Sleman1111.jpg

لە ساڵیادی تێرۆرکردنی هونەرمەندێکی رۆشنگەردا

هونەرمەند و رۆشنگەری شەهید سلێمان حەسەن، خاوەن کەسێتییەکی رۆشنبیر و رۆشنگەر و بیرکراوە بو، بەردەوام گفتوگۆی فیکریی و مەعریفیی دەکرد، بە تایبەت سەبارەت بە ئەقڵانییەت و کرانەوە و ئازادیی ویژدان و باوەڕ، بۆیە لایەنێکی ئیسلامی سیاسیی فتوای تێرۆرکردنی دەدرێ و، شەوی 17/7/1993 لەبەردەم مزگەوتی (نەوڕەسیی) لە رانیە تێرۆرکرا و، بوە قوربانیی بەرگریکردنی لە هونەر و کەلتور و موزیک و جوانییەکانی ژیان، دژی داخران و تاریکیی و مەرگدۆستیی. هونەرمەندی جوانەمەرگ، شەهیدی دەستی غەدر و تاریکاندنە، بە داخەوە دوای تێرۆرکردنیشی وەک پێویست یادی نەکراوەتەوە و ئاوڕ لە هزر و بەخششەکانی نەدراوەتەوە.

شەهید سلێمان حەسەن له‌ چه‌ند دێرێكدا:

- ناوی تەواوی: سلێمان حاجی حەسەن.

- لە ساڵی 1969 لە خێزانێکی رۆشنبیر لە رانیە لەدایکبوە.

- لە ساڵی1981 لە خولێکی فێربونی موزیک بە سەرپەرشتیی (م. هیوا مستەفا) تێکەڵی کاری هونەریی و موزیک بوە.

- لە ساڵی 1982 بەشداریی یەکەمین چالاکیی هونەریی کردوە.

- بۆ پەرەپێدانی هونەرەکەی، زۆر خولیای بوە لە دوای تەواوکردنی قۆناغی ناوەندییەوە بچێتە پەیمانگای هونەرەجوانەکان، بەڵام بە هۆی بارودۆخی ئابوریی خێزانەکەیەوە، ئەو خەونەی نەهاتۆتەدیی.

- ئارەزومەندانە و بە عەشقێکی زۆرەوە، خۆی پەرەی بە بەهرە و تواناکانی داوە و بەردەوام سەرقاڵی راهێنان و خۆپەروەردەکردنی موزیک بوە، هاوکات بەردەوام خوێندویەتییەوە و هەوڵی بەرزکردنەوەی ئاستی رۆشنبیریی و مەعریفیی خۆی داوە.

- ساڵانە بەشداریی لە چالاکیی قوتابخانەکاندا کردوە.

- ساڵانی هەشتای سەدەی رابردو و دوای راپەڕینیش بەشداریی چەندین فێستیڤاڵ و ئاهەنگ و چالاکیی هونەریی (تیپی مۆسیقای کێوەڕەش، تیپی مۆسیقای رانیە) کردوە لە رانیە و شار و شارۆچکە جیاوازەکانی کوردستان و عیراقدا، لەوانە: رۆژی جیهانیی موزیک، جەژنی نەورۆز، ساڵیادی پێنجی ئازار، ساڵیادی کیمیابارانی هەڵەبجە، رۆژی جیهانیی کرێکاران، ۲٥ـی رێبەندان،26ـی گەلاوێژ، ساڵیادی حزبی شیوعیی، ...

- هاوکاری (تیپی مۆسیقای زۆزگ)ـی منداڵانی رانیە بوە.

- لە چەند بەرهەمێکی هونەریی جیاوازدا بەشداریکردوە، چ لە تۆمارکردنی سرود و چ گۆرانیی، جگە لە هونەرمەندانی ناوچەکە، لە بەرهەمی هونەرمەندان: (نەجمەدینی غوڵامیی، بەکری لەگزیی، حەمە رانیەیی، ...)

- لە کۆڕەوەکەی ساڵی 1991دا، وەک هەڵوێستێکی نیشتمانیی و رۆشنبیرانە، هەمو ئامێرەکانی تیپی مۆسیقای رانیەی بردۆتەوە ماڵەوە و لە فەوتان و دەستی تاڵان پاراستونی.

- لە ساڵی1992 ئامادەیی بازرگانیی رانیەی تەواوکردوە.

- ئەندامی حزبی شیوعیی بو.

- شەوی 17/7/1993 لەبەردەم مزگەوتی (نەوڕەسیی) لە رانیە تێرۆرکرا و، بوە قوربانیی بەرگریکردنی لە هونەر و کەلتور و موزیک و جوانییەکانی ژیان، دژی داخران و تاریکیی و مەرگدۆستیی.

درود بۆ گیانی شەهید سلێمانی هونەرمەندی رۆشنگەر و، یادی هەمیشە زیندو.


ئەم بابەتە 116 جار خوێندراوەتەوە