cenema.jpg

سینەما بەتامی گێلاس

شوان ئەحمەد

لەنێو ڕۆشنبیریی عەرەبیدا، هەوڵی نووسەر و ڕەخنەگرانی لوبنانی و بەحرەینی (ئیبراهیم ئەلعەریس و ئەمین ساڵح)، لەبواری سینەما و فیلم و ناساندنی ئەكتەر و دەرهێنەر و سیناریستەكانی هونەری حەوتەم  بەخوێنەران و دەوڵەمەندكردنی كتێبخانەی عەرەبی، بەو سەرچاوانەی سەروكاریان لەگەڵ سینەما و سینەماكاراندا هەیە، لەبەرچاوەو توانیویانە چەندین كتێبی گرنگ و پڕ زانیاری بەردەستی خوێنەرانی ئەو بوارە بخەن.

ئەمین ساڵح لەماوەیەكی كەم و كورتخایەندا، چوار كتێبی دەربارەی چوار ناوی دیار و گەشاوەی هونەری حەوتەم بەچاپ گەیاندووە:

-ئەندرێ تاركۆفسكی

-تیۆ ئەنجیلۆ پۆلۆس

-ڤێرنەر هێرتسوگ

-عەباس كیاڕۆستەمی

(عباس كیارستمی.. سینما مطرزة بالبرا‌ءة) یەكێكە لەو كتێبە گرنگانەی زۆر شتمان لەسەر ژیان و بەرهەمەكانی ئەو هونەرمەندە ئێرانیە پێدەڵێت كەهەم ئەكتەر و دەرهێنەر و سیناریست بوو، هەم شاعیر و فۆتۆگرافەر و نیگاركێشیش بوو.

كتێبەكە چاپی یەكەمی ساڵی 2011، بەقەوارەی (365) لاپەڕە چاپ بووەو جگە لەپێشەكیەك، بەشێكی گرنگی تەرخانە بۆ تەواوی فیلمە درامی و دیكۆمێنتاریەكانی كیاڕۆستەمی، جگە لەخستنە ڕووی ژیاننامەکەی بەدوورو درێژی. بەشێكی دیكەی كتێبەكە، زۆربەی ئەو چاوپێكەوتنانەی لەخۆگرتووە كە كیاڕۆستەمی لێرە و لەوێ‌ ئەنجامی داون.

دوا بەشیش هەڵبژاردەیەك لەو وتارانەی تێدایە كەڕەخنەگرانی بواری سینەما، لەسەر بەرهەمەكانی كیاڕۆستەمی نوسیویانە. نمونەكانیان وەك: (جیلبیرتۆ پێرێز، لۆرا مولفی، جۆناسان ڕۆزنبۆم، ئەدریان مارتن، ڕۆلاندۆ كابوتۆ، جود فری شیشایەر).

ئەوانەی بینەری (تامی گێلاس و ماڵی دۆست لەكوێیە و لەنێو دار زەیتونەكان و كلۆز ئەپ)ن، بۆ زیاتر قوڵبوونەوەو ئاشنابوون بەژیان و بەرهەمە پڕ چێژو ماناكانی کیا ڕۆستەمی، ئەم كتێبەی ئەمین ساڵح باشترین كۆمەكیان پێدەكات و گرنگترین سەرچاوەیەكە لەو ڕووەوە.


ئەم بابەتە 47 جار خوێندراوەتەوە