چەند زانیارییەكی كەم، لەسەر فێستیڤاڵەكانی گەلاوێژ

Jun 5, 2017

حەز دەكەم هەندێك ئالیەتی چۆنێتیی هەڵسەنگاندنی بابەتی فێستیڤاڵەكانی بنكە لە دەورانی ئێمەدا بخەمە پێش چاو، بە مەبەستی ئاشنابوونی ئەوانەی كە هاوبەشی كێبركێی نووسینیان كردووە لەو بازنەیەدا.

بۆ چۆنێتیی هەڵسەنگاندنی بابەتەكانی چیرۆك و شیعر و لێكۆڵینەوە، 30 ئیستمارەم ئامادەكردبوو، بۆ هەر ئیستمارەیەك 100 نمرەمان دانابوو، هەر بۆ نموونە، نمرەكانی شیعر، دابەشكرابوون بەسەر: داهێنان، زمان، پاشخانی ڕووناكبیریی شاعیر، لاساییكردنەوە، خەیاڵ و فەنتازیا، سەبك و داڕشتن...هتد ئەمانە هەر یەكە و نمرەی خۆی هەبوو، نمرەكانیش چوونیەك نەبوون، ناوی نووسەر لە بابەتەكە دەكرایەوە و ژمارەی تایبەتی نهێنیی بۆ دادەنرا، بە شێوەی تاك تاك پەیوەندیم بە هەڵسەنگێنەران دەكرد بۆ ئەنجامدانی كارەكە، دەبوو هەڵسەنگێنەران یەكتری نەناسن، دیارە هەر ئیستمارەیە و بە جۆرێكی جیاواز لەوی تر، ڕێكدەخرا.

دوای تەواوكردنی كاری هەڵسەنگاندنەكان لە شوێنێك لەگەڵ داوەرەكان كۆدەبووینەوە بۆ تاوتوێكردنی نمرەكان و ڕێكخستنی لیست و دەستنیشان كردنی یەكەم و دووەم، بیرمە جارێك لە (دۆندرمەخانەی تابان) لەگەڵ قوبادی جەلیل زادە و لەتیف هەڵمەت و سەلاح محەمەد كۆبوونەوەمان كرد و ئەنجامەكانمان دیاری كرد، دیارە لەبەر ئەوەی ئیشەكە بە نهێنی بڕوات، لە بنكە ئەو جۆرە كۆبوونەوانەمان نەدەكرد، چونكە چاوی هاوبەشیكاران ئێجگار بەسەرمانەوە بوو، دەبوو داوەرەكان ئیمزا لەسەر ئیستمارە و لیستەكان بكەن و ئەم كارەش هەر وەك تاقیكردنەوەی بەكالۆری دەهاتە پێش چاوم، ئەم گرنگیدانەش بە كارەكە، پەیوەندیی بە ئەهمییەتی ماددی و مەعنەویی پاداشتەكانەوە هەبوو.

بەم هەموو نهێنی و دڵەڕاوكەیە و جاروبار نهێنی لەلایەن داوەران یان چاوە تیژەكانەوە ئەدركا و تووشی كێشمەكێش دەبووین، لەم بوارەدا بەشی كتێبێك بیرەوەریی سەیر و سەمەرەم هەیە!! سەبارەت بە پڕوپاگەندە بۆ فێستیڤاڵ، ئێمە بەر لە دوو مانگ بە ڕێگای ڕاگەیاندنە فرەكانەوە، بەرواری فێستیڤاڵمان ڕادەگەیاند و داوامان لە نووسەران دەكرد بۆ هاوبەشی و بە گەرمیش داوامان لە نووسەرانی كوردستانی خۆرهەڵات دەكرد كە بەدەم بانگەوازەكانمان بێن، ئەوەی كە هەستمان پێ كرد هاوبەشیكردنی كوردستانی خۆرهەڵات چ بە ئامادەبوون، چ بە نووسین كەم بوو، دوای تاوتوێ كردنی هۆكاری كەم ئامادەبوونی، بۆمان دەركەوت كە لەبەر كێشەی تایبەت و نەساچانی پەیوەندیی برادەران، بەشێك لە داوەتنامەكانی بنكە هەر ناگاتە دەست خاوەنەكانیان و بەشێكیان بەر لە دوو سێ‌ ڕۆژی دەست پێكردنی فێستیڤاڵ دەگات!! بۆ چارەسەری ئەم كێشە هونەری و كۆمەڵاتییە نەخوازراوە، بە ڕاوێژكردن لەگەڵ كاك مەلا بەختیار و هەڵسەنگاندنی حاڵەتەكە، گەشتینە ئەوەی كە بەندە و كاك عەبدوڵڵا تاهیر بەرزنجی لە سەرەتادا بەڕێكەوین بۆ ئێران، بۆ تەبلیغاتی پێش وەختی فێستیڤاڵی گەلاوێژ، هەر لە كرماشانەوە هەتا سنە و مەریوان و سەقز و مەهاباد و بۆكان گەڕاین، ڕووبەڕوو داوەتنامەكانمان دەگەیاندە میوانەكان، جگە لەوەش هێڵێكی پەیوەندیمان ڕێكخست، واتە هەر شارە و بە ڕێگای یەكێكی دیاریكراوەوە، بەرهەمەكان بێنێتە كرماشان و تەسلیم بە كاك (ئازادی مارف ئاغا گەڵاڵی) بكرێت و ئەویش بیگەێنێتە دەست بنكەی گەلاوێژ، كاك ئازادیش جوامێرانە كارەكەی ڕاپەڕاند، ئەو فێستیڤاڵە زۆرترین كەس هاوبەشیی لە چالاكییەكانی بنكەدا كرد، بەندە و كاك عەبدوڵڵا بۆ ئەرك و مەسرەفی ئەم سەفەرە دوور و پڕ ئەنجامە، یەكی 200 دۆلارمان وەرگرت. لەبەر كەمیی بودجەكەمان لە (سنە) چەند شەوێك لە ماڵی برای خۆشەویست كاك (شێخ محەممەدی شێخ حەمەساڵح) ماینەوە كە خزمی نزیكی كاك عەبدوڵڵا تاهیر بوو، لە مەریوانیش لە ماڵی (عیزەت بەگی عەلی بەگی جاف) ماینەوە كە خزمی بەندە بوو، لە مەهابادیش شەوێك لە ماڵی هاوڕێم كاك (ئەحمەد بەحری) ماینەوە، دیارە مەبەستی سەرەكیی بەندە و كاك عەبدوڵڵا بە تەنیا و تەنیا خزمەتی بنكە و فێستیڤاڵا بوو.