Razazy.jpg

هونەرمەند ناسر رەزازی لەسەر بڵابونەوەى وێنەیەکى روونکردنەوەیەکى بڵاوکردەوە

هونەرمەندى کورد ناسر رەزازى لە واڵى تایبەتى خۆى لە تۆڕى کۆمەڵایەتى فەیسبوک لەسەر بڵاوکردنەوەى وێنەیەکى رونکردنەوەیەکى بڵاوکردەوە.

لە رونکردنەوەکەدا هاتووە: " ماوەیەکە لەسەر تۆڕەکۆمەڵایەتییەکان، وێنەیەکی من و دوو کەسی دیکە، کە ھی پێنج یان شەش ساڵی لەمەو پێشە و لە ڕێستۆرانی یاقووت یان ھوتێل ئەلبورزی سلێمانی ھەڵگیراوە و ماوەیەکی زۆری بەسەردا تێپەڕیوە و ئێستا ئاغای جەلالیزادە لەسەر تۆڕی ئینتێرنێت دایناوە، هەرای ساز کردووە و لێکدانەوەی جیاوازیان بۆ کردووە. من وەکوو گۆرانیبێژێک ڕۆژانە لەگەڵ دەیان کەس وێنەم دەگیردرێ لە کوردستان وە هەروەها لە زۆربەی وڵاتانی تریش وە دوواتر بڵاو دەبێتەوە. کاتی وا هەیە زۆربەی زۆریان ناناسم و تەنیا لەبەر هەستی خۆشەویستی گۆرانیبێژێک کە زیاتر لە نیو سەدەیە خەبات دەکا بۆیە بە دەڵێکی پاکەوە وێنەیان لەگەڵدەگیردرێ و هەستی خۆشەویستی خۆیان بەرانبەر بە ئێمە نیشان دەدەن".

لە بەشێکى دیکەى رونکردنەوەکەیدا هاتووە: " من شانازی دەکەم کە زیاتر لە چل ساڵە خەباتی سیاسیی – ھونەریم کردووە لە دژی کۆماری ئیسلامی و هەرگیز پشتم لە گەلەکەی خۆم نەکردووە و نایکەم".

دەقى رونکردنەوەکە وەکخۆى:

ڕونکردنەوە

سەرەتا سڵاو خۆشەویستیەکی بێ سنورم هەیە بۆ تەواوی خۆشەویستانم، تکایە خۆشەویستان ئەم رونکردنەوەیە لە لای خۆتان (شەیر Share)ی بکەن با دۆست و دووژمن ڕاستیەکەی بزانێ کە ئێمە پشت لە نەتەوەکەی خۆمان ناکەین هەرگیز ئازیزان، هاوڕێیان، دۆستان و لایەنگرانی من، خەڵکی کۆڵنەدەری کوردستان!

ماوەیەکە لەسەر تۆڕەکۆمەڵایەتییەکان، وێنەیەکی من و دوو کەسی دیکە، کە ھی پێنج یان شەش ساڵی لەمەو پێشە و لە ڕێستۆرانی یاقووت یان ھوتێل ئەلبورزی سلێمانی ھەڵگیراوە و ماوەیەکی زۆری بەسەردا تێپەڕیوە و ئێستا ئاغای جەلالیزادە لەسەر تۆڕی ئینتێرنێت دایناوە، هەرای ساز کردووە و لێکدانەوەی جیاوازیان بۆ کردووە. من وەکوو گۆرانیبێژێک ڕۆژانە لەگەڵ دەیان کەس وێنەم دەگیردرێ لە کوردستان وە هەروەها لە زۆربەی وڵاتانی تریش وە دوواتر بڵاو دەبێتەوە. کاتی وا هەیە زۆربەی زۆریان ناناسم و تەنیا لەبەر هەستی خۆشەویستی گۆرانیبێژێک کە زیاتر لە نیو سەدەیە خەبات دەکا بۆیە بە دەڵێکی پاکەوە وێنەیان لەگەڵدەگیردرێ و هەستی خۆشەویستی خۆیان بەرانبەر بە ئێمە نیشان دەدەن. کاتێک لەسەر داوای ئەو دوو کەسە وێنەکە گیرا و ڕۆییشتن، ڕزگاری خۆشکەزام لەوێ بوو، لێم پرسی ڕزگار ئەم پیاوە کێ بوو، وتی خاڵۆ گیان ئەوە ئاغای جەلالیزادە بوو! بڕوام پێ بکەن ئەوە یەکەمجار بوو کە ئەو پیاوەم لەوێ بینی. بنەماڵەی منیش پشتیوانییان لە هیچ کەسێک نەکردووە بۆ هەڵبژاردن لە کۆماری ئیسلامیدا.

من شانازی دەکەم کە زیاتر لە چل ساڵە خەباتی سیاسیی – ھونەریم کردووە لە دژی کۆماری ئیسلامی و هەرگیز پشتم لە گەلەکەی خۆم نەکردووە و نایکەم.

لێرەدا حەز دەکەم نەک بۆ ئەو کەسانەی کە شتی ناشیرینیان نووسیوە و نابەرپرسانە داوەرییان کردووە، بەڵکوو ڕوو لە دۆستان و دڵسۆزان و لایەنگرانی خۆم دەکەم کە شاهیدی مێژووی ڕابردوی من بدەن.

هەر بۆیەش بە پێویستم زانی ئەم ڕوونکردنەوەیە بدەم.

لە کاتێکدا کە ڕۆڵە تێکۆشەرەکانی گەلی کورد ڕۆژانە لە زیندانەکان لە ژێر زەبروزەنگدان و ئێعدام دەکرێن، کاناڵی یەکی کۆماری ئیسلامی ئێران دەستی داوەتە بڵاوکردنەوەی بەشێکی کەمی یەکێک لە گۆرانییەکانی من. وادیارە فیلمسازێک فیلمێکی درووست کردووە و گۆرانییەکی حەسەن زیرەک و گۆرانییەکی منی وەکوو مووزیکی مەتن لە سەر فیلمەکە داناوە و بڵاو کراوەتەوە و من ئاگام لە ھیچ شتێک نییە و نەبووە و تەنیا دۆستان ئاگاداریان کردم کە شتێکی وا ڕووی داوە.

ئێمە ڕۆژانە سەدان کەس لەبەر ئەو خۆشەویستییەی لەناو خەڵک و گەلەکەی خۆماندا ھەمانە، وێنەمان لەگەڵ دەگرن کە زۆربەیان ناناسین و نازانین کێن. دەیان ساڵ خەباتی سیاسیی ھونەریی ناسر ڕەزازی سەلماندوویەتی کە ئێمە کێین و ھیچ کاتێک پشت لە بەرەی ڕزگاریخوازی گەل و نەتەوەکەی خۆمان ناکەین و جەنایەتەکانی کۆماری ئیسلامی و دەستندەخۆرەکانی لەبەر چاو ون ناکەین. هەموو حیزبەکانی کوردستان لەلای من جێگای ڕێزن و مانەوە لە ڕیزی خەباتی نەتەوەکەماندا و تێکۆشانی ماندوونەناسانە و کۆڵنەدەرانە شانازییەکی گەورەیە بۆ ئێمەیش و بۆ هەموو خەباتگێڕانی کوردستان. سروودەکان، شێعر و پەیڤەکان، بانگەوازەکان و دەربڕینە ئاشکراکانی ساڵانی ڕابردووی من شاهیدی زیندووی ئەو ڕاستییەن. ئەوانەش کە شەکری وا دەشکێنن گوایە خەریکن من بەرنەوە بۆ ئێران، خۆیان ناشیرین دەکەن. من کاتێک دەگەڕێمەوە بۆ ڕۆژهەڵاتی کوردستان کە کورد نەتەوەی پلە دوو نەبێت و کورد خاوەنی کەرامەت و ئیرادە و سەربەخۆیی خۆی بێت و خۆی بڕیاردەری چارەنووسی خۆی بێت.

٢٣/٠٤/٢٠٢٠

بۆ زانینى زانیارى لەسەر ژیانى هونەرمەند ناسرى رەزازى کلیک لێرە بکە.


ئەم بابەتە 224 جار خوێندراوەتەوە