Wena_bo_babat.jpg

هۆکاری مردن: بێ تۆیێ

محەمەد موەفەقی

فریام کەوە ئەی ئەلکوول

ئەی لە سەدا چل و شەش

فریای دەمارەکانم

ڕۆژەکانم کە تاڵن

فریای سلوولەکانم کەوە

ئەی سەگیترین ئارەق لە شەرما

تا لە گەرمای دەستێکەوە لەو پەڕی غەیب

ئیمان بێنم بە لوورەیێک لە هیچ و کەلەلا

تا مردن کە لابەلایە و 

یا: سەرەتاێکە بۆ سین:

یاااااااااسین!!!

بە دەردی هیچ و

مەرگێکەوە ئەچم

پڕ لە هەمیشە و سەگوەڕێک

بۆ گاڵتەی ئەم دنیا و پێکەنین

کە روو کەم لە گۆڕێک

تا ئەوپەڕی ناوەخت

کە پشت کەم لە تەختێک

خەڵتانی بێ تۆیی!!!

ئەی بێکەسی نوستوو

لەخاکی ئەم غوربەتا ؛ شێرکو!

ئێمە بەرەیەک بووین

کە لە دوای تۆ هاتین و

ئێستا کچێک بووەتە نیشتمانمان

کە ئەنفال بۆ ئەو 

تەنیا ژمارەیەکە و هیچی تر

وەک ژمارەی پێغەمبەرەکانی خوا

لە سەر زەوی

کە هاتن و وتیان

وتیان

وتیان

وتیان: لەعنەت لە نەوت و رۆژهەڵاتی ناوین!!!

 

ئێستا کچێک نیشتمانە 

کە پیاوانی بەعس باوکیان کوشت و نەیوێرا

کە پیاوانی داعش دایکیان ڕفاند و نەیوێرا 

کە براکەی لە کەمپێکی پەنابەران

دەسی دایە خۆکوژی و نەیوێرا

نەیوێرا لە بەر‌مەکیاجەکەی 

کەمێ بگریت

ئێمە بەرەیەک بووین

لە دوای تۆ هاتینە ئەم دۆزەخە و

لە هەمبەر هەواڵی کارەسات

هەر فریای سێلفییەک کەوتین

کە بیکەین بە ئێستۆری و 

چەپ و ڕاس لایکمان کەن

جەماعەتی بێکار و شەڕفرۆش

جەماعەتی ڕۆشنبیر و خانم باز

جەماعەتی دەسبڕ و چالاکی سیاسی

جەماعەتی بە ناو چەپ و قەسەم خۆری بەر دادگاکان

 

من لە دوای تۆ هاتم و

ئێستا پەیجێک نێشتمانە 

کە لەوێ سەروماڵم فیلتێر کراوە

کە لەوێ هەموو شەوێ دەبمە سانچۆ و

بە شەرمێکەوە دەچمە دایرێکتی دۆنکیشۆت

پێی ئەڵێم:

گەورەم!!!

لەو هەموو تەنیاییە

هەر منێک ماوە و 

لە منیش تەنیا نوختەێک

کە تا قامی قیامەت هەڵیدەگرم

بۆ ژێر خاڵی ئەم پرسیارە:

"کەی دێیتەوە؟"

لەوەتەی بیرم بێت

سۆزانیێک لە خەوەکانما

خەریکە با ئەیبات

تکایە خەوەکانم فاڵۆ کە

کە پڕە لە کوردی و خوێنی ئەحمەد کایا!!!

لەوەتەی بیرم بێت

گیرفانم زبڵدانی دەستەکانم بووە

تکایە دەستەکانم فاڵۆ کە

کە پڕن لە نفرین و ڕەجمکراو!!!

لەوەتەی بیرم بێت

باوکم لە شێعرەکانما

لاسایی مردن ئەکاتەوە

تکایە کەمێک لە مردنم فاڵۆ کە

کە پڕە لە خۆم و حەسرەتی بێ تۆیی!!!

لەوەتەی بیرم بێت

لەم وڵاتە هیچ"واو"ێک

پڕ بە دەمی ئێمە نەبوو

تا عادەت کەین بە حەرفی "تا"

تای تەرمی کۆڵبەرێکی سەر سنوور

لە نێو تابووتی زریان و کڕێوەدا

کە نان و بەرەکەتی خوای قاچاخ دەکرد

تای تامەزرۆتر لە مردن

کە بەرەبەیانێکی یاخی 

دەسەکانی ئیبراییمی لە تەمومژ داپۆشی

تای تەنیاییەکانی فاتێح

مردووترین مەجنوونی ئەم شارە

لە ژێر هات و هەرای پردی مەردۆخ

کە ئێستعارەێک بوو لە پردی سیرات

بۆ هەموو ئەوانەی کە ڕۆژێک

کاول ژیان و ڕەنجەڕۆ

بۆ هەموو ئەوانەی وا

بە قەد هەموو مردووەکانی دنیا مردن!!!

 

ئای مردن لە کوێیت؟

ژیان بە شەرمی شواڵەکانمان 

بە ژووری خەوەکانمان فێرە

لێرە ژیان تەنانەت لە کاتی دەسپەڕدا

ئەزانێ بیر لە کام پۆڕن ستار ئەکەینەوە!

 

ئەی کەسی بێکەسان 

کە بەردەوام پێمان ڕائەبوێریت

تکایە کۆڵانێکمان بۆ نازڵ کە 

بنبەست نەبێت

ئەی خوای بێ شەریک

کە پاڵ کەوتوویت

لە کۆتایی نوێژەکانی دایکما 

لەم دێڕە بەدواوە 

پێویستمان بە پێغەمبەرێکی سادەیە 

کە موعجزەی کەمێ ئومێد بێت و

فریای تەنیاییمان بکەوێت

کە موعجزەی کەمێ ئومێد بێت و

بە پێی یاسای ئیدارەی کار

ڕۆژێ هەشت کاتژمێر 

دڵمان بە دواڕۆژی ئەم ژیانە خۆش کات

کە موعجزەی کەمێ ئومێد بێت و

گۆرانیمان بۆ حەڵاڵ کات

ماچمان بۆ حەڵاڵ کات

ئارەقمان بۆ حەڵاڵ کات

چوون لێرە 

تەنیا ئەلکوول 

تەنیا ئەلکوول

تەنیا ئەلکوول

فریای ڕۆژەکانمان ئەکەوێت

فریای دوالاپەڕەی ناسنامەکانمان 

کە جوانەمەرگ بوون بە دەم باوە!!!


ئەم بابەتە 48 جار خوێندراوەتەوە