Mam.jpg

وه‌سێته‌كه‌ى مام جه‌لال جێبه‌جێ نه‌كرا

تابلۆ محه‌مه‌د

من هه‌میشه‌ ویستومه‌ خۆم له‌بڕیارى ناوخۆى حزبه‌ سیاسییه‌كان به‌دوربگرم، چونكه‌ ئه‌وه‌ په‌یوه‌ندى به‌منه‌وه‌ نییه‌ و بڕیارى خۆیانه‌، به‌ڵام كاتێك دێته‌ سه‌ر حزبێكى سیاسى سۆسیال دیموكرات و دامه‌زرێنه‌ى ئه‌و حزبه‌ش (مام جه‌لال)ه‌، نه‌ك من ده‌بێت هه‌موان به‌وردى له‌ بڕیاره‌كانى بڕوانین، به‌تایبه‌تى ئه‌و بڕیارانه‌ى له‌باره‌ى ئازادى راده‌ربڕینه‌وه‌، چونكه‌ مام هه‌میشه‌ پشتیوانى ئازادى راده‌ربڕین بووه‌ و رێگه‌ى نه‌داوه‌ له‌م باره‌وه‌ كه‌س گفتوگۆى له‌گه‌ڵ بكات و وتویه‌تى ئه‌و چى نوسیوه‌ ئێوه‌ وه‌ڵامى بده‌نه‌وه‌، به‌ڵام به‌داخه‌وه‌ دواى ته‌نها (3) ساڵى (1) مانگ و (18) رۆژ به‌سه‌ر كۆچى دوایى مام وه‌سێته‌كه‌ى جێبه‌جێنه‌كرا.

ره‌نگه‌ زۆر كه‌س بپرسێت وه‌سێتى چى؟ هه‌مومان باش ده‌زانین هه‌ركه‌سێك به‌ر له‌ كۆچى دوایى وه‌سێت بكات یاخود نه‌كات، به‌شێك له‌كار و پشتگیرییه‌كانى ده‌بن به‌ وه‌سێت، به‌تایبه‌ت ئه‌گه‌ر ئه‌و كه‌سه‌ باڵا ده‌ست بێت و فه‌رمانڕه‌وا بێت، بۆیه‌ مام جه‌لالیش تا له‌ ژیاندا بوو هه‌میشه‌ پشتگیرى ئازادى راده‌ربڕین و نوسین و چاپكردنى كتێب بووه‌، بۆیه‌ ده‌توانین بڵێین به‌ده‌ر له‌و وه‌سیه‌ته‌كه‌ى كه‌ كردویه‌تى، ئه‌وا ئازادى چاپ و چاپه‌منیش یه‌كێكه‌ له‌ وه‌سێته‌كانى.

ئه‌گه‌ر به‌ خێرایى بگه‌ڕێینه‌وه‌ بۆ شاخ و رێك بۆ ساڵى 1982 كه‌ ده‌كاته‌ (38) ساڵ به‌ر له‌ ئه‌مڕۆ مام جه‌لال پشتگیرى له‌ ئازادى راده‌ربڕین كردووه‌، ئه‌ویش كاتێك محه‌مه‌د موكرى رۆمانى (سه‌گوه‌ڕ) له‌ دووتوێى (102) لاپه‌ڕه‌ ده‌نوسێت و له‌ ناوچه‌کانی ژیر ده‌سه‌ڵاتی یه‌کێنى بڵاویده‌كاته‌وه‌، هه‌ر زوو چه‌ند كه‌سێك دژى ئه‌و رۆمانه‌ ده‌وه‌ستنه‌وه‌، به‌ڵام مام جه‌لال ئامۆژگاریان ده‌كات نوسین به‌نوسین وه‌ڵام ده‌درێته‌وه‌ نه‌ك به‌هه‌ڕه‌شه‌ و بڕیار، بۆیه‌ پێویسته‌ ئه‌وانه‌ى له‌گه‌ڵ بۆچوونه‌كانى نین وه‌ڵامى بده‌نه‌وه‌، دواى ئه‌م قسه‌یه‌ى مام رۆمانه‌كه‌ كاریگه‌ریى زۆرترى ده‌بێت و خوێنه‌رى زۆرتریش به‌دوایدا ده‌گڕێن، بۆیه‌ تا ساڵی 2015 حه‌وت جار چاپكراوه‌ته‌وه‌ و له‌ ئێستاشدا خوێنه‌رى به‌رده‌وامى خۆى هه‌یه‌.

له‌ شاریش و دواى راپه‌ڕین جارێكى دیكه‌ ئه‌و ده‌نگه‌ ناشازه‌ دروست ده‌بێته‌وه‌ كاتێك د. فه‌رهاد پیرباڵ رۆمانى (ملازم ته‌حسین و شتی تریش) ده‌نوسێت، به‌ڵام مام ئه‌مجاره‌ش یه‌كلایی ده‌كاته‌وه‌ و د. فه‌رهاد پیرباڵ ده‌پارێزێت و ئازادی بۆرۆمانه‌كه‌شی فه‌راهه‌م ده‌كات، ئه‌م رۆمانه‌ش له‌م كاته‌وه‌ تاكو ئێستاكه‌ چه‌ندین جار چاكراوه‌ته‌وه‌.

له‌ ئێستاشدا كه‌ مام كۆچى دوایى كردووه‌، مه‌لا به‌ختیار كتێبێك ده‌نوسێت به‌ناونیشانى (له‌برى بیره‌وه‌رى)، ئه‌م كتێبه‌ ئه‌وه‌نده‌ى من ئاگاداربم له‌م ماوه‌ كورته‌ى خۆیدا چاپى دووه‌مى ده‌كرێته‌وه‌، ئه‌وه‌ جگه‌ له‌وه‌ى چاپى یه‌كه‌مى به‌تیراژێكى زۆر چاپكرا، به‌ڵام به‌داخه‌وه‌ له‌ رۆژێكى پیرۆزى ئه‌م حزبه‌دا كه‌ رۆژى شه‌هیدانى یه‌كێتیه‌ وه‌سێته‌كه‌ى مام جه‌لال وه‌لا ده‌نرێت و سزا بۆ خاوه‌نى كتێبه‌كه‌ ده‌رده‌كه‌ن، من له‌وه‌ دڵنیام مام جه‌لال چ له‌ شاخ و چ له‌ شاریش پشتگیرى ئازادى راده‌ربڕینى كردوه‌، كه‌ نمونه‌ى ئه‌م دوو به‌رهه‌مه‌مان به‌نمونه‌ هێنایه‌وه‌، دڵنیام له‌ ئێستاشدا له‌ناو گۆڕدا پشتگیریى ئه‌م به‌رهه‌مه‌ى مه‌لا به‌ختیاره‌ و ئه‌گه‌ر له‌ ژیاندا بمایه‌، دڵنیام نه‌ك هه‌روه‌كو موكرى و پیرباڵ پشتگیرى له‌ كتێبه‌كه‌ى مه‌لا به‌ختیار ده‌كرد، به‌ڵكو پێشه‌كیشى بۆ ده‌نوسى و ده‌یوت: "وه‌ڵامى من و مه‌لا به‌ختیار بده‌نه‌وه‌ به‌نووسین، نه‌ك ده‌ركردنى بڕیار"..

من سه‌یرم له‌وه‌ دێت له‌ كۆى ئه‌و ژماره‌ زۆره‌ كه‌سێك نه‌بوو ده‌ست هه‌ڵبڕێت و بڵێت: هه‌ڤاڵان ئه‌وه‌ى ئێمه‌ بڕیارى لێوه‌ ده‌ده‌ین هه‌ڵه‌یه‌، چونكه‌ مام له‌ شاخ و له‌ شاریش دژى بڕیارێكى له‌م جۆره‌ بووه‌، دڵنیام ئێستا له‌ گۆریشدا له‌گه‌ڵ بڕیارێكى له‌م جۆره‌ نییه‌.

له‌ كۆتایدا ده‌ڵێم: "هه‌قه‌ مه‌لا به‌ختیار به‌ بڕیارێكى له‌م شێوه‌یه‌ نیگه‌ران نه‌بێت، چونكه‌ دڵنیام به‌شێكى زۆرى ئه‌وانه‌ى ده‌ستیان هه‌ڵبڕیوه‌ كتێبه‌كه‌یان نه‌خوێندۆته‌وه‌، به‌ڵكو نیگه‌رانى مه‌لا به‌ختیار له‌وه‌وه‌ بێت كه‌ وه‌سێته‌كه‌ى (مام جه‌لال)یان شكاندووه‌ و جێبه‌جێیان نه‌كردووه‌".


ئەم بابەتە 128 جار خوێندراوەتەوە