Honrawae.jpg

تاڤییەکا نۆستالژیایێ ل ھنداڤ ئاخەکا تێر تەڕم

دیار عەبدولعەزیز- دھوک

سوباھی نە دوزبە، من ئەڤ ھەلبەستە نڤیسابوو

من ب حبرێ ئاسمانی و ئەلیفبێتکا کولیلکان شعر د ڤەھاند

دناڤبەرا سەفەر و خەریبییێ دا، من مژیلانکەکا تە دکرە فاریزە،

نیشانێن تە، ئەوێن رەشترین سەردەمێ وەرارا من

وەکی خوەداوەندەکێ مایتێکەر

ب بێدەنگی سووند ب ھەمی وێرانییان د خوار

ھەمی غەریب، ھاڤی، شکەستی، بێزار و بێھودەیێن مینا من

د باوەشا زەمھەریرەکێ دا وندا بکەت..

ل ھەیامێن گەریدەییا کوتران

تیشکەکا ھەتاڤێ رێبەرییا من ل تاخەکێ زەمەنی دکر

تاخەک جادەیێن وێ غوبار و پەیاریێن وێ ھەڤرکی

ھەڤرکییەکا دژوارتر ژ دلتەنگییا مەغرەبێ و

گەرمتر ژ گرنژینا ئەلندێ

تیشک ل ناڤ کراسێ سپێدەیێ غەوارە دبوو و

ھەلما قەھوەیێ د بۆ فەیرۆزەکا مت.

بێی چ سۆزان بدەم، ب تەنێ وەک نیاز

ڤێ ئێڤارێ دێ تبلێن خوە فێرکەم رێیەکێ ل ناڤ پرچا تە ڤەکەن

داکۆ ب دزی ڤە ماچەکێ ل پشت گوھێ تە بکەمە ئاڤابوون

ئاڤابوونەکا بەرزە

وەکی ھەستێن مرۆڤان ل ناڤ کەرنەڤالێ رۆبۆتان

ئاڤابوونەکا بێئەنجام، وەکی بێدەنگییا د چاڤێن ڤی باژێری دا..

پێ د حەسیێم

شکاندنا پەیکەرێن غەیبێ 

ب زەحمەتترە ژ تێکھەلکرنا رەنگان د کەڤالێ چونەییێ دا

ڤەشارتنا ئارەنگێ ل کۆژیەکێ تاری

ب ساناھیترە ژ داقوتنا مەحفیرەکا خافل و تژیکرنا خالەکا ڤالا ب واتەیێ 

بەرێ خوە بدێ..

ئێدی بچووکترین تشت مەزنترین خەیال بۆ من چێدکەن

خەیالێن تامدای ب رۆناھی و مێخەکان..

ھاتە بیرا من

دگەل ھەمی دوماھییان بێھنا مێرییان ژ رۆندکێن من دھێت و

بزاڤا گولەکێ ل دەستێن من د ئالیێت

گولەکە ب تەنێ ل وەرزێ ئەلزەھایمەرێ شین دبیت..

من ژبیرکر

تەمەت تەربوونا ل بەر بارانەکا چ جاران نەباری

ئەز یێ د سۆژم ب وی ئاگرێ ھەردەم ھەل و نەبەربوویە من!

 ******

من و تراژیدیایێ دۆستینی نەبوو 

وەختێ بۆقچکا من، یا دەیکا من ژ برینێن دەیکا خۆ چێکری، ڤەبووی و

ھەمی دەریا ب ھێستریایا کۆچکرنەکا لاتینی ڤەخواری

وەی پا من دڤیا وان کێلیکان من مەرحەبایی دگەل خەندقینێ دا ھەبا

چۆنکی ب تەنێ ھندابوونا ل ناڤ زەلالییێ من دیار دکەت

ب تەنێ لێکدان و بەرکەفتن کاتەیێن رامانێ ژ کپێنییا من دئینن

سەحکێ ھەمی کارلێک د جوانن

رێک و رەڤین.. کۆچ و لێگەریان ل کنارێ شینبوونێ

چوون و لڤین.. ھێرش و بەزین د مۆزەخانەیا خەیالێ ڤە

خەنا و ھیزار.. پەرێن سۆر و فرین ل ناڤ دیکێلا بوخیریێن جەژنەکێ

لێڤێن تیھاڤێژ.. ئەرزنک و گەردەنێن شەماکەر.. مەمکێن ھناربێژ و رەھنێن شەھوەتباز: ئۆرکێسترایا ئیرۆتیکێ.

 

من ل نەقەبا مەمکێن کتێبا خوە ستڤانکەک ژ گولێن شین شۆرکربوو، ب شەفافترین زیڤێ ئەرمەنان من پەیڤەک ل سەر نکراند بوو، ترسیام وەکی دەربازبوونا پەقیشکەکا ھەلمژێچوویی دناڤ چەقێن ھنارەکا سەقەمگرتی دا، کەشتییێن ئالا وان کراسێ ئالانی و نەخشەکێ مەلەکۆتێ ل سەر.. ستوونا ئالای ژی، گۆرزەک ژ خوەپەرستییا داگیرکاران.. تڤەنگێن فیشەکێن وان ستەم و ئاراستەیی وان بەر ب رەش و ھنودان.. شوورێن بەربەریێن بیابانکێش و مەنجەنیقێن تژی ژ غەزەبەکا مەغۆلی.. ستڤانکێ من بقەتینن و د ژەھرا دیرۆکێ بھەلینن.. من کتێب کرە بەگرەوەندێ پێرفۆرمانسەکا سەرگەردان و ب تابلۆیا مۆزیکێ چارچووڤە کر، ب سەمایا شانۆیێ لێکدا.. پاشی من ھەمی ب تێھنا سمیۆلۆژیایێ حەلاندە ناڤ شعرەکا زەر..

رەشەبایەکێ شین شعر ڤەرەڤاند و رۆناھییەکا مۆر ژ ئەسمانێ سۆر پەیڤ درکاند: ئەڤین.

کەسێ تاقەتا ڤەن ھەمی رەنگان نەبوو

 ھەر زوو دەرسۆکێن خوە یێن رەش و سپی دانانە بەرچاڤێن خوە

 یەک نەبوو پێ بحەسیێت پەیڤ چییە؟

دارستانەکێ پەیڤ خواند، سروشتی مەھرا وێ ب بارانێ بری و

ئەڤین کرە دەرازینک بۆ شینبوون و وەرارێ

چاڤێن چیای ب پاتکا پەرتووکێ کەفتن و ھاتە بیرێ کەربەک یا د سینگێ خوە دا پەنگاندی..

ب ڤۆلکانەکێ کرە ھەوار، چ نەما بوو دارستان ژی سۆتی

زارۆیەکی پەیڤ دیت، بیرا وی ل ھێسک و فرۆکەیێن وی یێن کاغەزێ ھات

ژنەکێ پەیڤ دیت، خەیالا خوە نیڤیا کر

زەلامەکی تێندا پەیڤێ، پەشیمان بوو پشتی زانی ھەمی پەقینێن شۆرەشێ ب سەرداھاتین

 نەشێن پەیکەرێ تارییا بنکردەیەکێ کەرەکۆز بھەرفینن

زانایەکێ پەیڤ دیت، خوە ھاڤێتە د پەقیشکەکا کەفێ دا و چیرۆکا گرنژینا مەزن نڤیسی

نەزانەکی پەیڤ دیت، ھەرێ حێبەتی بوو و ھەما بێژە ھەر نەدیت!

گەلەک ژ مێژەیە سحرا چ پەیڤان ل من نەبوویی

دا ب بەندەکا پرۆلەتاری ڤە بێژمێ: دھی نە پێر، ئەز دێ ھێمە کوشتن و

بەرێ تە لێبیت چاوا رحا من دێ بیتە پەرواێزا خوەژبیرکرنەکا بێھۆدە؟

شڤێدی ئەز دێ ساخ بمەڤە

بەس دا ببینی دگەل سەمایێ ھەمی دەستێن دەرەکی ب ھژمارتنێ ڤە مژوول د مینن

ب تەنێ دەستێن مە ب خوە نەبن 

یەک دێ شکێت و یێ دی ب سنگێ مە ڤە د نیسییێت

من چ جاران باوەر نەدکر ھەکۆ تسۆنامییەک ژ کتێبان رادبیت

دێ خوین ژ سیبەرا من ژی ھێت!

ئەز ب ئێشان و بەرزەبوونێ ڤە یێ مەحتل بووم

وەختێ تایا ژ دەستدانێ ئەز گرتیم

ھەر ژ دەستدانەک کونەک بوو ل پیستێ منێ بێ سەربۆر

ب حبرێ لێگەریانێ من تاتۆیێ نیلۆفەرێ ژێ چێدکر

ھەما بیرا من دھێت

وەکی فرینا ستێرستێرۆکەکێ ژ دەستێن شەڤێن تیرمەھێ

نزانم من تشتەک ژ دەست دا بوو یان تشتی ئەز؟

وەکی سیناھییا تۆنێلەکێ د فەرھەنگا رەڤینێ دا

چەند بەر ب شینبوونێ ڤە چووبام، ئەو پتر دبەھی

دەنگەکی ب حەقارەت ڤە دگۆت: "مرییە"

و من ھێشتا ئیرادە ھەبوو د ھەناسەیێن خوە دا ساخ بھێلم

بیڤەلەرزەکێ دگۆت: "من ئەرد و خانی ژێ براندن"

ئەز لێ دگەریام ژ نوو د دلێ خوە دا ئاڤا بکەم

تە ھزرا خوە کرییە بەستیبوونا ل بەر ھەتاڤێ چەندا ب ئێشە؟

پاشی ژ خافلەتیڤە تو ب ئاگرێ ژیانێ و ھەڤرکییا مانێ بسۆژی!

ل وان ھەیامان بارانەکا نستۆلژی باری، د ھەر دلۆپەکێ دا دنیایەک درشت

دلۆپەکا ژ ئەنییا من ژووردا چوو بەر ب ئەرزنکا من..

گەھشتە حەفکا من..

دلۆپەک ب سینگێ من ڤە نیسییا..

من ھەست ب سحبەتێن خانمێن رویسێن ل بەردەریایێ کر

بەری ھەتاڤ ئاڤا وان بکەتە ھەلم و بەری ھەلم ببنە ئەورێن نەژدل دبنە باران

مە ئاگرەکێ کەسک بەردا گەنمێ گەرمیان

دیکێلەکا زەر ژ ھژیرێن شنگالێ چوو..

مە ژ کەزیێن رۆژێ فرچەیەکێ وەک بشکۆرینا ئاناھیتایێ چێکر

یەک ب یەک دلۆپێن خوینا جگەرا ئاڤابوونێ کرە رەنگێن کەڤالەکێ زەیتوونی

نزانم ب چ میھرەبانی کێلبێن گۆرگان کانڤاس شەق کر و

ب چ وەحشییەت ئادارۆک ل شوونپەنجێن وان شین بوون!

کەس پێ نەحەسییا کەنگی ئاھاتێن نیکاحێ زەندا تەکنەلۆژیایێ شەڤدا؟

ھەکۆ ھێشتا لویلییێن تفەنگان دگەرم، من ھزر د یەکەم شکەستنا پەراسییا خوە دا دکر

کا ب خەریبییا کێ دبیتە دێوانەکێ زڤستانی و سوجدەیێ بۆ ئاخەکا تێر تەرم دبەت؟

ب خەریبییا داڤێن سپی یێن پرچا ئاسۆیی

یان ب خەریبییا فرینا کاغەزێن ژینوەشین ل ھنداڤ ئەڤرازی و نشێڤییان؟


ئەم بابەتە 34 جار خوێندراوەتەوە