Xalwz.jpg

رۆمانی پارچەیەک خەڵوز بڵاوکرایەوە

رۆمانى پارچه‌یه‌ک له‌ خه‌ڵوز دووه‌م به‌رهه‌مى نوسه‌ر ئاسۆ فارس حارس له‌ دەسپێکى ساڵى نوێدا بڵاوکرایه‌وه.

ئاسۆ فارس له‌ لێدوانێکى تایبه‌تیدا بۆ سایتى گەلاوێژ سەبارەت بە ناوەڕۆکى رۆمانەکە ئاماژەى بۆ ئەوە کرد، کە رۆمانه‌که‌ کۆمه‌ڵایه‌تییه‌ و چیرۆکێکى ڕاسته‌قینه‌ى کوردییه‌ و قۆناغه‌ هه‌ستیاره‌کانى گه‌لى کورد له‌ ساڵى 1996 تاکو 2003ى کاتى روخانى رژێمى به‌عس له‌ خۆ گرتووە، که‌ به‌گشتى ڕۆمانێکى فره‌ ره‌هه‌نده‌ و خه‌تێکى گشتى تیایه‌ که‌ ئه‌ویش باس له‌ عه‌شق و خۆشه‌ویستى خێزانێکى کوردى ده‌کات، چۆن به‌ قۆناغه‌کانى ژیاندا تێپه‌ڕیون که‌ ئه‌ویش پۆلێن کراوە بۆ چه‌ند به‌شێک، چونکه‌ له‌ناو ئه‌و بابه‌ته‌ کۆمه‌ڵایه‌تییه‌دا چه‌ند لایه‌نێکى سیاسیى تێدا جێى کراوەتەوە.

نوسەر زانیارى وردترى لەسەر رۆمانەکە بۆ خوێنەرانى گەلاوێژ باس کردووە، هەروەک دەڵێت: "پارچەیەک خەڵوز، یادەوەری کەسێکە لە چینەکانی خوارەوەی کۆمەڵگای کوردی، ئەو چینەی هەڵگری مانا جوانەکانی ژیانە لەهەر کۆمەڵگایەکدا، ئەگەر کارەسات و بەسەرهاتەکانی ناو ئەم بەرهەمە خەیاڵی نووسەر یان لە ڕاستیدا بیرەوەریی نووسەر خۆی بێت جیاوازیان نییە، ڕەنجی ڕۆمانی پارچەیەک خەلوز، ئاشکراکردنی هەموو ئەو دیاردە و هۆکاری دیاردانەن کە کۆمەڵگا لە ئاستێکی نزمدا دەیانبینێ،  دیاردەی نووسینی ڕۆمان دیاردەیەکی شارستانییە، هەستکردنە بە قوڵبونەوە و کرانەوەی عەقڵی هەر کۆمەڵگایەکەوە، خودی سەرکەوتن لەو خاڵەوە دەست پێدەکات کە نووسەر دەزانێت، دەبێت هەمەلایەنە و گشتگیر لە ژیان بڕوانێت، بۆیە پارچەیەک خەلوز سەرەتایەکی جوانە، دژ بە زوڵم و توندو تیژی و هەموو ئەو نادادپەروەریانەی دەکرێن بۆ پاساو هێنانەوەی دژی مرۆڤ".

رۆمانى پارچه‌یه‌ک  له‌ خه‌ڵوز له‌سه‌ر ئه‌رکى وه‌زاره‌تى رۆشنبیرى لە دووتوێى 310 لاپەڕە لە چاپخانەی کارۆ به‌ چاپگه‌یه‌ندراوه و ئێستا لە کتێبخانەکانی سلێمانی و جەمال عیرفان لە شاری سلێمانی، ناوەندی دەیالۆگ لە کەرکوک، سیروان لە هەولێر، ێۆفیا لە کۆیە دەستدەکەوێت.

ئاسۆ فارس لەچەند دێرێکدا:

- ناوى تەواوى: ئاسۆ فارس حارس.

- پیشەى ئەدەبى: رۆماننوس و شاعیر.

- له‌ رۆژى 10/3/1981 له‌ شارى سلێمانى له‌ دایک بووه.

- خوێندنى سەرەتایى و ناوەندى لە شارى سلێمانى تەواوکردووە.

- له‌ ساڵى 1998 ده‌ستى به‌ نوسین کردووه‌.

- لە ساڵى 2000 یەکەم دەقی شیعری بڵاوکردۆتەوە.

- لە ساڵى 2015 بووەتە ئه‌ندامى لقى سلێمانی یه‌کێتى نوسه‌رانى کورد.

- چه‌ندین بابه‌تى شیعرى و ئه‌ده‌بى له‌ رۆژنامه‌ و گۆڤاره‌کاندا بڵاوکردۆتەوە.

- لە چەندین ڤێستیفاڵى نێوخۆیى بە چیرۆک و شیعر بەشدارى کردووە.

- چەندین کۆڕی شیعری لە شار و شارۆچکەکانی کوردستان سازکردوە.

­ خاوەنی چەندین خەڵاتی ڕێزلێنانە.

دوو بەرهەمى چاپکراوى هەیە:

- ئەوینێک لە سەراب، رۆمانە شیعر، 2005.

- پارچه‌یه‌ک له‌ خه‌ڵوز، رۆمان، 2020.


ئەم بابەتە 253 جار خوێندراوەتەوە