاوێژ، لەو كۆبوونەوەیەدا بەرێز (د.ئیبتیسام ئیسماعیل قادر) وەك سەرۆك هەڵبژێردرا و بەرێز كاك (ئاسۆ عومەر سوارە) وەك جێگری سەرۆك دەستنیشان كرا. منیش بەو پێیەی ئەزمونی هەشت ساڵم لە بەرێوەبردنی فێستیڤاڵی گەلاوێژدا هەیە، وەك راوێژكاری گشتی بەردەوام دەبم لە هاریكاریكردنی كارو چالاكی و فێستڤاڵەكانی گەلاوێژ.


ئەم بابەتە 8 جار خوێندراوەتەوە
بابەتی لەیەکچوو