sdiqali.jpg

ئا..

سدیق عەلی

ئا..
بەڵام چاوەڕوانیم هێشتا لەدەرگایەو نایەتەوە ژوور
حەپەساویم لە کۆڵانەکە شۆک بووە
بێ ئۆقرەییم لەسەر شۆستە بەجێماوە

ئا ..
بەڵام ئێمە خەریکی کردنەوەی سەری شوشەی حیکایەتین
خەریکی پێکەوە بەستنی تاڵی یادەوەری ئاڵین
خەریکی خواردنەوەی یەکەم قومی قەسیدەو
پەرتکردنی وشه بریقەدارەکانی شیعرو
هەڵوەشاندنەوەی تەونی تازەترین مەراق و
گەڕانەوەین
بۆ ئەو ڕۆژانەی بۆ یەکەم جار
زانیمان عەشقمان بۆ یەک دەست دەدات.

ئا ..
مەرگ دێت.
بەڵام ئێمە هێشتا نەگەیشتوینەتەوە دەرگای ماڵ.
تۆ درەنگتەو مردن لە کیژۆڵەکەت چاوەڕێ تر
تۆ پەلەتەو سەفەر لەدایکت تامەزرۆتر
بەتاڵوکەیی و دارتێلەکە دەست درێژ ناکات
دیوارەکە پاڵ بەجوانیتەوە نادات
دەترسی نەمبینیەوەو چی عەشقت پێیە دەینێیه ناو دەستەکانم و
چی بەسەرهاتی بریندارت لەلایە
دەیڕێژیە ناو مەرکانەکانی ڕۆحمەوە..

پڕۆژەیەکی ئەدەبی بۆ هاوڕێی کۆچکردووم هونەر رەسوڵ..


ئەم بابەتە 79 جار خوێندراوەتەوە