بە بۆنەى کۆچى دوایى هونەرمەندى کورد (ئاسۆ عومەر سوارە) جێگرى سەرۆکى بنکەى روناکبیریى گەلاوێژ، د. ڕێواز فایەق سەرۆکى پەرلەمانى کوردستان پرسە نامەیەکى راگەیاند، ئەمە دەقەکەیەتى:

بەناوی خوای بەخشندەو میھرەبان

بەڕێزان کەسوکار و خانەوادەی ھونەرمەند و میدیاکار ئاسۆی عومەر سوارە

بەڕێزان سەندیکای ھونەرمەندان...

بەداخ و پەژارەیەکی زۆرەوە ھەواڵی مەرگی لەناکاوی ھونەرمەندی دیاری شاری سلێمانی و کوردستانمان پێگەیشت، بە کۆچی دوایی ھونەرمەند ئاسۆی عومەر سوارە کەلێنێکی گەورە کەوتە نێو میدیاو ھونەری کوردی، ھونەرمەند لەماوەی ژیانیدا خاوەنی بەرھەم گەلێکی جوان و ناوازە بوو، ناوێکی گەورەو ئەستێرەیەکی درەوشاوەی بواری نواندن بوو، بۆ هەمیشە ڕۆڵی هونەرمەند لە بەرهەمەکانی (گەردەلول) و (ژانی گەل) و بەرنامەی (وێنەکانی دوێنێ) لە یادەوەریماندا دەمێنێتەوە..

لەخوای گەورە داواکارین سەبووری مامۆستا عومەر و کەسوکار و بنەماڵە بەڕێزەکەیان و ھونەرمەندان بدات، و خوالێخۆشبووش بە بەھەشتی بەرینی خۆی شاد بکات.

انا للە وانا الیە راجعون

د. ڕێواز فایەق

سەرۆکی پەرلەمانی کوردستان

٣٠/١٢/٢٠١٩