laxwrbata.jpg

دیوانى لە غوربەتا، چاپى چواره‌مى بڵاوكرایه‌وه‌

دیوانى لە غوربەتا، یەکێک لەبەرهەمە چاپکراوەکانی دەزگای ڕۆشنبیری جەمال عیرفان، بۆ چوارەمین جار چاپکرایه‌وه‌.

لە غوربەتا، تاكه‌ دیوانى شاعیرى گەورەى کورد (محەمەد عومەر عوسمان) ناسراو به‌ ژه‌نه‌ڕاڵى پایزه‌، بۆ جارى چواره‌م چاپكرایه‌وه‌.

ژه‌نه‌راڵى پایز، كه‌ناوى ته‌واوى (محه‌مه‌د عومه‌ر عوسمان)، یه‌کێکه‌ له ‌شاعیر و نوسه‌ره‌ دیاره‌کانی‌ هه‌رێمی‌ کوردستان، له‌ ساڵی 1957 له‌گه‌ڕه‌کی ده‌رگه‌زێنی شاری سلێمانی له‌دایکبووه، خوێندنی سه‌ره‌تایی ‌و ناوه‌ندی ‌و ئاماده‌یی له‌شاری سلێمانی ته‌واوکردووه، له‌سه‌ره‌تای لاوێتیه‌وه‌ ده‌ستی به‌کتێب خوێندنه‌وه‌ کردووه‌، له‌ ساڵی (1975) ده‌ستیکردووه‌ به‌نوسینی شیعر و بڵاوکردنه‌وه‌ی، کۆی به‌رهه‌مه‌کانی له‌دیوانێکدا به‌ناوی (له‌غوربه‌تا) بڵاوکردۆته‌وه، دوو ماسته‌ر له‌سه‌ر شیعره‌کانی وه‌رگیراوه و له ‌چوار نامه‌ی دکتۆراش وه‌ک سه‌رچاوه‌ی سه‌ره‌کی به‌کارهاتووه.

شیعره‌کانی ژه‌نه‌ڕاڵى پایز بۆ چه‌ندین زمانی زیندو وه‌رگێڕدراون، هه‌روه‌ها شیعره‌کانی لەلایەن چەندین هونەرمەندى کورد کراون بە گۆرانى و تابلۆى شێوەكارى.

نازناوی (ژه‌نه‌ڕاڵی پایز)ی بۆخۆی‌ هه‌ڵبژاردووه، به‌داخه‌وه‌ رۆژى سێشه‌ممه 22/10/2019‌، لە تەمەنى (67) ساڵى لە شارى سلێمانى و لە ماڵەکەى خۆیدا کۆتایی به‌ژیانی‌ خۆیهێنا و رۆژى چوار شەممە 23/10/2019 لە مەراسیمێکى شایستەدا لە گردى سەیوان لە شارى سلێمانى بەخاکسپێردرا.

دوابه‌دواى كۆچى دوایشى له‌ رۆژى شەممە 30/11/2019 کاژێر (3)ى پاش نیوەڕۆ هۆڵی مستەفا پاشا لە تەلاری هونەری لە شارى سلێمانی مەراسیمی چلەی بۆ به‌ڕێوه‌چوو.

ئای.. کەی بێ چەقۆی ژێر سەرینەکەت..

لەقوڵپی خوێنتا گەرم بێتەوە؟

یان مردن بمرێ و لەژوورەکەتا..

هەوری خۆکوشتن بڕەوێتەوە؟


ئەم بابەتە 78 جار خوێندراوەتەوە