Halawet_al_donia_Thumb.jpg

پەیڤێك لە بارەی درامای خۆشی ژیانەوە

ئەردەڵان عەبدوڵا

وەكو هەوادارێكی هەمیشەیی دراما و سینەمای میسری، لە ماوەی پێشوودا سەیری درامای " خۆشی ژیان" م كرد، كە لە كەناڵی كوردسات پەخش كرا. بە بڕوای من ئەم درامایە، یەكێك بوو لەو دراما جوانانەی كە ئەم كەناڵە ئەمساڵ پێشكەشی بینەرانی كردووە. بەداخەوە لە ئێستادا هێندە درامای ناخۆش و بێمانای توركی هەیە، تەواوی كەناڵەكانی ئەم هەرێمەی گرتۆتەوە، زۆربەی ئەو درامایانەش، خزمەتی سیاسەتی فراوانخوازی توركیا دەكات لەناوچەكەدا. 

درامای میسری خاوەنی ناسنامەیەكی تایبەت بە خۆیەتی، كە لە درامای تری جیهان جودای دەكاتەوە. لە بەشی زۆریاندا، پەیامێكی مرۆیانە دەبینین، كە ئامانج لێی چاككردنەوەو راستكردنەوەی ئەو هەڵسووكەوت و مامەڵە كۆمەڵایەتییە خراپانەن، كە كۆمەڵگەی میسریی و بەشێكی زۆری خۆرهەڵاتی ناوەڕاست پێوەی دەناڵێنێت. هەرچـەندە ئەوانیش جارجار درامای خراپ بەرهەم دەهێنن، بەڵام دەتوانین بڵێین زۆربەیان كاری هونەری جوانن و خاوەنی پەیامێكی گرنگی مرۆیین.

ناوەڕۆك و پەیامی دراماكە
جوانی و گرنگی ئەم درامایە خۆی لە ناوەڕۆكی سەرەكی دراماكەدا دەبینێتەوە، كە باسی ژیانی ئەو كەسانە دەكات كە تووشی نەخۆشی "شێرپەنجە" دەبن. بەراستی چ سیناریۆكە و چ ئەكتەر و ستافی بەرهەمەهێنەر، زۆر بە جوانی توانییوویانە، ئەو پەیامە جوان و گرنگە بە بینەر بگەیەنن كە ئەویش خۆی لە چۆنێتی ژیان و هەڵسووكەوتیان لەگەڵ دەوربەر و بیركردنەوەی ئەو كەسانەی كە تووشی ئەم نەخۆشییە كوشندەیە دەبن. بەتایبەتی ئەكتەرەكان، زۆر بەجوانی رۆڵەكانین بینیبوو بەتایبەتی هەردوو پاڵەوانی سەرەكی "ئەمینە و سەلیم ". 

رۆڵی ئەمینە ئەكتەری ناسراوی عەرەبی " هیند سەبری" دەیبینی، كە بەراستی بەوپەڕی جوانیی و كارامەییەوە توانیویەتی رۆڵەكە بەرجەستە بكات و تێكەڵی كەسایەتییەكە ببێت. سەرەتا و كۆتایی دراماكەش بە ئەمینە دەستپێدەكات، كاتێك ئەمینە دەزانێت تووشی نەخۆشی شێرپەنجە بووە، بە تەواوەتی ژیانی تێكدەچێت، لەوكاتەدا خەریكی خۆئامادەكردنە بۆ زەماوەندەكەی، بەڵام لەپڕ هەواڵی نەخۆشبوونی پێدەگات، بە تەواوەتی نەك ژیانی خۆی بەڵكە ژیانی بنەماڵەكەشی تێكدەچێت. 
دواتر كاتێك دەستگیرانەكەی بەم هەواڵە دەزانێت، پاش ماوەیەكی كەم وازیلێدەهێنێت، ئەمەش هێندەی تر ژیانی ئەمینە تێكدەدات. بەڵام چ نەخۆشییەكە و چ نەمانی دەستگیرانەكەی، كۆتایی بە ژیانی نایەت، لێرەدا سیناریستەكە هیوایەك بۆ ئەمینە و ژیانی نوێ دروستدەكات، كە ئەویش ناسینی " سەلیم"ە كە ئەكتەری ناسراوی عەرەبی "زافیر عابیدن" رۆڵەكە دەگێڕێت، ئەمیش زۆر بە جوانی توانیویەتی رۆڵەكە بگێڕێت. كاتێك ئەمینە، سەلیم دەناسێت، كە ئەویش تووشی نەخۆشی شێرپەنجە بووە، لە بێئومێدی رزگاری دەبێت و دووبارە هەست بە خۆشی ژیان دەكەنەوە. 

خاڵی گرنگ لەم درامایەدا، گەیاندنی پەیامی "ژیاندۆستیی" و دژایەتییكردنی " مەرگدۆستییە". لەهەمانكاتیشدا لە رێگەی ئەم درامایەوە ئێمە ئاشنا دەبین بە ژیانی ئەو كەسانەی كە تووشی نەخۆشی شێرپەنجە دەبن، تاچەندە ئەم نەخۆشییە كاریان تێدەكات، نەك تەنها لە رووی جەستەییەوە بەڵكە لە رووی كۆمەڵایەتییشەوە. لە هەمووشی گرنگتر ئەم درامایە پێماندەڵێت، ئەو كەسانەی تووشی ئەم نەخۆشیییە دەبن، تەنها خۆیان ئازار ناكێشن، بەڵكو كەسە نزیكەكانیشیان لەگەڵیان ئازار دەكێشن، بەتایبەتی دایك و باوك و خوشك و براو هاوڕێ نزیكەكانیان.

ئێمە هەر لەناونیشانی دراماكەوە تێدەگەین، كە ئەم درامایە گوزارشت لە خۆشی ژیان دەكات و دژی مەرگدۆستی و رادەستبوونە بە نەخۆشیی و مەرگ، لەهەمانكاتیشدا ئەم درامایە توانیویەتی گرنگیی و پیرۆزی رۆحی بەرەنگاری لە ناخی مرۆڤدا پیشانی بینەران بددات، پێشمان دەڵێت چەندە كارەساتبارە، كاتێك مرۆڤ خۆی رادەستی نەخۆشیی ومەرگ و بێ ئومێدیی بكات. 

لەم درامایەدا نەخۆشخانە و بازنەی نەخۆشانی تووشبوی شێرپەنجە، دەبنە مەیدانی سەرەكی دراماكە، ئەمینە و سەلیم بازنەیەكی كۆمەڵایەتییان هەیە، كە هەموویان لە تووشبوانی شێرپەنجە پێكدێن، ئێمە لە رێگەی ئەم بازنەیەوە، ئاشنا دەبین بە شێوازی ژیان و هەڵسووكەوت و چۆنێتی بیركردنەوەی ئەو كەسانەی كە تووشی ئەم نەخۆشییە دەبن. لە هەمووشی گرنگتر هەست و سۆزێكیشیمان بۆ ئەو كەسانە دەجووڵێنێت، كە رووبەروی ئەم نەخۆشییە مەرگئامێزە بوونەتەوە. 

لە رووی نمایش و تەكنیكیشەوە بەراستی دراماكە سەركەوتوبوو، بەتایبەتی ئەكتەرە سەرەكییەكانی ئەم درامایە، زۆر بە جوانی رۆڵەكانیان گێڕاوە. جێگەی ئاماژەیە "هیند سەبری" بۆ ئەم درامایە، پرچەكانی خۆی تاشیبوو، كە ئەمەش بۆ ژنێكی ئاساییی بڕیارێكی قوورسە چ جای بۆ ئەكتەرێكی دیاری سینەمایی، كە رۆژانە میدیاكانی هەواڵەكانیان بڵاودەكاتەوە. ئەمە ئەوەمان پێدەڵێت، چەندە گرنگە ئەكتەر بەشێوەیەكی فعلی تێكەڵی كەشووهەوای ئەو رۆڵە بێت كە دەیگێڕێت، دەبێت ئەكتەر بەشێوەیەكی سروشتیی و راستیی رۆڵەكە بەرجەستە بكات. ئەمەش تاڕادەیەكی زۆر دەچێتە قاڵبی قووتابخانەی "سروشتگەراییی" لە ئەدەب و شانۆدا كە نووسەری ناوداری فەرەنسی " ئێمیل زۆلا" دامەزرێنەری بوو.

جێگەی ئاماژەیە ئەم درامایە لە رەمەزانی ساڵی 2017 لەكەناڵە عەرەبییەكان پەخش كراوەو لە بنەڕەتیشدا لە درامایەكی مەكسیكی وەرگیراوە. 
لە رووی وەرگێڕان و دوبڵاژیشەوە، مایەی دەستخۆشیی لێكردنە بەراستی ئەو ستافەی ئەم كارەیان وەرگێڕاوە، سەركەوتووبون لە وەرگێڕانەكە و تێكەڵبوونی رۆڵە سەرەكییەكان. لێرەدا جێگەی خۆیەتی دەستخۆشی لەكەناڵی كوردسات بكەین، هیوادارین لە پەخشكردنی لەمجۆرە درامایانە بەردەوام بێت. 

سەرچاوە: 

www.youm7.com

هند صبري تستعيد ذكرياتها مع مسلسل "حلاوة الدنيا" وتوجه سؤالا لمتابعيها


ئەم بابەتە 45 جار خوێندراوەتەوە