zyad.jpg

هەرێمێك كە هیچیان بەو نەدا، ئەو هەموو شتێكی پێیاندا

هاوكار عەبدولقادر

بەیانیەك ئەو لە خەو هەڵدەستێ، ئیدی بۆ هەمیشە بڕیاردەدا لە نیشتیمان هەڵبێ، نیشتیمانێك كە هیچی بەو نەدا، بەڵام ئەو هەموو شتێكی پێدا.
نیشتیمانێك كە ئەو باوەشی بۆكردەوە، بەڵام لەپاداشتدا جانتای سەفەریان پێدا.

 ساڵ 1993یە، ئەمرۆ ئەستێرەیەك رێگای مەرگ دەگرێتە بەرو بەرەو غەریبی بۆ هەمیشە دەكشێت، ئەو كوڕەكەی مام ئەسعەدە، ئەو هۆزانبێژە سەنگینەی كە مامۆستا شێركۆ لە وەسفیدا دەڵێ: ئەو نە لەكەس دەچێ و نە هیچ كەس دەتوانێ لەو بچێ، جانتای سەفەری لە شانی ناوە، لە یەك ڕۆژدا لە گەڕەكی تەیراوەی هەوارگەی لە دایك بوونی، كەسوكارەكەی، نیشتیمانەكەی، دۆستەكانی و هەموو ئەو ئازارانەی شەڕی ناوخۆو قاتوقڕی كە تەنگیان بەو هەڵچنیوە هەڵدێ، ئیدی نیشتیمان بۆ ئەو دایكێك نییە، بەڵكو برینێكەو وەك هەزاران سەنگینی تر تەنها هەڵهاتن دەوای ئەم برینە دەكا.

 ئەو دەرواو بەجۆرێك، وەك ئەو سەربازەی كە بەرەو بەرەكانی پێشەوەی جەنگ دەڕوا قەرار دەدات، كە هەرگیز نەگەڕێتەوە، لەپاش بڕینی رێگایەكی سەختی قاچاخ، سەرەتا ڕودەكاتە وڵاتی ئێران، لەوێ جگە لەوەی هەوڵدان بۆ زارەوەی فارسی، پەرەیەكی گەورە بە كاری میوزیك، ئاواز دانان، هونەرەكەی دەدات.

پاشان ئەمە بەس نییە بۆ سەنگینێك كە تموحی گەشتن بە لوتكەی هەرەمەكەی هەیە، هەر بۆیە، هەنگاو دەنێ بەرەو وڵاتی ڕوسیا، ئەم سەرمایە سەنگینەی نیشتیمان لە وڵاتی ڕوسییە، بۆماوەی دوو ساڵ نیشتەجێ دەبێت و سەدان مشت لە زانین و فێربوونی زیاتری كاری ئاوازدانان و میوزیك دەخاتە سەر خەواری هونەرەكەی، لەپال ئەمانەدا ئاشنایی بە هونەری ڕوسەكان و یەكییەتی سۆڤیەتی جاران، هێشتا ئەمانە پڕ بەبەری خەونەكانی ئەو نین، هەر بۆیە ئەم سەرمایە نەتەوەییە، ڕودەكاتە وڵاتی كەنەداو لەوێ بەباشی خۆی فێری زمانی ئینگلیزی دەكاو، لە كۆتایدا ئەسپی خۆی تاو دەدا بەرەو وڵاتی سەرماو سۆڵەو بۆ هەمیشە لە وڵاتی جوانی (سوێد) بارگە لێك دەنێت.

ئیدی لەم بەروارەوە ئەو بەدەر لە هونەرمەندێك، دەبێتە قوتابخانەیەكی گەورەی هونەری لەو دەمەداو باوەش بۆ سەدان هونەرمەندی كورد دەكاتەوە، ئاوازو هۆنراوە بۆ دەیان هونەرمەندی كەم ئەزمون و خاوەن ئەزمونی ئەو دەم دادەنێ، لەو دەمەدا لەوەلامی پرسیارێكدا، كە هونەرمەندێكی هاورێی نزیكی خۆی پێمی گووت: بڕێك جار ماڵی ئەم سەنگینە هێندە قەرەباڵغ بووە هەر لە شێوەی تەكیەو خانەقا، هەر وەك سەنتەرێكی هونەری.

زیاد ئەسعەدی كارامە لەوێ و لە ساڵی ١٩٩٨ گۆرانی (نەمزانی) بڵاو دەكاتەوە، پاشان لە ساڵی ٢٠٠١ دا لە بەرنامەیەكی تەلەڤیزیۆنیدا بەشداری دەكاو چەندین شاكارە گۆرانی و بەرهەمی نوێ بڵاو دەكاتەوە.

زیادی سەنگین لە ماوەی كاروان و تەمەنی هونەریدا، خاوەنی پێنج ئەلبۆمی هونەرییە، كە یەكەم ئەلبومی ساڵی ١٩٨٨ بلاوكردۆتەوە، ئەم سەنگینەی نیشتیمان نزیكەی دەسال زیاترە خۆی لە زومی هەموو كامێراكان و بەركەوتن لەگەل هەموو میدیاو سایت و رۆژنامەكان و تەنانەت هونەری گۆرانی گوتنیش بە دور گرتووە، وەك دۆستەكانی دەڵێن، ئەو هونەرمەندەی لە دارو بەردی كوردستان دڵی شكاوە...

لە وەسفی ئەودا مامۆستا مەزهەری خالقی دەڵێ: دەنگی زیاد وەك سیحرێك وایە، كاتێك بەر گوێ دەكەوێ هەر زوو جادو دەكات.

مەرزیەی رەحمەتی دەیگۆت: زیاد بەدەر لەوەی ئاواز دانەرو هونەرمەندێكی بلیمەتە هاوكات مرۆڤێكی دەم بەخەندەی خۆشدووە كە هەمیشە گۆرانی بۆ عیشق و خۆشەویستی دەچڕێ

هونەرمەندە لاوەكان لەوەسفی ئەم سەنگینەدا ئەلێن: ئەو مامۆستای شیعرو ئاوازە، پردی گەشتن بەسەركەوتن و قوتابخانەی هونەری زۆرێك لە ئێمەیە..

مامۆستا شێركۆ لەوەسفی كوڕەكەی تەیراوە ئەڵێ: ئەو شاسوارێك بوو بەگڕو تین و تۆنێكی تاسە شكێنەوە هاتە نێومانەوە، ئەو هەموو ڕیتمە تەقلیدییەكانی بەزاندوو وەك شاسوارێكی نوێگەر بە ریتم و تۆنێكی نوێوە دڵ و گوێكانمانی زاخاو دایەوە..

لە گۆرانییەكیدا ئەم سەنگینەی نیشتیمان دەڵێت: دوعا دەكەم شەوو ڕۆژان من، بتسوتێنێ ئاه و ناڵەی من

منیش لەژێر رۆشنای هەمان دوعادا، دوعا دەكەم شەوو ڕۆژان من، بتانسوتێنێ ئاه و ناڵە هەموو ئەوانەی سەنگینەكانی ئێمەیان لە نیشتیمان دڵشكاو كرد، ڕاویان نان بۆ تاراوگەو غەریبی و بۆ هەمیشە لە ئێمەیان دور خستنەوە....


ئەم بابەتە 76 جار خوێندراوەتەوە