Anfal.jpg

ئەمساڵ فێستڤاڵی فیلمی سینەمایی‌ و دیکۆمێنتاری جینۆساید‌ و ئەنفالی نێودەوڵەتی بەڕێوەناچێت

وەزارەتی رۆشنبیری ‌و لاوانى حکومەتى هەرێمى کوردستان، بەبۆنەی سى و دووەمین ساڵیادی ئەنفالی گەلی کوردستان پەیامێکی بڵاوکردەوە، بەپێى پەیامەکە بڕیاربوو فیستڤاڵی فیلمی سینەمایی‌ و دیکۆمێنتاری جینۆساید‌ و ئەنفالی نێودەوڵەتی لە گەرمیان ئەنجام بدرێت، بەڵام بەهۆی کۆرۆناوە ئەنجام نادرێت.

لە پەیامەکەدا هاتووە: "32 ساڵ لەمەوبەر رژێمی دیکتاتۆری بەعس، هەموو توانای سەربازی خۆی بۆ قڕکردنی خەڵکی کوردستان لەناوچە ئازادکراوەکانی شۆڕشدا خستەگەڕ، لەو جوگرافیە بەرینەدا ژمارەیەکی زۆری دانیشتوانی مەدەنی دەستگیر کرد‌و دواتر لەگۆڕی بەکۆمەڵدا بەدڕندانەترین شێوە شەهیدی کردن، هەزاران گوندی خاپور کرد، رەز‌و باخ ‌و درەختی سووتاند، کانی‌و کارێزو سەرچاوەکانی ئاوی کوێر کردەوە، گۆرانی‌و مەقام ‌و رشتەکانی دیکەی هونەری ئەو ناوچانەی خنکاند، شوێنەوارەکانی تێکدا‌و سڕییەوە،سروشت ‌و مرۆڤ ‌و ژیانی هەموانی پێکەوە کوشت".

لە بەشێکى دیکەى پەیامەکەدا هاتووە: "ساڵانە لەیادی ئەنفالدا، وەزارەتی رۆشنبیری ‌و لاوان ‌و دامودەزگا هونەری ‌و کەلتورییەکانی دیکە، چالاکی هەمەرەنگیان ئەنجام دەدا‌و لەو رێگەیەوە رۆحی قوربانیان ئاسودە دەکرد. ئەمساڵیش بڕیار بوو چەندین چالاکی جۆرا‌و جۆر لەساڵیادی ئەنفالدا لەسەرانسەری هەرێمی کوردستاندا ئەنجام بدرێت. بڕیاری ئەوەش درابوو،(فیستڤاڵی فیلمی سینەمایی ‌و دیکۆمێنتاریی جینۆسای د‌و ئەنفال)ی نێودەوڵەتی لەمانگی نیسان لە گەرمیان ئەنجام بدرێت، بەهۆی ئەوەی پشکی شێری قوربانییەکانی ئەنفال لەو دەڤەرە خەباتگێڕەیە, بەڵام بەداخەوە بەهۆی بڵاوبوونەوەی ڤایرۆسی کۆرۆناوە نەتوانرا هیچ چالاکییەک ئەنجام بدرێ‌".


ئەم بابەتە 118 جار خوێندراوەتەوە