Samuel_Beckett.jpg

بەدەم چاوەروانی گۆدۆوە سەردەنێینەوە

شوان ئەحمەد کردویەتی بە کوردی

دەربارەی ساموئێل بیکێت-

نوسه‌ری ئه‌م كتێبه‌ (لۆرنس گرینه‌ر)ی ڕه‌خنه‌گره‌ كه‌پسپۆڕه‌ له‌بواری ئه‌ده‌بی نوێدا. له‌م كتێبه‌دا باس له یه‌كێك له‌كاره‌كته‌ره‌ هونه‌ری و ئه‌ده‌بیه‌ گرنگه‌كانی سه‌ده‌ی بیسته‌م ده‌كات، ئه‌ویش (ساموئێل بیكێت)ه‌. وه‌كی ده‌زانرێت (بیكێت) ساڵی 1906 له‌بنه‌ماڵه‌یه‌كی پرۆتستانت مه‌زهه‌ب، له دبڵنی پایته‌ختی ئیرله‌ندا هاتۆته‌ دنیاوه‌. خوێندنی ئاماده‌یی و زانكۆی له‌ وڵاته‌كه‌ی خۆیدا خوێندووه‌.

ساڵی 1928 له‌په‌یمانگای باڵای مامۆستایان له‌پاریس وه‌ك مامۆستای زمانی ئینگلیزی ده‌ست به‌كار ده‌بێت. دوای ئه‌وه‌ی له‌ نێوان ساڵانی 1931-1937 چه‌ند جارێك سه‌ردانی ئینگلته‌را و ئه‌ڵمانیا و ئیرله‌ندا ده‌كات، ساڵی 1938 به‌ یه‌كجاری له‌ پاریس نیشته‌جێ ده‌بێت.

سه‌روه‌ختێكیش جه‌نگی دووه‌می جیهانی ده‌ست پێده‌كات، ده‌چێته‌ ریزی پارتیزانه‌ فه‌ره‌نسیه‌كان له‌ دژی نازیسته‌ داگیركاره‌كان. هه‌رچه‌نده‌ فه‌ره‌نسیش نه‌بوو، به‌ڵام چالاكانه‌ ئه‌ر‌كی خۆی به‌جێ دێنێت. پاشان له‌ ساڵی 1942 ڕوده‌كاته‌ ناوچه‌ شاخاویه‌كان، له‌ ترسی ئه‌وه‌ی نه‌ك پۆلیسی نهێنی ئه‌ڵه‌مانی (گستاپۆ) ده‌سگیری بكه‌ن. له‌و ماوه‌یه‌دا هه‌م بۆ خۆشاردنه‌وه‌و هه‌م بۆ نان په‌یدا كردن، كاری جوتیاری ده‌كات.

نوسه‌ری ئه‌م كتێبه‌ له‌ به‌شێكی دیكه‌ی چیرۆكی ژیانی( ساموئیل بیكیت)دا ده‌ڵێت: (دوای ئه‌وه‌ی له‌ ساڵی 1944 پاریس له‌ چنگی نازیه‌كان ئازاد كرا، بیكیت ده‌گه‌ڕێته‌وه‌ بۆ شاره‌كه‌ و له‌وێدا ده‌ست به‌ نوسینی زۆربه‌ی به‌رهه‌مه‌كانی ده‌كات و به‌ شێوازی تایبه‌تی خۆشی، به‌شداری ژیانی ئه‌ده‌بی فه‌ره‌نسی ده‌كات. له‌ 1946 به‌دواوه‌ به‌ فه‌ره‌نسی ده‌نوسێت، به‌ڵام ده‌ستبه‌رداری زمانی ئینگلیزیش نابێت).

ساڵی 1969 خه‌ڵاتی نۆبڵ له‌ بواری ئه‌ده‌بدا وه‌رده‌گرێت، له‌و كاته‌شدا له‌ لوتكه‌ی شۆره‌ت و شكۆمه‌ندیدا بوو.یه‌كێك له‌ شاكاره‌ مه‌زنه‌كانی (بیكیت)، شانۆنامه‌ی (بەدەم‌ چاوه‌ڕوانی گۆدۆ)یه‌ كه‌ باس له‌ ژیانی دوو كه‌سایه‌تی ده‌كات به‌ ناوی (فلادیمێر و ئیستراگۆن) و‌ له‌ چاوه‌ڕوانی كه‌سێكدان به‌ ناوی (گۆدۆ)وه‌.

دیمه‌نی یه‌كه‌می ئه‌م به‌رهه‌مه‌ ئه‌وه‌یه‌، دوو كه‌س ده‌بینین  له‌ قه‌راغ ڕێیه‌كدا و له‌ ته‌نیشت دره‌ختێكی ڕوته‌نداو له‌ بیابانێكی چۆڵ و هۆڵدا، وه‌ستاون و چاوه‌ڕێن. به‌ڵام (گۆدۆ) نایه‌ت، ناچار ڕۆژێكی دیكه‌ چاوه‌ڕێی ده‌كه‌ن، به‌ڵام هه‌ر دیار نابێت.

له‌ بری (گۆدۆ) دوو كاره‌كته‌ری لێبوك دێن، ئه‌م دوانه‌ش به‌وانه‌ ده‌چن كه‌ له‌ سێركدا كارده‌كه‌ن و ناویان (بوزۆ و لیكی)یه‌.یه‌كه‌میان دووه‌میانی وه‌ك سه‌گ په‌تكردووه‌و به‌ دوای خۆیدا ڕایده‌كێشێت، وا دێته‌ پێش چاو كه‌ كۆیله‌ و خزمه‌تكاری بێت.

به‌مجۆره‌ ڕۆژ دێت و ده‌ڕوا، به‌ بێ ئه‌وه‌ی (گۆدۆ) بێت. دواجار په‌رده‌ به‌سه‌ر دیمه‌نی (فلادیمێر و ئیستراگۆن)دا داده‌درێته‌وه‌و هه‌ردووكیان پیرو كه‌نفت بوون، له‌ چاوه‌ڕوانی كه‌سێكی سه‌یر و سه‌مه‌ره‌دا كه‌ هه‌رگیز نایه‌ت، سه‌ره‌ڕای چاوه‌ڕوانی زۆری ئه‌وانیش بۆی. له‌ كۆتایدا هه‌ردوكیان له‌ ڕێی خۆخنكاندنه‌وه‌، هه‌وڵی كوشتنی خۆیان ده‌ده‌ن.

شانۆگه‌ری (بەدم‌ چاوه‌ڕوانی گۆدۆ)وە، به‌ پێچه‌وانه‌ی شانۆی كلاسیكیه‌وه‌، هیچ گرێیه‌كی تێدانییه‌. نه‌ڕوداوی تێدایه‌ و نه‌ هیچ شتێكی لۆژیكی، به‌ڵكو ته‌عبیره‌ له‌ پوچێتی ژیان و بوون. ئێمه‌ هه‌میشه‌ چاوه‌ڕێی شتێك ده‌كه‌ین، به‌ڵام ئه‌و شته‌ هه‌رگیز نایه‌ت و ڕونادات. ته‌نانه‌ت گه‌ر بێتیش، ئه‌وا چاوه‌ڕێی شتی دیكه‌ ده‌كه‌ین و.. هتد.

لێره‌وه‌ ژیانمان پڕ ده‌كه‌ین له‌ قسه‌ و قسه‌ڵۆكی پووچ و بێمانا، به‌ڵام ئەوە گرنگه‌ بۆ كات به‌سه‌ربردن. ئێمه‌ دواجار چاوه‌ڕێی مردن ده‌كه‌ین كه‌ به‌ دڵنیاییه‌وه‌ دێت، به‌ پێچه‌وانه‌ی (گۆدۆ) وه‌ كه‌ هه‌رگیز نایه‌ت. نوسه‌ری ئه‌م كتێبه‌ (لورنس گرینه‌ر)، پێیوایه‌ شانۆگه‌ری (بەدەم چاوه‌ڕوانی گۆدۆ)وە له‌ ساڵی 1948 نوسراوه‌، به‌ڵام تا ساڵی 1952 نه‌خراوه‌ته‌ سه‌ر ته‌خته‌ی شانۆ.

ئێمه‌ بۆ ئه‌وه‌ی به‌ باشی له‌م ده‌قه‌ تێبگه‌ین، پێویسته‌ بگه‌ڕێینه‌وه‌ بۆ بارودۆخی ئه‌و سه‌رده‌مه‌. هه‌رچه‌نده‌ (بیكێت) له‌ سیاسه‌ته‌وه‌ دوور بووە، به‌ڵام وه‌كی كه‌سانی دی ئه‌و شتانه‌ی له‌ چوارده‌وریدا ڕویان ده‌دا كاریان تێده‌كرد. وه‌ك نوسه‌رانی دیكه‌ تێكه‌ڵبونی شته‌ تایبه‌تیه‌كانی خۆی  لەگەڵ شتە گشتیەکاندا، دەستیان لە دروستکردنی تێڕوانینی ئەو بۆدنیا هەبووە.

وه‌ك باسمان كرد (بیكێت) سه‌ره‌تای ژیانی به‌ وێڵگه‌ردی له‌ نێوان چه‌ند وڵاتێكی ئه‌وروپیدا ده‌ستپێكرد كه‌ ئه‌مانه‌ بوون: (ئیرله‌ندا، ئنكلته‌را، فه‌ره‌نسا، ئه‌ڵه‌مانیا)، به‌ڵام دواجار له‌ فه‌ره‌نسا گیرسایه‌وه‌و له‌وێدا نیشته‌جێ بوو.

ساڵی 1937 له‌ پاریس توشی ڕوداوێكی سه‌یر و ناخۆش ده‌بێت، كاتێك زه‌لامێك بێ هیچ و له‌ خۆڕا په‌لاماری ده‌دات و به‌ر چه‌قۆی ده‌دات. ڕه‌نگه‌ ئه‌مه‌ كاریگه‌ری هه‌بووبێت له‌سه‌ر دروستكردنی ئه‌و جیهانبینیه‌ پوچگه‌راییه‌ی ئه‌و بۆ ژیان. وه‌كو ده‌زانین ئه‌و یه‌كێكه‌ له‌ ڕێبه‌رانی شانۆی ئه‌بسۆرد.

گومانی تێدا نییه‌  ژیانی وێڵگه‌ردانه‌ی، ده‌ستی هه‌بوو له‌ دروستكردنی تێڕوانینی بۆ دنیا و تانه‌ گه‌یشته‌ ته‌مه‌نی په‌نجا ساڵی، ئارام نه‌بووه‌وه‌و سه‌قامگیر نه‌بوو. له‌و كاته‌دا چاوه‌ڕێی ئه‌وه‌ی ده‌كرد ده‌روویه‌كی لێبكرێته‌وه‌، به‌ڵام بێ ئه‌نجام.ته‌واو وه‌ك (گۆدۆ)ی پاڵه‌وانی شانۆگه‌ریه‌ به‌ناوبانگه‌كه‌ی. سه‌رباری ئه‌وه‌ش ڕوداوه‌كانی دووه‌م جه‌نگی جیهانی و كاره‌ساته‌كانی و ئه‌و ملیۆنه‌ها مرۆڤه‌ی له‌و شه‌ڕه‌دا تیا چوون، هه‌موو ئه‌وانه‌ به‌شدار بوون له‌ دروستكردنی ئه‌و دیدگا ڕه‌شبینه‌ی بۆ جیهان.

له‌به‌رئه‌وه‌ (بیكێت) ژیانی به‌ جدی نه‌گرت، چونکه‌ ڕه‌نگه‌ له‌ هه‌ر كاتێكدا بێت نا ئومێدمان بكات و شت گه‌لێكمان نیشان بدات كه‌ هه‌رگیز چاوه‌ڕێی نه‌بوین.ڕه‌نگه‌ به‌ درێژایی چه‌ندین ساڵ و مانگ ڕه‌نج بده‌ین و خۆمان ماندوكه‌ین بۆ ئه‌وه‌ی بگه‌ینه‌ ئاكامێك، به‌ڵام ده‌بینین جگه‌ له‌ نائومێدی ده‌ستمان به‌ هیچ ناگات، له‌وانه‌شه‌ كه‌سێكی دی بگاته‌ ئه‌و ئامانجه‌ و به‌رهه‌مه‌كه‌ی بخوات!

كه‌واته‌ ئه‌م هه‌موو ڕه‌نج و ده‌رده‌سه‌ریه‌ بۆچی؟ ئایا ژیان پوچ و بێ مانا نییه‌ یاخود كۆمیدیایه‌ك نییه‌ كه‌ كاره‌كته‌رێكی گه‌مژه‌ ده‌یگێڕێته‌وه‌، وه‌كی (شكسپیر) ده‌ڵێت؟

ئه‌م هه‌ستكردنه‌ به‌و بۆشاییه‌ ڕوحیه‌ و به‌ پوچێتی ژیان،(بیكێت) یان ته‌وق دابوو. به‌و پێیه‌شی ڕاستگۆ بوو، نه‌شیده‌ویست درۆ له‌گه‌ڵ كه‌سانی دیدا بكات، بۆیه‌ به‌و په‌ڕی سه‌ر ڕاستیه‌وه‌ باسی له‌ ناخی خۆی و ئه‌و شتانه‌ ده‌كرد كه‌ له‌ دڵیدا بوو.

نوسه‌ر له‌ به‌شێكی دیكه‌ی ئه‌و كتێبه‌یدا باس له‌وه‌ ده‌كات كه‌: (بیكێت له‌ ژێر كاریگه‌ری سوریالیزم و ئه‌ندرێ بریتۆندا بووه‌). وه‌كی ئاشكرایه‌ (بریتۆن)یش دوای جه‌نگی جیهانی یه‌كه‌م، باسی له‌ پوچێتی ژیان كردووه‌. (بیكێت)یش به‌هه‌مان شێوه‌، به‌ڵام له‌ دوای دووه‌م جه‌نگی جیهانیه‌وه‌.

له‌ هه‌ردوو حاڵه‌ته‌كه‌دا ده‌بوو جه‌نگێكی ماڵوێرانكه‌ری نێو ده‌وڵه‌تی ڕوی بدایه‌ و ملیۆنه‌ها مرۆڤیش بوونایه‌ته‌ قوربانی، بۆ ئه‌وه‌ی ئه‌ده‌بێكی پوچ و یاخی و دژ به‌ هه‌موو مانا پێدانێك به‌ ژیان بێته‌ ئارا.شایه‌نی باسه‌ زۆرێك له‌و‌ مه‌نه‌لۆگه‌ی له‌ شانۆگه‌ریه‌كه‌ی (بیكیت)دا هاتووه‌، هیچ مانایه‌كی نییه‌ و به‌و نوسینه‌ ئۆتۆماتیكیه‌ ده‌چێت كه‌ (ئه‌ندرێ بریتۆن) باسی ده‌كات و له‌ مانیفێستی سوریالیزمدا تیۆریزه‌ی بۆ ده‌كات.

ئه‌وه‌ی‌ ڕاستی بێت (بەدەم‌ چاوه‌ڕوانی گۆدۆ)ی (بیكێت)، ته‌عبیره‌ له‌ مرۆڤی دادڕاو له‌م جیهانه‌دا. مرۆڤ كه‌رتبووه‌ و له‌ ناخه‌وه‌ برینداره‌و ئه‌م برینه‌ش بێچاره‌یه‌.

ڕه‌نگه‌ ئێمه‌ له‌ ناكاو ڕووبه‌ڕوی مه‌رگی نزیكترین هاوڕێ و خۆشه‌ویسترین كه‌سمان ببینه‌وه‌، له‌ به‌رامبه‌ریشدا هیچمان پێنه‌كرێت. به‌مجۆره‌ وێران ده‌بین و به‌دیار ئه‌و ئازیزانه‌ی له‌ ده‌ستمان داون، حه‌سره‌ت ده‌كێشین. ئیتر دە‌بێت ئه‌م ژیانه‌ چ مانایه‌كی هه‌بێت، تۆ بڵێیت شایه‌نی ئه‌وه‌ بێت بیگوزه‌رێنین؟ له‌به‌رئه‌وه‌یه‌ هه‌ردوو پاڵه‌وانی شانۆنامه‌كه‌ له‌ دواجاردا بڕیار ده‌ده‌ن خۆیان بكوژن، به‌و پێیه‌ تاكه‌ چاره‌سه‌رێكه‌ له‌به‌رده‌ستدا بێت.

به‌ڵام هه‌ندێ له‌ ڕه‌خنه‌گران، مانایه‌كی تر له‌ شانۆگه‌ریه‌كه‌ی (بیكێت)دا ده‌دۆزنه‌وه‌. "گۆدۆ - godot" به‌ زمانی ئینگلیزی وشه‌ی (god) یه‌زدانمان به‌ بیردێنێته‌وه‌. لێره‌وه‌ پێده‌چێت دواجار ماناكه‌ی به‌مجۆره‌ بێت: (له‌ چاوه‌ڕوانی یه‌زداندا، یان له‌ چاوه‌ڕوانی فریاد ڕه‌س و ڕزگاركه‌رێكدا)، به‌ڵام له‌ كۆتایدا ئه‌م فریاد ڕه‌سه‌ هه‌رنایه‌ت. ئه‌مه‌ش به‌ڵگه‌ی ئه‌وه‌یه‌كه‌ئومێد له‌م جیهانه‌دا مه‌حاڵه‌، نا ئومێدی گه‌وره‌ش لێره‌دایه‌.

له‌و كاته‌وه‌ی ئایین له‌ كۆمه‌ڵگاكانی خۆرئاوادا پاشه‌كشه‌ی كرد، چه‌مكی یه‌زدان له‌ كاڵبونه‌وه‌دایه‌. ڕه‌نگه‌ (بیكێت)یش ویستبێتی گوزارشت له‌وه‌ بكات و دۆخی شارستانیه‌تێك نیشان بدات كه‌ ‌خاڵییه‌‌ له‌ هه‌موو ئیمان و ئومێدێك، ئه‌مه‌ش مانای ئه‌وه‌یه‌ چاوه‌ڕوانی كردنی (گۆدۆ) بێ هوده‌ییه‌ و هه‌رگیز نایه‌ت.لێره‌وه‌ دیاره‌  شانۆگه‌ریه‌كه‌ ڕه‌هه‌ندی میتافیزیكی تێدایه‌ و مانایه‌كی قوڵ له‌ خۆ ده‌گرێت، ئه‌و مانایه‌ش گوزارشته‌ له‌ قه‌یرانی ژیاری خۆرئاوا.

ئه‌م شارستانیه‌ته‌ سه‌ركه‌وتنی به‌رچاوی له‌سه‌ر هه‌موو ئاسته‌ مادی و ته‌كنۆلۆژیه‌كان به‌ده‌ستهێناوه‌، به‌ڵام له‌سه‌ر ئاستی ڕوحی و ئه‌خلاقی به‌هه‌مان سه‌ركه‌وتن نه‌گه‌یشتووه‌. گه‌ر ئه‌مه‌ به‌دی بهاتبایه‌، جه‌نگی جیهانی یه‌كه‌م و دووه‌م ڕویان نه‌ده‌دا و ئه‌و ملیۆنه‌ها مرۆڤه‌ش تیانه‌ده‌چون.

لێره‌وه‌ تێده‌گه‌ین مرۆڤ چه‌ند گه‌وجه‌ و چۆن ده‌توانێت له‌ چركه‌ساتێكی توڕه‌یدا، هه‌موو ئه‌و شتانه‌ وێران بكات كه‌ به‌ درێژایی چه‌ندین ساڵ دروستی كردووه‌. مانای پوچی و ناماقوڵی لێره‌وه‌ به‌رهه‌م دێت كه‌ شارستانیه‌ت ناتوانێت، ڕێگا له‌سه‌ر هه‌ڵدان و ڕودانی كار و كرده‌وه‌ی به‌ربه‌ری و دڕنده‌یه‌تی بگرێت. گه‌ر وانه‌بێت چ مانایه‌كی هه‌یه‌ نه‌ته‌وه‌ زۆر شارستانی و پێشكه‌وتووه‌كانی جیهان، وه‌ك نه‌ته‌وه‌كانی فه‌ره‌نسا و ئه‌ڵه‌مانیا و ئینگلته‌را، له‌ دوو جه‌نگی جیهانی خوێناویه‌وه‌ بگلێن كه‌ له‌ مێژوودا بێوێنه‌یه‌.

ئه‌م شێتی و دێوانه‌ییه‌ چیه‌ باڵی به‌سه‌ر ئه‌م شارستانیه‌ته‌دا كێشا و وایلێكرد، به‌ ده‌ستی خۆی خۆی وێران بكات؟ ئایا ئه‌ڵه‌مانیا یه‌كێك نه‌بوو له‌ نه‌ته‌وه‌ هه‌ره‌ شارستانیه‌ته‌كانی دنیا، كاتێك چاره‌نوسی خۆی دایه‌ ده‌ست پێاوێكی نه‌خۆشی وه‌ك (ئه‌دۆڵف هتله‌ر)؟ ئه‌مه‌ چۆن ڕویدا؟

وه‌كی ئاشكرایه‌، نازیزم له‌ هه‌مان ئه‌و وڵاته‌دا ته‌شه‌نه‌ی سه‌ند كه‌ ڕابه‌رانی ئه‌قڵانیه‌تی وه‌ك: (كانت و هیگڵ) و كه‌سانی دیكه‌ی وه‌ك ئه‌وانی به‌رهه‌م هێنا. فاشیزم سه‌روه‌ختێك له‌ ئه‌وروپادا ته‌شه‌نه‌ی سه‌ند كه‌ پێشتر ئه‌قڵانیه‌ت و ڕۆشنگه‌ری باڵا ده‌ست بوون، له‌م ناكۆكیه‌ گه‌وره‌شه‌وه‌ شانۆی ئه‌پسۆرد و هه‌روه‌ها ڕۆمانی نوێش له‌سه‌ر ده‌ستی (ئالان ڕوب گرێو میشێل بوتۆر و ناتالی سارۆت) هاتنه‌ ئارا. تێكڕای ئه‌ده‌بی مۆدێرن، ئه‌و ئه‌ده‌به‌ی لێوان لێوه‌ به‌ نیگه‌رانی و نائومێدی، به‌رهه‌می ئه‌و ڕوداوه‌ مێژوییانه‌یه‌ كه‌ ئه‌وروپا له‌ نیوه‌ی یه‌كه‌می سه‌ده‌ی بیسته‌مدا به‌خۆیه‌وه‌ بینی.

هه‌ر له‌ درێژه‌ی‌ باسه‌كه‌یدا نوسه‌ری ئه‌م كتێبه‌ ده‌ڵێت: (ڕاسته‌ نیگه‌رانی وجودی وه‌كی دیارده‌یه‌ك كۆنه‌ و ده‌توانین بیگه‌ڕێنینه‌وه‌ بۆ كێركیگارد له‌ سه‌ده‌ی نۆزده‌، هه‌روه‌ها بیگه‌ڕێنینه‌وه‌ بۆ كافكا كه‌ ساموئێل بیكێت زۆر له‌ ژێر كاریگه‌ری ئه‌ودا بوو، به‌ڵام نه‌گه‌یشتبووه‌ ئاستی پوچگه‌رایی و نامه‌عقولیه‌تێكی پڕاوپڕ، وه‌كی ئه‌وه‌ی له‌ دوایدا له‌سه‌ر ده‌ستی یۆنسكۆ و ئه‌دامۆف و خودی بیكێت خۆشی ڕویدا).

ئه‌وه‌ی تۆقێنه‌ره‌ له‌مجۆره‌ ئه‌ده‌به‌دا ئه‌وه‌یه‌كه‌ هه‌موو ده‌رگا و په‌نجه‌ره‌یه‌كت به‌ ڕودا داده‌خا و هیچ ده‌رفه‌تێكت بۆ ده‌ربازبوون بۆ ناهێڵێته‌وه‌! واته‌ ئه‌مجۆره‌ ئه‌ده‌به‌ گوزارشته‌ له‌ نائومێدیه‌ك كه‌ له‌ هه‌موو لایه‌كه‌وه‌ ته‌وقی مرۆڤ ده‌دات.

ڕه‌نگه‌ له‌و ساته‌وه‌خته‌ مێژووییه‌دا ئه‌م شته‌ پاساوی خۆی هه‌بووبێت، به‌ڵام له‌ ئێستادا ئه‌و پاساوانه‌ هیچ ڕه‌وایه‌تیه‌كیان نه‌ماوه‌. دوای ئه‌وه‌ی مرۆڤی ئه‌وروپی سه‌رپێی خۆی كه‌وته‌وه‌و ئومێدی به‌ ژیان په‌یدا كرده‌وه‌، سه‌رباری هه‌موو ئه‌و شتانه‌ی ڕویاندا. به‌مجۆره‌ ئه‌وروپا توانی نائومێدی (بیكێت) و جیهانه‌ تاریك و تۆقێنه‌ره‌كه‌ی تێپه‌ڕێنێت.

وه‌كی ئاشكرایه‌ (بیكێت) له‌و شانۆگه‌ریه‌ به‌ناوبانگه‌یدا ده‌ڵێت: (هه‌موومان به‌شێتی له‌ دایك ده‌بین و هه‌ندێك تا ده‌مردن هه‌ر له‌ سه‌ر ئه‌و حاڵه‌ ده‌مێننه‌وه‌)، ئه‌مه‌ش وه‌ك ئاماژه‌ كردنێك بۆ خۆی و هه‌ندێ له‌ بلیمه‌ته‌كانی دیكه‌، به‌ڵام له‌گه‌ڵ ئه‌وه‌شدا (بیكێت) ده‌توانێت هه‌ندێك جار ئیجابیش بێت، بۆ نمونه‌ له‌ یه‌كێك له‌ ڕۆمانه‌كانیدا ده‌ڵێت: (مادامه‌كی ژیان هه‌یه‌، ده‌بێت ئومێد و هیواش هه‌بێت!).

هاوكات ده‌شی وت: (تۆ ده‌ژیت و  زینده‌گی ده‌تبات، به‌ڵام دواجار مه‌رگ هەر دێت. مه‌رگ چاوی له‌سه‌رمانه‌ و له‌ بۆسه‌دایه‌ بۆمان، دواجار هه‌رچیه‌كمان له‌م ژیانه‌دا بونیادناوه‌ باده‌یبات و كۆتایی دێت. كه‌واته‌ دوا قسه‌ هه‌ر بۆ نامه‌عقول و پوچگه‌راییه‌و هیچی تر).


ئەم بابەتە 53 جار خوێندراوەتەوە