فێستیڤاڵی گەلاوێژ دەست پێدەكاتەوە

Jan 7, 2018

لەپاش كۆبوونەوەی بەرفراوانی دەستەی باڵای بنكەی روناكبیریی گەلاوێژ لە رۆژی شەممە رێكەوتی 6-1-2018 و بە راوێژ لەگەڵ سەرپەرشتیاریی گشتیی فێستیڤاڵ، بریار درا لە بەهاری ئەمساڵداو بەدیاریكراوی لەسەرەتای مانگی چواردا بیستویەكەمین فێستیڤاڵی نێودەوڵەتیی گەلاوێژ ساز بكرێت.

سەبارەت بە بابەتەكانی پێشبڕكێی ئەدەبی لە لێكۆڵینەوەو چیرۆك و شیعر، هەر هەمان ئەو بابەت و ناوانەن كە پێشتر لە پێشبڕكێدا دەرچوبوون و لە رۆژنامەی چاودێردا بڵاو كرانەوە. هەروەها سەرلەنوێ‌ دەست دەكرێت بە پەیوەندیكردن بە نووسەرانی دەرەوە بەتایبەتی نووسەرانی رووس و وڵاتانی عەرەبی وەك مەغریب و تونس و میسرو لوبنان.

شایانی باسە ئەمساڵ لە فێستیڤاڵی گەلاوێژدا كتێبێكی قەبەو گەورەو رەنگاوڕەنگ چاپ دەكرێت دەربارەی بیبلیۆگرافیاو مێژووی سەرجەم فێستیڤاڵەكانی گەلاوێژ هەر لە سەرەتای دامەزراندنیەوە لە ساڵی 1996 هەتا بیستەمین فێستیڤاڵ لە 2016دا كە ژمارەیەكی زۆر وێنەی چالاكییەكان و وێنەی ئەدیبان و نووسەران لەخۆ دەگرێت لەتەك زانیاریی تەواو لەسەر بیست ساڵی بنكەی گەلاوێژو فێستیڤاڵەكەی.