ASo.jpg

نان لە لێوت دەسڵەمێتەوە

ئاسۆ سەڵاح

ئەم تەنهاییەت ڕۆژێک دەپژێ و

بێدەنگیت دەخاتە سەر دەرگا و دیوارەکان

پێڵوەکانت حیکایەت دەگێڕنەوە و دەبارێن

وەک خۆر کە لەمێژە باریوە و لەبارینیدا

تۆ و خاک و زەویت دەگەڕێنێ و دەگریەنێ،

تۆ دەچیتەوە وەک مۆم کە بێ ویستی خۆی دەچێتەوە و

وەک سەهۆڵبەندانە لوتبەرزەکان کە مەحف دەبنەوە و

وەک سەگێکی ڕەحم بڕاو دەبڕێیتەوە،

شیدەبیتەوە وەک قەنارە کە ژیان هەڵدەلوشێ و هێشتاش پێدەکەنێ

کە لە پێکەنینیدا یادگارەکانت بشکێن و ڕووبار بوەستێ و خەونت شەق بەرێ و

مانگ ڕووت لێ وەرگێڕێ و خاک لەبیرخۆیت بەرێتەوە و

نان لە لێوت بسڵەمێتەوە و ئاو تینوی خنکانت بێت،

تۆ دەفەوتێیت وەک فەوتانی پەپولەکان لە بەهاردا و

وەک فەوتانی کەشتییەکان لە زەریادا،

ون دەبیت کە دەبێت ون بیت کە نازانیت بۆ ڕووەو ونبوون چویت و

دەچیت و هێشتاش دەتەوێت نەگریت

ڕەنگە زەمەن مۆڵەتت بدا تا ڕووخسارت

لە ئاوێنەکاندا بدۆزیتەوە و فرمێسکەکانت بخۆیتەوە

وەک چۆلەکەکان کە مەرگ دەخۆنەوە و

وەک عاشقەکان کە تکا  لەڕابردوو دەکەن و

وەک من کە ئەم شیعرە لەبری تۆ دەنووسم ..


ئەم بابەتە 545 جار خوێندراوەتەوە