Cgawder.jpg

8/ی مارس .. رۆژی هەڵوێستە

8/ی مارس.. رۆژی جیهانیی ژنانە. ژنانی كوردستانیش، ساڵانە ئەم  یادە دەكەنەوە. فێمێنیزمی رۆشنگەری، لەكاتێكدا پیرۆزبایی لەژنانی كوردستان و جیهان بەم بۆنەیەوە دەكەین، لەهەمان كاتدا، دوور لە بەڕێكردنی راگوزەری یادەكە، هەڵوێستی رۆشنگەریمان لەیادەكەدا، رۆشندەكەینەوە. 

ژنانی سەربەستیخواز!

لەم یادەی 8/ی مارسدا، سەدەیەك بەسەر دامەزراندنی دەوڵەتی  داسەپاوی عێراق؛ (75) ساڵ بەسەر دامەزراندنی پارتی دیموكراتی كوردستان؛ (46) ساڵ بەسەر دامەزراندنی یەكێتیدا؛ (30) ساڵیش بەسەر سەركەوتنی راپەڕیندا تێدەپەڕێ؛ كەچی بەداخەوە، هێشتا لایەنی كەمیی نەریتی باوكسالاری، وەكو ستەمی فرەلایەن بەرامبەر ژن، لەبەرنەبونی ستراتیژی رۆشنگەری لە سیستەمی حوكمڕانی و لەناو لایەنە سیاسیەكاندا، بە پەروەردەی نوێ‌ نەگۆڕدراوە. ئەوەش لە سەردەمەكەدا دەبینرێ، بە بەراورد بەسەردەمی رابردوو، ژنان ئێستا خاوەن پێگەی ئابوری گەلێ‌ باشترن .. ئاستی خوێندەواریشیان بەرزە، كەچی لە ژیانی دواكەوتووی كوردەواریدا، هێشتا لە هەژمونگەری باوكسالاری، راستەوخۆ و ناڕاستەوخۆ، رزگاری نەبووە. وەكو فێمێنیزمی رۆشنگەری، بەڵێ‌ كەمتەرخەمی رێكخراوەكانی ژنان و ژنان بەگشتی لەم بارەوە دەبینرێت. بەڵام ئۆباڵی سەرەكی ئەم دۆخە شەرمەزارییە، لەئەستۆی دەسەڵاتە رەهاكانی باوكسالاری پیاوانە. بەشێكی ئەم نەریتە باوكسالاریەش، بۆ هەژمونگەری رەهای ئاین و مەزهەبەكان، لەتەواوی جومگەكانی حوكمڕانی و ژیانی كۆمەڵایەتی، بەهۆی سەرنەخستنی حكومەتێكی مەدەنیەوە، بەردەوامە. تارادەیەكیش، هی ئەو رێسا و یاسایانەشە كە تائێستا هەرێمی كوردستان پەیڕەویان لێدەكات.

نەریتی باوكسالاری، كە سەرچاوەی سەدان گرفت و تاوانی كۆمەڵایەتین بەرامبەر ژنان، تەنانەت خودی پیاوانیش، تەنها بەهەڵوێستی لێبڕاوی ژنانی سەربەستیخواز، دەگۆڕدرێ‌، نەك بەو ریفۆرمانەی زادەی بەزەیی  پیاهاتنی پیاون بەرامبەر ژنان. 

ژنانی سەربەستیخواز، ئەركیانە رێبازی یەكسانیان، لە رێبازی خۆپارێزییەوە بۆ رێبازی پەروەردەی رۆشنگەری و هەڵوێستی ئاشكرای سەربەستیخوازی هاوچەرخ، بگۆڕن.

ئەركی ژنانە.. لەزانكۆكان، پەیمانگاكان، دواناوەندی و ناوەندە كۆمەڵایەتیەكان، لەڕێی گروپ و رێكخراوە لێپرسراوەكانی خەباتی ژنانەوە، نوسەران و چالاكوانەكانی بزاڤی فێمێنیزمەوە، تێبكۆشن ژنانی رۆشنگەر پەروەردە بكەن و لەشار و شارۆچكەكاندا، رابەرایەتی راستەقینەی خەباتی یەكسانیخوازیان بكەن، ئەمەش پێویستی بەوەیە كەوا:

یەكەم: كۆنفرانسی هاوبەش سازبكەن و ستراتیژیەكی نوێی خەباتی فێمێنیستی گەڵاڵە بكەن.

دووەم: میدیا بەگشتی و سۆشیال میدیا بەتایبەتی، بكەنە مەیدانی پەروەردە و هەڵوێست  وەرگرتن و رەخنەگرتن و سوربون لەسەر داخوازیەكانیان.

سێیەم: بەرە بەرە فشاری خواستی فێمێنیستی بخەنە سەر حكومەت، هەتا مافی ئابوری و كۆمەڵایەتی و سیاسی ژنان، یەكسانی تەواو لەگەڵ پیاواندا، رەچاو بكات.

چوارەم: ژنكوژی.. لەژێر هەر پاساوێكدابێ‌، بەتاوانی نەبەخشێنراو، یاسای بۆ داڕێژرێ‌.

پێنجەم: خوێندنگاكان لەسەرەتاییەوە بۆ باڵاتر، تێكەڵاوی كچ و كوڕ بكرێن و لەهیچ لایەكی قبوڵ نەكرێ‌، بەربەستی ئەم پرۆسە مەدەنییە بێ‌.

شەشەم: بە كولتوركردنی یەكسانی جێندەری و بڵاوكردنەوەی هۆشیاری جێندەری لە ناوەندەكانی خوێندا.

حەوتەم: پاككردنەوەی پرۆگرامی خوێندن كە لەسەر بنەمای جیاكاری جێندەری داڕێژراون.

- بژی یادی 8/ی مارس، یادی هەڵوێستی ژنان

- با تێكبشكێنین، كولتوری باوكسالاری.

- بێتەدی یەكسانی راستەقینە

 

پلاتفۆرمی دابڕان

فێمێنیزمی رۆشنگەری

8/3/2021


ئەم بابەتە 71 جار خوێندراوەتەوە