Zhakaw.jpg

شاعیری بەناوبانگی کورد ناسر ئاغابرا کۆچی دوایی کرد

سەرچاوەکانى هەواڵ لە رۆژهەڵاتى کوردستان هەواڵى کۆچى دوایى شاعیرى بەناوبانگى کورد ناسر ئاغابرا (ژاکاو)یان بڵاوکردەوە.

بەپێى سەرچاوەکان، سەر لە ئێوارەى ئەمڕۆ یەکشەممە 5/4/2020 ناسر ئاغابرا ناسراو بە (ژاکاو) لە شاری مهابادی ڕۆژهەڵاتی کوردستان بە هۆی وەستانی دڵ گیانی لە دەستدا.

ژاکاوى شاعیر لە چەند دێرێکدا:

- ناوى تەواوى: ناسر ئاغابرا

- لە ساڵى 1968 لە گوندى بەردەڕەشانى شارى مهاباد لە رۆژهەڵاتى کوردستان لە دایکبووە.

- لە ساڵى 1971 لە تەمەنى (3) ساڵیدا بەهۆى نەخۆشیەوە هەردوو چاوەکانى لە دەستداوە.

- یه‌که‌مین ئه‌زموونی نوسینى شعرى دەگەڕێتەوە بۆ ئەوکاتەى خوێندکارى پۆلى چوارەمی سەرەتایی بووە و بە زمانی فارسی شیعرى خوێندۆتەوەو نوسیوە، بە تایبەت ئەو کاتەى کە ژیاننامە و شیعری سەعدی لە  وانەکانى ڕۆژانەیدا دەخوێند، هەر ئەوکاتە شیعرەکانى لە گۆڤاری (دانش ئامووز)، لە شارى مەهاباد بڵاویدەکردەوە هەر ئەمەش رۆڵێکی زۆری هەبوو لە هاندانی بۆ ئەوەى لەسەر نوسینى شیعر بەردەواک بێت.

- دەرچووى بەشى زمان و ئەدەبى فارسى زانکۆى مهاباد بووە.

- چەندین چیرۆک و شانۆنامەى نووسیووە.

- دەیان شێعری بەرزی نەتەوەیی نوسیوە و زۆرێک لە هونەرمەندان شیعرەکانى ئەویان کردووە بە گۆرانى.

- خاوه‌نی سێ دیوانی شیعره‌ به‌ ناوه‌کانی (تریفه‌ی ئاوات) و (که‌ژاوه‌ی دڵ) و (کۆلاره)‌.

 ژاکاوى شاعیر دەربارەى شیعر وتویەتى: "شیعر بەر لە هەموو شتێک قسەی دڵی خۆمە، من بۆ دڵی خۆم دەنووسم کە بەشێکە لە دڵی جەماوەر بەو شەرتەی کە بە ئاقارێکدا نەڕوا کە دڵی زۆربەی جەماوەر نەی‌هەوێ، هەروەها وەختێک دەنووسم کە دڵم بجووڵێ و چالاکی هەستم هەبێ. تەنیا شیعر نووسین دەتوانی ئارامم کاتەوە. بە باوەڕی من شیعر تەقینی ئاوات یان ڕەنجێکە کە لە ڕوحی مرۆڤدا پەنگی خواردوەتەوە لە ناکاو فەوەران دەکا، شاعیر دەبێ ئەو فەوەرانە کونترۆڵ بکا و ئامانجی پێ بدات.

ژاکاو خاوەنى چەندین دەقى شیعرییە، لەوانە (قەندیل و ڕۆحی کوردان)، کە شیعرى دووەمى بۆ هونەرمەند محەممەد ماملێ نوسیویەتى).

قه‌ندیل

قه‌ندیل ده‌ڵێ من سه‌ر به‌ ته‌مم، قه‌ندیلم
تا خێڵی کوڕانم ده‌گه‌نێ، هه‌ر دیلم

زۆر هه‌وری ده‌بابه‌م به‌ سه‌را هه‌ڵده‌ته‌قێ
زۆر تیری نه‌یاران له‌ دڵم هه‌ڵده‌چه‌قێ

قه‌ندیل ده‌ڵێ من سه‌ر به‌ ته‌مم، قه‌ندیلم
تا خێڵی کوڕانم ده‌گه‌نێ، هه‌ر دیلم

زۆر ده‌کشێ به‌ سه‌رما، سێبه‌ری داڵاشان
زۆر ده‌ڕژێ به‌ سه‌رما، په‌ڵه‌ خوێنی لاشان

زۆر هه‌وری ده‌بابه‌م به‌ سه‌را هه‌ڵده‌ته‌قێ
زۆر تیری نه‌یاران له‌ دڵم هه‌ڵده‌چه‌قێ

زۆر شه‌و به‌ برینداری له‌ خه‌و هه‌ستاوم
هه‌ر به‌رزه‌ قه‌ڵای کوردم و ڕاوه‌ستاوم

ئه‌و جۆگه‌له‌ ئاوه‌ی که‌ له‌ من ڕاده‌خووشێ
ڕۆڵه‌ی گه‌له‌ وه‌ک سوجده‌ له‌ بۆی ڕاده‌کشێ

کاتێک سه‌ری زامارێ له‌ کۆشی خۆمه‌
شه‌و تا کو به‌یان، بۆ کوڕی خۆم، لۆ لۆمه

هۆ دوندی که‌لیخانی ڕنووپۆشی به‌ سام
یادم که‌، له‌ ژێر هه‌وری ده‌بابان، حه‌به‌سام

دڵ که‌وتووه‌، هێزم نییه‌ بیلاوێنم
سه‌د ڕۆسته‌مه‌ کوژراوه‌ له‌ سه‌ر داوێنم

من باوکم و دڵ پڕ له‌ خه‌م و ئاواره‌
چوار خێڵی کوڕانی بێ به‌شم لێ دیاره

نه‌ورۆزی ڕه‌هایی و هه‌ڕه‌تی هاتی من
ڕۆڵه‌م ده‌وێ بینووسێ به‌ سه‌رهاتی من

قه‌ندیل ده‌ڵێ من سه‌ر به‌ ته‌مم، قه‌ندیلم
تا خێڵی کوڕانم ده‌گه‌نێ، هه‌ر دیلم

 ڕۆحی کوردان

(بۆ محەممەد ماملێ، وتراوە)

 فیدای سۆزی قەتار و لایەلایەت بم، ڕوحی کوردان
فیدای نەغمە و سکاڵای نایەنایەت بم، قەڵای مەردان

ئەوینداران دەگەڵ دەنگی بڵاوێنت دەناڵێن
دەبارێنن لەداخی نامرادی و دەستلەیەکبەردان

بڵاون خێڵی کوێستانچی لە مەڵبەندی موکریانا
قریوەی نایە لەم خاکە، قوورینگی وێڵ و سەرگەردان

جەفاکاری دەکات گەردوون لەسەر ئەم خاکە پیرۆزە
حەقیان نێ بچنە سەیری باغی شەقڵاوە، کراسزەردان

تەشیڕێسێکی وەک شیرین، خەشابی پێوەیە ئەمڕۆ
سەری قوربانی ئاڵای و دەچێتە ڕاوی نامەردان

هەوایەکم نییە ئوستاد خەمی خاکم لەدڵ دەرکا
سەبووری ئەو دڵم نایە، مەگەر بە گڕلەخۆبەردان

نەبوو مەوجێک فغانی دڵ نیساری عەڕشی باریکا
سەرم هەڵنایە تاوێکی لەبەر مەوجی خەم و دەردان


ئەم بابەتە 67 جار خوێندراوەتەوە