Xan.jpg

2020 ساڵی وەبەرهێنانی پڕۆژەی مەزنی سینەماو گەشتیارییە

سینەمەکار و نوسەرى کورد هاوار مستەفا خان لە واڵى تایبەتى خۆى لە تۆڕى کۆمەڵایەتى فەیسبوک چەند پەیڤێکى بۆ ساڵى 2020 بڵاوکردۆتەوە، کە ساڵى وەبەرهێننانى پڕۆژەی مەزنی سینەماو گەشتیاریى دەبێت.

لە دەسپێکى پەیڤەکەیدا نوسیویەتى: "لە بەراییدا سەری رێزو نەوازش بۆ پاکڕەوانانی کوردو کوردستان و گەلانی ستەم لێکراو دادەنوێنم، دروود بۆ گیانی هاوڕێیان و هەڤالان، ئەوانە لە پێناوی خاک و خەڵک و خوای خۆیان گیانیان بەخشی. درود بۆ گیانی پاکی ئەو هاوڕێیانەی لە کاروانی تێکۆشیندا بەبێ ویستی خۆیان بەجێیان هێشتین.. هونەرمەند ئاسۆ عومەر سوارە دوایین هاوڕێ و هونەرمەندو میدیاکاری سەرکەوتوو بوو کۆتایی بە ساڵی 2019 هێناو لەگەڵماندا نەهاتە نێو ساڵی نوێ کە ٢٠٢٠ بەو هێزو گڕوتینەی سوارەی ئەزیز، ئومێد دەکەینە هەوێنی سەرخستنی پڕۆژە مەزنەکان.

رەوانشاد کاکە ئاسۆ لە سێ دانیشتن و گەنگەشەی پرۆژەی "یەڵماز گونەی" بە سەر بادان و سەرسامیەوە دەیگووت: ئەو پڕۆژەیە زۆر گەورەیە زۆۆۆۆۆر..".

هەروەک باسى پڕۆژەی (کۆمەڵگەی یڵماز گونەی سینەما و گەشتیاریی) کردووە کە لەمساڵەدا بە سازدانی پانێڵێکی گەورە دەست پێدەکرێت و پێشکەشی روحی هونەرمەند و میدیاکار (ئاسۆ عومەر سوارە) دەکرێت.

لە کۆتایشدا نوسیویەتى: "پێویستە ئەوە بڵێم؛ لەنێو ئەوجی ناخۆشی و نەهامەتیدا دەبێ ئومێد و متمانە و باوەڕ دروست بکەین و بە گەشبینیەوە بڕوانینە ئایندە و ئەمساڵ بکەینە ساڵی وەبەرهێنانی مەزن بۆ هەر بەهرەمەندو داهێنەرێک لەهەر بوارێکی هونەریی کۆمەڵایەتی ئابوریی سیاسییدا.. لەم سالەدا دوو پەیامی دیکەمان ماوە ئاڕاستەی "هاووڵاتیانی کوردو کوردستان" و" کۆمەڵگەی نیودەولەتی" بکەین، بەمەش دوو پەیامەکە دەبنە تەواوکاری هەرسێ پەیامەکەی لە ساڵی رابردوودا ئەڕاستەی" حکومەت و سەرماداران و هونەرمەندان"مان کرد".


ئەم بابەتە 457 جار خوێندراوەتەوە