Frox.jpg

دڵم بە باخچەکە ئەسووتێ

فرووغ فەڕوخزاد - و: ئازاد بەرزنجی

لە کتێبی" ژنێک لەبەردەم وەرزێکی سارددا"وە

كەسێ‌ نییە بیر لە گوڵەكان بكاتەوە

كەسێ‌ نییە بیر لە ماسییەكان بكاتەوە

كەس نایەوێ‌ بڕوا بكا

باخچەكە خەریكە ئەمرێ‌

دڵی باخچەكە لەژێر هەتاوا ئاوساوە

زەینیشی وا خەریكە هێدی هێدی

لە یادەوەرییە سەوزەكان خاڵی ئەبێ‌

هەستی باخچەكەش هەر ئەڵێی

شتێكە تەنیا و لە گۆشەیەكی باخچەكا داڕزاوە.

حەوشەكەی ماڵی ئێمە تەنیایە

حەوشەكەی ماڵی ئێمە

لە چاوەڕوانیی بارینی هەورێكی نەناسا

باوێشك ئەدا

حەوزی ماڵەكەشمان خاڵییە

ئەستێرە بچووكە بێئەزموونەكان

لە بەرزاییی درەختەكانەوە ئەكەونە سەر زەوی و

لە پەنجەرەی ڕەنگزەردی ماڵی ماسییەكانەوە

شەوانە دەنگی كۆكە دێ‌

حەوشەكەی ماڵی ئێمە تەنیایە

باوكم ئەڵێ‌:

“لە من ڕۆیی

لە من ڕۆیی

من باری خۆمم برد

من كاری خۆمم كرد”

لە سپێدەشەوە تا ئێوارێ‌

یا شانامە ئەخوێنێتەوە

یا “ناسیخولتەواریخ”

باوكم بە دایكم ئەڵێ‌:

“نەفرەت لە چی ماسی و مەلە

وەختێ‌ كە من مردم ئیدی

باخچە هەبێ‌ یاخود نەبێ‌

بە من چی

من بەتەنها مووچەی تەقاوتیم بەسە.”

دایكم تەواوی ژیانی

بەرماڵێكە ڕاخراو

لە بەردەم ترسی دۆزەخا

دایكم هەمیشە لەبنی هەر شتێكا

بەدوا جێ‌ پێی گوناهێكا ئەگەڕێ‌ و

بە بڕوای ئەو كوفری گیایەكە

باخچەكەی وا پیس كردووە.

دایكم تەواوی ڕۆژ دووعا ئەكا

دایكم گوناهبارێكی سروشتییە

فوو بە گوڵەكانا ئەكا و

فوو بە ماسییەكانا ئەكا و

فوو بە خۆیا ئەكا

دایكم چاوەڕوانی پەیدابوون[1] و

بەخششێكە لە ئاسمانەوە دائەبەزێ‌.

براكەم بە باخچەكە ئەڵێ‌ گۆڕستان

براكەم بە پەشێویی گیاكان پێئەكەنێ‌ و

تەرمی ئەو ماسییانە ئەژمێرێ‌

كە لەژێر پێستی نەخۆشی ئاودا

ئەبن بە گەردیلەی ڕزیو

براكەم بە فەلسەفە موعتادە

براكەم چاری باخچەكە

لە وێرانبوونیدا ئەبینێتەوە.

ئەو مەست ئەبێ‌ و

مشتەكۆڵە بە دارودیوارا ئەكێشێ‌ و

ئەیەوێ‌ بڵێ‌ كە زۆر دەردەدار و شەكەت و بێهیوایە

ئەو نائومێدییەكەشی

وەكوو ناسنامە و ساڵنامە و دەسڕ و چەرخ و قەڵەمەكەی

لەگەڵ خۆیدا

بۆ كۆڵان و بازاڕ ئەبا

نائومێدییەكەشی هێند بچووكە

كە گشت شەوێ‌

لە ئاپۆرەی مەیخانەیەكا ون ئەبێ‌.

خوشكیشم كە دۆستی گوڵەكان بوو

كاتێ‌ دایكم لێی ئەدا

ڕازە سادەكانی دڵی خۆی

ئەبردە لای كۆڕە میهرەبان و بێدەنگەكەی ئەوان و

ناوبەناویش خێزانی ماسییەكانی

بۆ شیرینی و هەتاو داوەت ئەكرد...

ئەو ئێستا ماڵی وا لەوبەری شار

لەناو خانووە ساختەكەیدا

لەگەڵ سوورەماسییە ساختەكانیا و

لەپەنا عیشقی هاوسەرە ساختەكەیا و

لەژێر لقی دارسێوە ساختەكانا

مناڵی سروشتی ئەخاتەوە

ئەو

هەركاتێ‌ بۆ دیدەنیی ئێمە دێ‌ و

چمكی كراسەكەی بە هەژاریی باخچەكە پیس ئەبێ‌

بە كۆڵۆنیا خۆی ئەشوا

ئەو

هەركاتێ‌ بۆ دیدەنیی ئێمە دێ‌

دووگیانە.

حەوشەكەی ماڵی ئێمە تەنیایە

حەوشەكەی ماڵی ئێمە تەنیایە

تەواوی ڕۆژ

لەودیو دەرگاكەوە دەنگی پارچەپارچەبوون و

تەقینەوە دێ‌

هاوسێكانمان لە زەویی باخچەكانیانا لەبریی گوڵ

خومپارە و ڕەشاش ئەڕوێنن

هاوسێكانمان سەرپۆش ئەدەن بەسەر

حەوزە كاشییەكانیانا

حەوزە كاشییەكانیش

بێ‌ ئەوەی خۆیان بیانەوێ‌

عەمباری شاراوەی بارووتن

مناڵانی گەڕەكەكەشمان، جانتاكانی قوتابخانەیان

پڕ كردووە لە بۆمبی بچووك.

حەوشەكەی ماڵی ئێمە گێژە.

من لە زەمەنێك ئەترسم

كە دڵی خۆی ون كردووە

من لە تەسەوری بێهودەییی ئەم هەموو دەستە و

لە بەرجەستەبوونی نامۆیی ئەم هەموو دەموچاوە ئەترسم

من وەكو ئەو قوتابییەی

كە شێتانە حەزی لە وانەی ئەندازەیە، تەنیام و

بیر ئەكەمەوە كە ئەبێ‌ باخچەكە ببرێ‌ بۆ نەخۆشخانە

من بیر ئەكەمەوە...

من بیر ئەكەمەوە...

من بیر ئەكەمەوە...

دڵی باخچەكەش لەژێر هەتاوا ئاوساوە

زەینیشی وا خەریكە هێدی هێدی

لە بیرەوەرییە سەوزەكان خاڵی ئەبێ‌...

[1] پەیدابوون: مەبەست لێی پەیدابوون (یان دەركەوتنی) مەهدیی چاوەڕوانكراوە.

* ئاماژەیەک بۆ خوێنەر: لەم قەسیدەیەدا "باخچە" سیمبوڵە بۆ کۆمەڵگا.


ئەم بابەتە 114 جار خوێندراوەتەوە