Adonis.jpg

سێگۆشه‌بازنه‌یه‌

ئه‌دۆنیس - وه‌ر‌گیڕانى ته‌ڵعه‌ت تاهیر

 1

له‌ كوێوه‌ ئه‌و (هونه‌ر) ه‌ى دیكه‌ دێت كه‌ سیاسییه‌كانى عه‌ره‌ب تیایدا كارامه‌ن:

هونه‌رى گۆڕینى ژیان بۆ (ئاگر) ێكى به‌رده‌وام؟

 

2

هه‌موو رۆژێك، وه‌ك هه‌واڵه‌كان ده‌ڵێن، له‌ عێراق، یه‌كه‌مین مه‌ڵبه‌ندى شارستانێتى عه‌ره‌ب، ئه‌و ته‌رمانه‌ ده‌دۆزرێنه‌وه‌ كه‌ هه‌واڵه‌كان ناویان ده‌نێت (ناسنامه‌یان نه‌ناسراوه‌).

زۆر كه‌س ئه‌م دیارده‌یان پێ سه‌یره‌.

سه‌یرتر له‌وه‌، خودى ئه‌و سه‌رسوڕمانه‌یانه‌: چونكه‌ زۆربه‌ى عه‌ره‌به‌ زیندووه‌كان، له‌مڕۆدا، ده‌توانین پێیان بڵێین (ناسنامه‌یان نه‌ناسراوه‌).

 

3

ئه‌گه‌ر ئه‌م وته‌یه‌ى ماركس راست بێت (مرۆڤایه‌تى ته‌نیا ئه‌و گرفتانه‌ ده‌خاته‌ ڕوو، كه‌ ده‌توانێ چاره‌سه‌ریان بكات)، گه‌ر ئه‌م وته‌یه‌ له‌سه‌ر سیاسییه‌كانى عه‌ره‌ب په‌یڕه‌و بكه‌ین، تێبینى ئه‌وه‌ ده‌كه‌ین سیاسییه‌كانى عه‌ره‌ب هیچ گرفتێك ناخه‌نه‌ ڕوو، به‌و واتایه‌ى تواناى پێشكه‌ش كردنى هیچ چاره‌سه‌رێكیان بۆ هیچ گرفتێك پێنییه‌.

به‌مه‌ش ده‌سته‌وه‌ستانییان لێكده‌درێته‌وه‌: پێیان باشتره‌ هه‌موو شتێك به‌ (چاره‌سه‌ركراوى) وه‌رگرن، به‌بێ گه‌ڕان، بێ ماندوبوون، به‌بێ هیچ هه‌وڵدانێك.

 

4

ئه‌و كه‌سه‌ى له‌ رووى سیاسییه‌وه‌، به‌ باشى ژیانى عه‌ره‌بیى بخوێنێته‌وه‌، وه‌ك كتێبێكى مه‌زن ده‌یبینێت، لاپه‌ڕه‌كانى له‌گه‌ڵ (با) كاتدا په‌رش و بڵاو ده‌بنه‌وه‌.

 

5

كه‌سه‌ پسپۆره‌ مه‌زنه‌كانى بوارى زانسته‌كانى ده‌سه‌ڵات و سیاسه‌ت، بانگهێشتن بۆ توێژینه‌وه‌ له‌ ده‌سكه‌وتێكى مه‌زنى عه‌ره‌به‌كان له‌و زانستانه‌دا، ئه‌و ده‌سكه‌وته‌ى سیاسییه‌كانى عه‌ره‌ب ده‌چێته‌ سه‌ر خه‌رمانى ده‌سكه‌وته‌كانى تریان، ده‌سكه‌وته‌كه‌ خۆى له‌ گۆڕینى سیسته‌مى (شۆڕشگێڕى) و (دیموكراسى) ده‌بینێته‌وه‌، بۆ سیسته‌مى پاشایه‌تى، خێزانیى، (ده‌ره‌به‌گایه‌تى)، كه‌ به‌ پرۆسه‌یه‌كى هه‌ڵبژاردنى جه‌ماوه‌رییانه‌ به‌ڕێوه‌ ده‌چێت.

بێگومان مێژوو له‌ تۆماره‌كانیدا مافى ته‌واوى ئه‌م ده‌سكه‌وته‌ بۆ سیاسییه‌كانى عه‌ره‌ب ده‌پارێزێ، مێژوو دودڵیش نابێ له‌وه‌ى مافى دۆزینه‌وه‌یان پێبدا.

 

6

له‌ لێكدانه‌وه‌ى له‌باره‌ى چه‌مكى داهێنان و پێشكه‌وتندا، ده‌روناسیى گرنگییه‌كى زۆر ده‌داته‌ چه‌مكى (كوشتنى باوك)، بێگومان به‌ مانا ره‌مزیه‌كه‌ى، ئه‌و كوشتنه‌، به‌ پێى تیۆره‌كانى فرۆید: ناچارییه‌ گه‌ر كوڕ بیه‌وێت ئازاد بێت، به‌ ئازادى كاربكات و بیربكاته‌وه‌، به‌بێ ئه‌م (كوشتنه‌ ره‌مزییه‌) كوڕ ناتوانێ باوكى تێپه‌ڕێنێ، وه‌ك پاشكۆى ده‌مێنێته‌وه‌، سه‌ربه‌خۆیی له‌ ده‌ست ده‌دا و لاسایكه‌ر ده‌مێنێته‌وه‌.

كوڕ، له‌ كه‌لتورى عه‌ره‌بیدا، ئه‌و، وه‌ك پێچه‌وانه‌یه‌ك، ده‌كوژرێ، به‌ مانا ره‌مزیه‌كه‌ى، كوڕ به‌ دوو شێوه‌ ده‌كوژرێت: یان له‌ساتى له‌دایكبوونیه‌وه‌ ده‌گۆڕدرێ بۆ (باوك) و به‌ زۆر شوێنى باوكى ده‌گرێته‌وه‌، یان باوكى به‌ زۆر رۆشنبیرى و بنه‌ماكانى خۆى به‌سه‌ردا ده‌سه‌پێنێ، به‌و پێیه‌ى كوڕى خۆیه‌تى، بۆیه‌ كه‌لتورى خۆى بۆ جێدێڵێ، وه‌ك چۆن كێڵگه‌یه‌ك یان خانوویێكى بۆ جێدێڵێ.

به‌مشێوه‌یه‌، كۆمه‌ڵگه‌ى عه‌ره‌بیى له‌وه‌ ده‌چێ كه‌ نه‌گۆڕێ و پێشنه‌كه‌وێ، یان له‌وه‌ ده‌چێ (وه‌چه‌ نه‌خاته‌وه‌) وه‌ك ئه‌وه‌ى كۆمه‌ڵێك باوك بن و نه‌زۆك بن، كه‌ منداڵیان نابێت ته‌نیا له‌ خودى خۆیان نه‌بێت: ئه‌و باوكانه‌ له‌ رووى ژماره‌وه‌ كۆتاییان نایه‌ت، له‌ رووى رۆشنبیریشه‌وه‌.

ئایا له‌مه‌دا نهێنیى ئه‌وه‌مان بۆ نادۆزرێته‌وه‌، كه‌ بۆچى لاسایى كردنه‌وه‌، كۆن و ناسراو باڵاده‌ستن؟ بۆچى چێژى كۆن و باو، به‌سه‌ر هزر و هونه‌ر و ئه‌ده‌بدا باڵاده‌سته‌؟

 

7

وێنه‌ى سێگۆشه‌یه‌ك له‌سه‌ر ده‌فته‌ره‌كه‌تدا بكێشه‌، لێیوردبه‌وه‌، كاتێ باسى سیاسه‌تى عه‌ره‌بیى و بارودۆخى عه‌ره‌ب ده‌كه‌یت، ده‌بینى ئه‌و سێگۆشه‌یه‌ به‌ره‌ به‌ره‌ ده‌بێته‌ بازنه‌.


ئەم بابەتە 57 جار خوێندراوەتەوە