Hawal.jpg

لەمساڵدا چەندین فێستیڤاڵى گەورە بەڕێوەدەچن

لە شارەکانى هەرێمى کوردستان بۆ ساڵى 2020 چەندین فێستیڤاڵى گەورە بەڕێوەدەچن.

سەرلەبەیانى رۆژى 2/2/2020 لە بەڕێوەبەرایەتی گشتى ڕۆشنبیری و هونەرى سلێمانی، (محەمەد حەمە سەعید)، وەزیری رۆشنبیری و لاوانى حکومەتی هەرێمی کوردستان لە کۆنفڕانسێکی ڕۆژنامەوانیدا ڕایگەیاند، کە وەزارەتی ڕۆشنبیری ئەرکی (13) فێستیڤاڵی گەورەى لە سەرتاسەری هەرێمی کوردستان لە ئەستۆ دایە، کە (2) فێستیڤاڵی گەورە لە شارى سلێمانی بەڕێوەدەچێت.

وتیشی، یەکێک لە فێستیڤاڵەکان لە مانگی (10)ی ئەمساڵدایە، کە فێستیڤاڵێکی نێودەوڵەتییە و بەبۆنەی بونی سلێمانی بە یەکێک لە شارە داهێنەرەکان، ئەویتریشیان لە مانگی نیسانی ئەمساڵە هەفتەی سلێمانی بەڕێوەدەچێت، کە چالاکی هونەری و کلتوری ڕۆشنبیری جیاجیای تێدا نمایشدەکرێت.

ئاماژەی بەوەشکرد، بەڕێوەبەرایەتی گشتى ڕۆشنبیری و هونەرى سلێمانی سەرپشک کراوە بۆ ئەوەی هەر لە ئێستاوە ئامادەکاری بۆ سازدانیان ئەنجام بدات و بودجەکەشی وەزارەتی ڕۆشنبیری دابینی دەکات.

ئەم لێدوانەى وەزیرى رۆشنبیرى حکومەتى هەرێمى کوردستان لە کاتێکدایە، جگە لەو دوو فێستیڤاڵەى باسى کرد، بنکەى روناکبیریى گەلاوێژ لە ناوەڕاستى مانگى (4)ى ئەمساڵدا بیست و سێیەمین فێستیڤاڵى گەلاوێژ ئەنجامدەدات، کە یەکێکە لە فێستیڤاڵە گەورە و بەرچاوەکان، کە ساڵانە بەبەردەوامى لە شارى سلێمانى ئەنجامدەدرێت، ئەمساڵیش لەژێر دروشمى (ئاسۆ دەدرەوشێتەوە) وەک ڕێزلێنانێک لە هەوڵ و ماندووبونى هونەرمەندى کورد (ئاسۆ عومەر سوارە) جێگرى سەرۆکى بنکەى روناکبیریى گەلاوێژ بەڕێوەدەچێت.


ئەم بابەتە 88 جار خوێندراوەتەوە