Adonis.jpg

خودى هه‌واش نوزانه‌وه‌یه‌

ئه‌دۆنیس - وه‌ر‌گیڕانى ته‌ڵعه‌ت تاهیر

كوشتن ببووه‌ مه‌مكێكى به‌یروت، خوێنیش مه‌مكه‌كه‌ى دیكه‌ى بوو،

له‌ نێوانیاندا من فێر ده‌بووم: چۆن كات به‌خێو بكه‌م.

له‌ شه‌قامه‌كان، هه‌نسكى شڵه‌قانى خوێن له‌ ئه‌وى نادیاردا قوڵپده‌دا.

ئاگر گوتى: خۆڵه‌مێش ده‌كه‌مه‌ په‌یامبه‌ر.

خۆڵه‌مێش گوتى: په‌یامم نانوسم.

با گوتى: من شایه‌تم.

زریانێكه‌، تیایدا ده‌سته‌ بڕاوه‌كان په‌رش و بڵاوده‌بنه‌وه‌،

ئه‌و سه‌رانه‌یش كه‌ گه‌ردنیان ناناسنه‌وه‌،

تیشك هاوارى ده‌كرد و هاناى بۆ سێبه‌ر ده‌برد.

جوانترین چرا ئه‌وانه‌ن كه‌ ده‌یانده‌گیرسێنین،

نه‌ك بۆ ئه‌وه‌ى روناكى ببینین،

به‌ڵكو بۆ ئه‌وه‌ى سێبه‌ر بناسین.


ئەم بابەتە 72 جار خوێندراوەتەوە