11111111111111.jpg

شانۆگەریەكی نوێ‌ و جوان - (شینە لە شیندام)

مەلا بەختیار

ئێوارەی 26/11/2020 بینەری شانۆگەری (شینە لە شیندام) بوم. تێكڕا (70) كەسێكی شانۆ دۆست ئامادەبون، شوێنەكەش كە سەر تەختەی شانۆی هۆڵی رۆشنبیری بوو، هەر هێندەی دەگرت. لە ناو هۆڵەكە كەس دانەدەنیشت. شێوەی پێشكەشكردنەكەیان وا دانابوو.

دەتوانم بڵێم: ئەم شانۆگەریە، لەو نمایشە نوێیانە بوون، كە ساڵەهایە رویان لە شانۆی كوردی كردووە. بەڵام شانۆگەری كەم و دەگمەنن.

تیپی (ز. بۆ شانۆ) بە هاوكاری پەیمانگای هونەرە جوانەكانی هەڵەبجە – بەشی هونەری شانۆ، لەڕێی شەش ئەكتەری لاوەوە، كە یەكێكیان كچۆڵەیەكی بەهرەمەند بوو (سۆزیار حامید) دەقەكەیان پێشكەش كرد. نوسەر و دەرهێنانی (راڤیار نەوزاد) بوو، كە بەڕای بەندە بەهرەمەندە.

راڤیار؛ بەهرەمەند بوو، هەم لە نوسین و ئازایەتی نوسینی دەقەكە، كە بەشی زۆری بوێری بەگژچونی فەلسەفەی ئایدیالیستی بوو؛ هەم لە دەرهێنانەكە كە ستایلێكی نوێی دەرهێنان بوو.

راڤیار، شانۆكە و شانۆگەریەكە و ئەكتەرەكانی، خستبووە ناو بازنەی بینەران و بینەرانیشی ئاوێتەی جوڵە و دیالۆگ و دایەلۆگی شانۆگەریەكە كردبوو.

ئامادەبوان چركە بە چركەی (50) دەقیقەی دانەبڕاوی دەقەكە و نمایشەكە، بەستبووەوە بە جوڵە و گفتوگۆ و توانای ئەكتەرەكان. لە یەك كاتدا، بینەر بینەر و لە ناخیشدا، كارئەكتەریش بوون.

خۆم چێژم لە دەقەكە و نمایشەكە و چۆنیەتی پێشكەشكردنەكەش بینی. لەناو تێكستەكاندا، خەیاڵی فەلسەفی جوان جوانی ئەخوڵقاند. مرۆڤ لە خەیاڵدانی دێرنەی ئاخنراو بەبۆچونی سەپێنراو، بۆ دیدگەلێكی رەخنەیی نوێ‌ چەشن رادەچڵەكاندا.

دەقەكە و نمایشەكە بە بینەریان دەگوت: ژیان و كۆمەڵ و خێزان و تاك، ئەوها نییە كە تەلقین دراوی و راهێنراوی، بەڵكو لەدێر زەمانەوە، ئەندێشە جیاوازەكان هەبون و هەن، بەڵام رابوردوی سەپێنراو بەربەستن لە بەردەم ئێستای داهێنراو.

ئەم ململانێی لەناو كۆمەڵ و خێزان و هزردا دەمێكە هەن، ئەم شانۆگەریە و نوسەر و دەرهێنەرەكەی، بەجوانی بەرجەستەی كردوە و ئەكتەرەكانیش: 1-خەڵات نەوزاد 2-شنیا هوشیار 3-فریاد حەسەن 4-راویەر هوشیار 5-زریان حەكیم 6-ئاسۆ رەفیق 7-سۆزیار حامید.. هەریەكەیان، لێواو لێوی بارە دەرونیەكەی نوسەر، ئەكتەری سەركەوتوو بون، هەتا بە دیالۆگی سەر شانۆ، بەڵام بە جوڵەی هاوئاهەنگی نێوانیان، لەسەر تەختەی چوار چەرخە كە بە پێی دیمەنەكان لە شانۆكە دەكرایە دوو بەش و هەر بەشێكی شانۆگەریەكەی دەكردە دوو دیوی بەرامبەر یەك، دژ و جیاواز، بەڵام لێكدانەبڕاویش!

بێگومان شانۆگەریەكە بێبەش نەبوو لە رەخنە. بەڵام ئەمە كاری رەخنەگرەكانی شانۆیە.. نەك من، ناشمەوێ‌ رەخنەكانی خۆم باسبكەم.. چونكە ئەترسم لە ئاستی رەخنەی هونەریدا نەبن.

دەستخۆشی لەم تیپە جوانە دەكەم. لە (شاد حەیدەر)ی ئاوازدانەری زیندوی سەر شانۆكەش دەكەم.. كە خۆی و هاوڕێكانی جوڵە بە جوڵە.. بە ئامێرەكان.. هاوئاهەنگیان لەناو شانۆگەریەكە و لەكەشی نیمچە تاریكی شانۆكەدا، دەخوڵقاند.

ئومێدەوارم راڤیار و ئەم تیپە، لە بەرهەمی داهێنەرانەیان بەردەوام بن. شانازیشە بۆ هەڵەبجە لە ماوەیەكی كەمدا.. شانازیەكانی رابوردوی لە بواری جۆراوجۆردا.. سەرەڕای نوزە لێبڕینی ساڵەهای ئازادیەكان لە شارەكە، بوژاندۆتەوە.

Shina


ئەم بابەتە 98 جار خوێندراوەتەوە