شەڕ و ئاشتی ناونیشانی شیعرێکی شاعیری فارس "مەحموود داوودی" ە لە کتێبی "شەوێک' دووی نیوەشەو" کە لەلایەن نووسەر و وەرگێڕ "بەڕۆژ ئاکرەیی"ەوە کراوە بەکوردی و وەشەنخانەی باڵندە تایبەت بە شیعر چاپ و بڵاوی کردووەتەوە.

مەحموود داوودی " مەحموود داوودی، شاعیری ئێرانی، (١٩٥٤ ئابادان)، لە هەشتاکانەوە دانیشتووی سویدە. تیاتری خوێندەوە. چیرۆکی نووسیوە. کاری شانۆییی کردووە و شیعریش دەنووسێت. کۆمەڵە شیعری “چەند دیمەن” تاقەبەرهەمی داوودییە، کە ئەگەر هەوڵی برادەرەکانی نەبا، قەت بڵاو نەدەبووەوە. وەک بەرهەمەکانی تری. –

شیعرەکە باسی جەنگ دەکات، هەمان ناونیشانی ڕۆمانە بەناوبانگەکەی "تۆڵستۆی" ڕوسی هەیە.

باسی تۆراندنی یەکجاری باڵندە کان دەکات لەو خاکەی کە جەنگ تیایدا جوانی و هێزە سروشتییەکان دەکوژێت..

سایتی "گەلاوێژ" لەگەڵ پێشنیاری خوێندنەوەی کتێبەکە، ئەم شیعرە بۆ خوێنەرانی بڵاودەکاتەوە:

 

شەڕ و ئاشتی

شەڕ کە دەستی پێ کرد

سەرەتا باڵندەکان ڕۆیشتن

پاشان

پارێزگار و خێزانەکەی ڕۆیشتن

پاشان ئەوانەی زیرەک بوون و باڵندە نەبوون ڕۆیشتن

پاشان

خەڵکی ئاسایی ڕۆیشتن

پاشان دایکە بێمنداڵەکان ڕۆیشتن

ئاشتی کە دەستی پێ کرد

شارەوان و خێزانەکەی گەڕانەوە

ئەوانەی زیرەک بوون و باڵندە نەبوون گەڕانەوە

خەڵکی ئاسایی گەڕانەوە

دایکە بێمنداڵەکان گەڕانەوە

بەڵام

باڵندەکان

قەت نەگەڕانەوە..

ئەم بابەتە 125 جار خوێندراوەتەوە