kteb.jpg

بەشی بیست و هەشتەم: هەڵسەنگاندنی كتێبی سەرۆكی سەنگاپورە (من العالم الثالث إلی الأول)

مەلا بەختیار

(بەرژەوەندی تایبەتی، گەندەڵی‌ و هەلپەرستی، مۆرانەی تێكدانی هاوڕێیەتین)

سەرۆكی سەنگاپورە، بە تاقی تەنها ئەم سەركەوتنانەی بەدەست نەهێناوە. هاوڕێی راستگۆو پاكی هەبووە. پێكەوە پەیمانیان بردۆتە سەرو لە (30-40) ساڵدا، وڵاتێكی هەرە پێشكەوتویان بونیات ناوە. خیانەتیان لە یەكدی نەكردووە. گەندەڵ نەبون‌و گەندەڵیشیان سزا داوە. خەم‌و خەباتیان خزمەتی گەلەكەیان بووە. لەمبارەوە بەجوانی دەنوسێ‌:

"بەدڵنیاییەوە -من‌و هەڤاڵەكانم- برادەرو هەڤاڵی سیاسی (30-40) ساڵە بوین. بەشێكمان لە ئینگلتەرا بوین، وەكو خوێندكار، بیرمان لە سەنگاپورەو مەلایۆ دەكردەوە. پاشان گەڕاینەوە نیشتمان‌و تێكۆشاین متمانەی جەماوەر لەناو سەندیكای كرێكاران‌و پارتی گەل وەدەست بێنین. پابەندیمان بە پرسە هاوبەشەكانمان‌و لەنێوان خۆشماندا، قوڵ‌و پتەو بو".(ل257)

ئەم پرسە هاوبەشەو پەیوەندیه هاوڕێیەتیه پتەوە، كێو لەبن دێنێ‌. هیچ هێزێك ناتوانێ‌ تێكی بشكێنێ‌. كوت‌ومت وەكو سەرەتای دامەزراندنی كۆمەڵەو هەتا كۆتایی حەفتاكانی شۆڕشی نوێ‌ دێتەوە بیرم. كە تەنها بە پرسی هاوبەش‌و بیروباوەڕو هاوڕێیەتی راستەقینە، توانرا، رەوتی مێژوو بگۆڕین.
لە درێژەی ئەو باسانەدا، لەسەر هێزو لاوازی خۆیان دەڵێ‌:
"هێزو لاوازی خۆمان دەزانی، وەكو تیپێكی رێك‌وپێك كاری سەركەوتومان دەكرد. كاتێك، (پاسەوانە كۆنەكان) رێكدەكەوون، وەزیرەكانی تریش بەقسەیان دەكەن. پەیوەندیم لەگەڵ هاوڕێ‌ وەزیرەكانمدا بەهێز بوو، دەمتوانی بێ دوودڵی بۆچونی خۆم لەسەر وەزارەتەكانیان دەرببڕم".

لە درێژەی قسەكانیدا روونیدەكاتەوە كە:
"بەڕێوەبردنی حكومەت دوور نییە لە رابەرایەتی ئۆركسترا. هەرگیز سەرۆك وەزیران بەبێ‌ تیپێكی كاری كارامە، ناتوانێ‌ سەركەوتنی زۆر بەدەست بهێنێ‌. ئەمە لەكاتێكدا رابەری ئۆركسترا (پێیدەوترێ‌ مایسترۆ-نوسەر) پێویست ناكات ژەنیارێكی مەزنیش بێ‌. بەڵام دەشبێ‌ زانیاری لەسەر ئامێرە سەرەكیەكان هەبێ‌. ئامێرە سەرەكیەكان، سەرەتا وەكو كەمانچە، پاشان شیلۆ، ئینجا كلارنێت‌و كەرەنای.. پێویستە بزانێ‌ چییان لێ چاوەڕوان دەكات. هەوڵم دەدا باشترین وەزیر دیاری بكەم بۆ وەزارەتەكان، تایبەت وەزارەتی دارایی. دەست تێوەردانی من لە وەزارەتەكان تەنها لە كاروباری سیاسیدا بوو".(ل258)

كرۆكی ئەم بابەتە، پرسی هاوبەش‌و هاوڕێی گیانی بەگیانییە. رابەری گەورە، دەتوانێ‌ مایسترۆی سەركەتوی تیپەكەی بێ‌‌و لە هەورازو نشێودا، رابەرایەتی بكات. هەر كاتێك، هاوڕێ‌ راستەقینەكانی ئەركە سەختەكان، تێك بچن، یان بەرژەوەندی تایبەتی بەسەر خۆیاندا زاڵبكەن، هیچ بەربەستێك لەبەردەم تێكچونیان نامێنێ‌. بەرژەوەندی‌و گەندەڵی‌و هەلپەرستی، ترسناكترین مۆرانەی تێك‌وپێكدانی هاوڕێیەتی‌و حیزبایەتی‌و شۆڕشگێڕێتییە. زوو یان درەنگ، بەرژەوەندی تایبەتی زاڵبێ‌، تێكچونەكە روودەدات.. تەنانەت لەنێوان براكانیشدا!


ئەم بابەتە 45 جار خوێندراوەتەوە