Ako.jpg

وردە وێنە

ئاکۆ ئەلیاسی - سویسرا

 

1

لە ژێر چەتری تارمایی شەو،

دەستی ناوەتە ژێر چەنەی

عاشقانە،

کز...کز... دەگڕێ

بە لارە ...لار،

گوڵی زەردی فانۆسێک لە تەنیایی دا!

 

2

لەنگەرێکم پێ ببەخشە

یان کەنارێک،

یان دەرفەتێک، بۆ شەکەتیی و هەدادانم

عومرێکە من،

لە ڕووباری خەیاڵی تۆ

دەگلێم و دەنگ

هەر شەپۆلە و

ڕەحمێک ناکەیت بە خنکانم!

 

3

نیگاکانم ئارام ناگرن

لە قووڵایی شیرینیی خەو

سرک و یاخی،

لە گلێنەم، جیا ئەبنەوە.

دەڵێی هەنگی  ژڵەژاوی

هەنگستانن،

بۆ چنینی شیلەی ماچان

بەسەر خونچەی لێوانتەوە

دەفڕن هەتا

لە شینایی مەنگیی چاوت

نوقوم دەبن!

 

4

دەمم نابووە سەر لێوی ئاو.

حیکایەتی سەختیی بەرد و نەرمیی خۆی و

تۆڕ و ماسیی، بۆ باسکردم.

لە پۆرترێتی سەحرایەکدا

بەهارم دی،

بە پێدەشتێک گوڵە شیعری ڕەنگاڵەیی

لە ژێر پێی حەسرەتی هاوین

ترنجابوو...

دیمەنێک لە کارەساتی

مەرگی  ناوەختی وەنەوشە!


ئەم بابەتە 83 جار خوێندراوەتەوە