Asonis.jpg

ژاك دێریدا

ئەدۆنیس - شوان ئەحمەد کردویەتی بە کوردی

(1930- ئۆكتوبەری 2004)

 جارێكیان بە (ژاك دێریدا)م وت:

-هەرچییەكت نووسیوە، یان لانی كەم هەموو ئەو شتانەی كە من خوێندوومنەتەوە، دەریدەخەن وەك دنیابینی و زمان و ستایل، بەپلەی یەكەم تۆ شاعیریت.

ئایا بەشێوەیەكی تایبەتی و دیاریكراو شیعرت نووسیوە؟

بەزەردەخەنەیەكەوە وەڵامیدامەوەو تی:

- لەتافی لاویدا شیعرم نوسیووەو تائێستاش هەندێ‌ لەو شیعرانەم ماوە، بەڵام بیر لەبڵاوكردنەوەیان ناكەمەوە.

- نازانم بۆ پیموایە تۆ لەسەر شیعر نووسین بەردەوامیت؟

سەرلەنوێ‌ پێكەنی و وتی:

- لەڕاستیدا تائێستاش ناوبەناو شیعر دەنووسم. بەڵام بەكەمی و بەبێ بەرنامە ئەو كارە دەكەم.

*

زوو زوو یەكتریمان دەبینی و پێكەوە لەچوارچێوەی (پەرلەمانی نووسەران)دا كارمان دەكرد. لەناو ئەو پەرلەماندا لەگەڵ (پییەر بۆردیۆ)دا گیر و گازێكی زۆرو ململانێیەكی شاراوە، بەڵام توند لەنێوانیاندا هەبوو.

(كریستیان سالمۆن) بەدڵفراوانی و رێكوپێكی و بەخشندەیی خۆی، ئەو گرژی و ناكۆكیانەی خاو دەكردەوە.

سڵاو ئەی هاوڕێ‌.

هەردووكمان لەیەك ساڵدا لەدایكبووین (ساڵی 1930). سەروەختێك هەواڵی مەرگی تۆم بیست (شەممە نۆی ئۆكتوبەری 2004)، لەفڕۆكەخانەی فرانكفۆرت بووم و خۆم بۆ سەردانی شاری رۆما ئامادە دەكرد، بەمەبەستی بەشداریكردن لەفێستیڤاڵی شیعری (رۆما بویزیا- رۆمای شیعر) كە (نانی بالیسترینی) شاعیر سەرپەرشتی دەكات.

لەوێ‌ (ناتان زاك)م بینی كە هاوڕێی هەردووكمانەو ئەویش وەك من و تۆ لەساڵی 1930 هاتۆتە دنیاوە. خوازیاری ئەوە بووین (میشێل دۆگی)ی شاعیر كە هاوڕێی هەر سێكمانەو وەكی ئێمە ئەویش لەساڵی 1930 لەدایكبووە، لەگەڵماندا بووایە. قەشەنگترین شتێك كە لە دەستمان بێت دەرهەق بەمردن ئەنجامی بدەین ئەوەیە، هاوڕێیەتی و دۆستایەتیمان لەیاد بێت و شیعر بخوێنینەوە.

ئێمە بەو جۆرە یادی هاوڕێیەتی تۆمان بەرز راگرت و ئەو ئێوارە شیعرییەی كە من و (ناتان زاك) پێكەوە لەسیانزەی ئۆكتەبەر لەڕۆما سازمانكرد، پێشكەشی تۆمانكرد.

ئەو شەوە لەڕۆما باران بەلێزمە دەباری.


ئەم بابەتە 100 جار خوێندراوەتەوە