Kamo.jpg

ئەلبێرت كامۆ وەك رۆژنامەنووس

بەشێكی زۆرمان، ئەلبێرت كامۆ (1913-1960) وەك فەیلەسوفێكی بوونگەرایی و رۆماننووس و شانۆنووسێك دەناسین، بەڵام ئەو پێش ئەوەی وەك نووسەرێك دەربكەوێت رۆژنامەنووس بووە.

كامۆ نزیكەی (20) ساڵ لە بواری رۆژنامەوانیدا كاری كردووە، ئەمەیش نەك تەنیا هەر بۆ گوزەران و دەستكەوتنی بژێویی ژیان، بەڵكو لەبەرئەوەیش بووە كە بەلای كامۆ-وە رۆژنامەوانی بوارێكە بۆ شەیدایی و هۆگری و پابەندبوون و یاخیبوون و ...هتد. بۆیە لە چەندین رۆژنامەی جیاجیادا كاری كردووە و سەرنووسەری رۆژنامەی (تێكۆشان Combat) بووە و لێكۆڵینەوە و بەدواداچوون و وتاری رەخنەیی و سەروتار و بابەتگەلی دیكەی لە رۆژنامەكانی جەزائیر و فرەنسادا بڵاوكردووەتەوە. 

ئەلبێرت كامۆ، وەك چۆن لە بوارەكانی فەلسەفە و ئەدەبدا سەركەوتوو بووە و بووەتە ناوێكی جیهانی و تەنانەت خەڵاتی نۆبڵ-ی ئەدەبییشی پێبەخشراوە، بە هەمانشێوە لە كایەی رۆژنامەنووسیشدا هەر سەركەوتوو بووە، تازەترین بەڵگەیەك بۆ سەركەوتوویی كامۆ لە كایەی رۆژنامەوانیدا، كتێبێكی خاتوو ماریا سانتۆس سینێز-ە كە بە ناونیشانی (ئەلبێرت كامۆی رۆژنامەنووس) بەم دواییە بڵاویكردووەتەوە.

كامۆ رۆژنامەنووسێكی ئاسایی نەبووە، چونكە بیری تیژ، سەلیقە، وردبوونەوەی لە كێشە و دیاردەكان، زیرەكی، لەسەرووی هەمووشیانەوە (بێمنەتی)ی ئەو، بەجۆرێك زاخاویان داوە كە ئەو بابەتانەی لەسەردەمی خۆیدا نووسیونی ئێستایش بە بایەخ و گرنگیپێدانێكی زۆرەوە تەماشا دەكرێن و وەك نموونەی كاری رۆژنامەوانی لە كۆلیژەكانی راگەیاندن و رۆژنامەوانیدا دەخوێنرێن. 


ئەم بابەتە 60 جار خوێندراوەتەوە