Ata.jpg

شاعیرێک کە بەبێ دەنگی تەمەنێکی لەناوماندا بەڕێ کرد

ئەمڕۆ یەک شەممە (١٩ - ١ - ٢٠٢٠) کاتژمێر (٢.٣٠) مەراسیمی بڵاوکردنەوەو واژۆکردنی دیوانە شیعری (زەمانی بزربوو)ی فاتیح عیزەدینی شاعیر. شاعیرێک کە بەبێ دەنگی تەمەنێکی لەناوماندا بەڕێ کردووەو وەک پێویست ئاوڕی لێ نەدراوەتەوە، لە کاتێکدا خاوەنی کۆمەڵێک شیعری جوانە. لێرەوە دەستخۆشی لە بەرێز کاک عەتا محەمەد خاوەنی (چاپخانەی کارۆ) دەکەم، کە بڕیاری داوە ساڵانە لە یادی دامەزراندنی چاپخانەکەیدا کتێبێک بۆ نوسەرێک چاپ بکات و داهاتی کتێبەکە بۆ خاوەنی کتێبەکە بێت و ئەم ساڵ ئەم دیوانەی چاپ کردو ئەم مەراسیمەی بۆ رێکخست کە تیایدا بەڕێزان (طیب جبار و م. عەزیز بلکیانی و کاک ژوان پێنجوێنی و .... هتد) لەسەر ئەزموونی شیعری فاتیح عیزەدین قسەیان کردو دواتریش شاعیر یەکێک لە شیعرەکانی خۆی بۆ ئامادەبووان خوێندەوەو لە کۆتاییدا لەلایەن شاعیری خۆشەویست (لەتیف هەڵمەت)ەوە خەڵاتی رێزلێنانەکە پێشکەش بە شاعیر کرا.

ئەمەش یەکێک لە شیعرەکانی ناو دیوانەکەی فاتیح عیزەدینە:

....... نا نا نابارێ.....
ناخم تاریکەو ژیان لێڵ بووە وا بۆ ئێجگاری
رەشایی کشا بەسەر رۆشنایی رۆژەکانمدا
ناخم تاریکەو تارمایی شەو هات
تروسکەی بڕی لە چاوانمدا
هەتاوم ونەو پەڵەیەکی شووم بەری تەنیوە
ئاخ پاییزئاسا خەزان لێی داوم
ئاهم زەرد بووە
رەنگی روخسارم تەواو پەڕیوە
* * *
شیعریش وەک جاران بە بیابانی خەما نابارێ
بەسەر هەرێمی بیرکردنەوەما
بەسەر دەریاچەی ئەشقی چاوانیا
بەخوڕ نابارێ
بەخوڕ نابارێ
نا نا
نابارێ

لە واڵی تایبەتی د. محەمەد تاتانی وەکخۆی بە سوپاسەوە وەرگیراوە...


ئەم بابەتە 72 جار خوێندراوەتەوە