Photografy.png

پێشانگا‌یه‌کی گه‌وره‌ی فۆتۆگرافی دەکرێتەوە

وا بڕیاره رۆژى 12/11/2019 پێشانگا‌یه‌کی گه‌وره‌ی فۆتۆگرافی له‌ مۆزه‌خانه‌ی ئه‌منه‌سووره‌که‌ له‌ شارى سلێمانی بۆ جۆى لۆرانس بکاته‌وه‌ و بۆ ماوه‌ی (9) رۆژ به‌رده‌وام بێت، هاوکات لەگەڵیدا وۆرکشۆپێکیش بۆ فۆتۆگرافه‌رانی ناوخۆی کوردستان ده‌رباره‌ی فۆتۆگرافیی پۆرترێت ئەنجام دەدرێت.

جۆى لۆرانس ده‌رباره‌ی جارێکی تر سه‌ردانیکردنی کوردستانی باشوور و کردنه‌وه‌ی پێشانگه‌که‌ی له‌ شوێنێکی وه‌ک مۆزه‌خانه‌ی ئه‌منه‌سووره‌که‌دا بۆ مێدیاکان وتویەتى: "جێی شانازییه‌ که‌ ئه‌م وێنانه‌ ده‌هێنمه‌وه‌ بۆ شوێنی ره‌سه‌نی خۆیان- ئه‌و نیشتمانه‌ی تێیدا گیراون- کوردستان. به‌و دیواره‌ کۆنانه‌ی که‌ یه‌که‌ هه‌واڵگرییه‌کانی سه‌دام رۆژێک له‌ رۆژان کورد و عێراقییه‌کانیان پێ ئه‌شکه‌نجه ‌داوه‌، ئێستا وێنه‌ی ئه‌م شه‌ڕڤانه‌ قاره‌مانانه‌ی پێدا هه‌ڵده‌واسرێن که‌ به‌رده‌وامن له‌ رووبه‌ڕووبوونه‌وه‌ی دیکتاتۆره‌کانی سه‌رده‌می ئێستامان. هه‌ر گرووپ و کۆمه‌ڵه‌یه‌کی سته‌ملێکراو که‌ رووبه‌ڕووی ئه‌و توندوتیژییه‌ وه‌ستاونه‌ته‌وه‌ که‌ له‌ دژی ئه‌وان به ‌کار هێنراوه‌، له‌ لایه‌ن چه‌وسێنه‌ره‌وه‌ به‌ تیرۆریست ناوزه‌ند کراون بۆ ئه‌وه‌ی نامرۆڤانه‌ ده‌ریان بخات. شه‌ره‌فمه‌ندم که‌ روخساری مرۆڤانه‌ی ئه‌م که‌سانه‌تان له‌ جه‌رگه‌ی ناکۆکییه‌کانه‌وه‌، به‌ هاوبه‌شی له‌گه‌ڵ ئاژانسی مێترۆگرافی و کتێبخانه‌ی په‌یک پێشان ده‌ده‌م".

وا بڕیاریشە ته‌واوی داهاتی پڕۆژه‌که‌ بۆ رێکخراوی (هه‌یڤا سوور) ‌بێت، که‌ رێکخراوێکی نێوده‌وڵه‌تییه‌ و یارمه‌تیی ئه‌و که‌سانه‌ ده‌دات که‌ به‌ هۆی په‌لاماره‌که‌ی تورکیا بۆ سه‌ر رۆژئاڤا ئاواره‌ بوون. له‌ دواهه‌مین رۆژی پێشانگه‌که‌یش مه‌راسیمێکی بڵاوکردنه‌وه‌ی کتێبه‌که‌ له ‌لایه‌ن کتێبخانه‌ی په‌یک له‌ هه‌مان شوێن به‌ ئاماده‌بوونی جۆوی لۆورێنس ساز ده‌کرێت.

پێشتریش جۆى بەهۆى کتێبی ئێمه‌ له‌ ئاگره‌وه‌ هاتووین توانى خه‌ڵاتێکی جیهانی به‌ده‌ستبهێنت، دواى ئەوەى لەلایەن رێکخراوی لوسی براوهی خهڵاته نێودهوڵهتییهکانی فۆتۆگرافیی (IPA) پێى بەخشى.


ئەم بابەتە 84 جار خوێندراوەتەوە