Shqarta1.jpg

کۆمەڵە شیعری شقارتە بڵاوده‌كرێته‌وه‌

کۆمەڵە شیعری شقارتە براوەی خەڵاتی نووسیار لە بواری شیعر بڵاوده‌كرێته‌وه‌.

وا بڕیاره‌ به‌منزیكانه‌ لە مەراسیمێکی تایبەتدا کۆمەڵە شیعری شقارتە له‌ نوسینى (نه‌وره‌س محه‌مه‌د)  براوەی خەڵاتی نووسیار لە بواری شیعر دابڵاوبكرێته‌وه‌.

ئه‌م به‌رهه‌مه‌ یه‌كێكه‌ له‌و به‌رهه‌مانه‌ كه‌ پله‌یى یه‌كه‌مى خەڵاتی نووسیارى بۆ کتێبی یەکەم بۆ ساڵى 2020 خولی محەمەد عومەر عوسمان  (ژەنەڕاڵی پایز)، به‌ده‌ستهێناوه‌،

ئەم خەڵاتە خه‌ڵاتێكى ساڵانه‌یه‌ بۆ (3) سێ دەنگی نوێی ئەدەبی کوردی له‌ بواره‌كانى (شیعر، چیرۆك و رۆمان).

له‌باره‌ی بردنەوەی ئەم خەڵاتە نەورەس محەمەد ده‌ڵێت:

دڵخۆش بووم بە بردنەوەی شقارتە کە بەشداری پێشبڕکێیەکەم کرد، بیرم لەوە دەکردەوە ئەگەر یەکەم ئەزموونم لە لایەن و کەسی شارەزا و بە ئەزموونەوە بخوێندرێتەوە و هەڵسەنگاندنی بۆ بکرێ، بێ ئەوەی بزاندرێ کێم، بێ ئەوەی ڕەگەزم، تەمەنم، یاخود لە چ چینێکی کۆمەڵایەتیم.. ئەوکات ئاسوودەتر و دڵنیاتر دەتوانم بنوسم، ئەوکات خوێنەرانیش لەو بیرکردنەوە و تێڕوانینە ڕزگاریان دەبێ کە نەورەس کچە بۆیە دەخوێندرێتەوە. هەرچەندە ئەو بردنەوەیە مانای ئەوە نییە کە تەواو گەیشتوومەتە ئاستێک و پێویستم بە خوێندنەوە و ئەزموونی دیکە نییە، نا بەڵکو بەرپرسیارەتی زیاترم دەکەوێتە سەرشان. ئەگەر شقارتە خەڵاتیشی نەبردبا ئەوکات دەبوومە کەسێکی پێداگر، نەبردنەوە پاڵنەرێکی بەهێز دەبوو تا ئەزموونی زیاتر و نوێتر تاقیبکەمەوە .

هەروەها لە بارەی کۆمەڵە شیعری شقارتە وتی:

 لە شقارتەدا هەوڵمداوە وێنەی ئەو ڕێگا و ئازار و بەربەستانە بهێنمە نێو زمانەوە کە دەکرێ هەر مرۆڤیک لە ژیانیدا ڕووبەڕووی ببێتەوە کە خەون دەبینێ، ئایا کۆمەڵگە و داب و نەریت بۆچی لەنێو خۆیدا لولمان دەدا و کۆت و بەندمان دەکا؟ بۆچی نوکی زمانیان لە ئێسکەکانمان دەخشێنن؟
شقارتە بیرهێنانەوە مرۆڤبوونە، پێش ئەوەی ڕەگەزێک بێت، هەر شیعرە و ئازارێکی قوڵی لەخۆیدا هەڵگرتووە، ئازار و ئیستاتیکا لە شقارتەدا یەکدەگرن و ململانێی نێوان من و ئەوان دەکات.

بەشێک لە هۆکاری هەڵسەنگاندنی دادوەر ئەحمەدی مەلا :

''دەقەکانی "شقارتە" ئازارن، بەڵام شیعرێندراون، ئەمەش کارێکی ئاسان نییە، چونکە نووسینەوەی ئازار هەمیشە خۆی لە دەستی دەقی شیعریی رادەپسکێنێ. دەگوترێ  شاعیر کەسێکی دڵشکاوە لە بنەڕەتەوە، بەڵام نووسینەوەی ئەم دڵشکانە ئاسان نییە، یا هەندە ئاسانە کە نابێ بە شیعر. شیعری ئێمە، هێشتا لە ناڵە و لاڵانەوەی سەدەی نۆزدەم خۆی قورتار نەکردووە، ئەمە پەیوەستە بە مێژووی کەلتووریمان، بە سیستەمی پەروەردەمان، بە چێژی چەقبەستوومان، لەهەموو حاڵەتێکدا شیعر نابێ ناڵین بێ بەسەر تەرمی خۆمان، بەڵکو رامان بێ لە بوون، لە ئازار، لە بوونی ئێمە لێرە.''


ئەم بابەتە 108 جار خوێندراوەتەوە