لە سلێمانی یادی شەوی یەڵدا دەكرێتەوە

Dec 14, 2017


 بۆ بەرزراگرتن و زیندوكردنەوەی شەوی یەڵدا لە شاری سلێمانی، لیژنەی باڵای یادكردنەوەی شەوی یەڵدا سەردانی قائیمقامیەتی سلێمانی دەكەن و قائیمقامی سلێمانیش پاڵپشتی و هاوكاری و پشتیوانی خۆی بۆ ئەنجامدانی چالاكییە جۆراوجۆرەكان دەخاتەڕوو. ڕۆژی سێشەممە ڕێكەوتی 12/12 قائیمقامی سلێمانی لە دیوانی قائیمقامیەت پێشوازی لە لیژنەی باڵی یادكردنەوەی شەوی یەڵدا كرد و سەبارەت بە چۆنیەتی خۆئامادەكردن بۆ یادكردنەوە و بەرزڕاگرتی ئەو شەوە لەگەڵ لیژنەكە كۆبۆوە. لیژنەكە كە پێكهاتبوون لە نوێنەری چەند رێكخراوێكی زەردەشتی، داوایان لە قائیمقامی سلێمانی كرد كە هاوكاربێت لەگەلیاندا تاوەكو بتوانن لیژنەكەیان لە ڕێگەی ئەنجامدانی چەند كار و چالاكییەكی جۆراوجۆرەوە ئەو یادە لە شاری سلێمانی بەرز ڕابگیرێت، بۆ ئەو مەبەستەش قائیمقامی سلێمانی هەموو هاوكاری و پشتیوانییەكی خۆی بۆ لیژنەكە دەربڕی.


 وەكو نەریتێكی ساڵانە لە شاری سلێمانی لە ٢١/١٢ ی هەموو ساڵێك یادی شەوی یەڵدا دەكرێتەوە و ئەو شەوە یەكێكە لە درێژترین شەوەكانی زستان و لەو شەوەشدا خێزان و گەنجەكان بە ئەنجامدانی چەندین چالاكی هونەری و ئەدەبییەوە ئەو شەوە بەڕێدەكەن و پەیمانی خۆشەویستی نوێ‌ دەكەنەوە.