Miran_Ali.jpg

سەبارەت بە 27 ملیۆن دینارەکەی میران عەلی رونکردنەوە دەدرێت

بەڕێوەبەری گشتی ڕۆشنبیری و هونەری سلێمانی سەبارەت بە (27) ملیۆن دینارەکەی میران عەلی ڕوونکردنەوەیەکی بڵاوکردەوە.

بابەکر دڕەیی بەڕێوەبەری گشتی ڕۆشنبیری و هونەری سلێمانی لە واڵى تایبەتى خۆى لە تۆڕى کۆمەڵایەتى فەیسبوک رونکردنەوەیەکى سەبارەت بە (27) ملیۆن دینارەکەی هونەرمەند میران عەلی بڵاوکردەوە، هەروەک لە رونکردنەوەکەدا هاتووە، "لەم ڕۆژانەدا بەشێک لە هاوڵاتیان و زۆرێک لە پەیج و سایتە حزبیەکان کە بە بەرنامەی سیاسی هەڵدەسوڕێن، بە گەرمی باسیان لە تەرخانکردنی بڕە پارەیەک کرد بۆ هونەرمەند میران عەلی، لەو ناوەدا هەندێک لە پەیج و سایتەکان ناوی ئێمەشیان خستە ژێر ڕەخنەوە و ناڕاستەوخۆ باسیان لە جیاوازی و ناعەدالەتی کرد لە بەڕێوەبردنی چالاکیە هونەریەکاندا".

دەقی ڕوونکردنەوەکە:

رونکردنەوەیەک بۆ ڕای گشتی سەبارەت بە داواکاری هونەرمەند میران عەلی.

لەم ڕۆژانەدا بەشێک لە هاوڵاتیان و زۆرێک لە پەیج و سایتە حزبیەکان کە بە بەرنامەی سیاسی هەڵدەسوڕێن، بە گەرمی باسیان لە تەرخانکردنی بڕە پارەیەک کرد بۆ هونەرمەند میران عەلی، .. لەو ناوەدا هەندێک لە پەیج و سایتەکان ناوی ئێمەشیان خستە ژێر ڕەخنەوە و ناڕاستەوخۆ باسیان لە جیاوازی و ناعەدالەتی کرد لە بەڕێوەبردنی چالاکیە هونەریەکاندا، بۆیە بە پێویستی ئەزانین ئەم ڕونکردنەوەیە بخەینە بەردەم ڕای گشتی تا هیچکەس هەوڵنەدات زەینی خەڵک بەلاڕێدا بەرێت:

یەکەم: بەڕێوەبەرایەتی گشتی ڕۆشنبیری و هونەری سلێمانی و سەرجەم بەڕێوەبەرایەتیەکانی وەزارەتی ڕۆشنبیری لە کاتی ئێستادا، دەسەڵاتی ئەوەیان نیە هیچ بڕە پارەیەک بۆ هیچ هونەرمەندێک سەرف بکەن ، بۆیە ناچارن بۆ گشت داواکاریەکان بگەڕێنەوە بۆ وەزارەت، وەزارەت خۆی، بەپێی هەڵسەنگاندنی لیژنەکانی، بڕیار لەسەر داواکاریەکە ئەدات بە قبوڵکردنی یان ڕەتکردنەوەی.

دوەم: هەنێ لە هونەرمەندان پێداگری ئەکەن گوایە کارەکانیان لە سلێمانی باش بەڕێوەناچێت و جەخت دەکەنەوە داواکانیان بەرز بکرێتەوە بۆ وەزارەت لە هەولێر، ئێمەش ناچارین بۆ ڕێزگرتن لەم داوایەو پاراستنی بێلایەنی، ڕێز لەم داوایە بگرین و نامەی ڕەسمی ئاراستەی وەزارەت بکەین.

لەم ئاقارەدا داوامان لە سەرجەم هاوڵاتیانە کە بەرچاویان ڕونبێت و داواشمان لە بەڕێوەبەرانی سایت و پەیجە سێبەریە حزبیەکان ئەوەیە کە مەسەلەکان بەلاڕێی حزبایەتیدا نەبەن و، بیر لە دەزگاو دامەزراوەی دەوڵەتی و مۆدێرن بکەنەوە نەک داماڵینی یان بارکردنی کەسە حکومیەکان لە لێپرسراوەتی ڕەسمی سەرشانیان بە مەبەستی چەواشەکاری.

بابەکر دڕەیی

بەڕێوەبەری گشتی ڕۆشنبیری و هونەری سلێمانی


ئەم بابەتە 119 جار خوێندراوەتەوە