Payz.jpg

تیپی مۆسیقای پاییز، نەوەیەكی نوێی موسیكی كوردیی

پۆلا سەعید

هونەری كوردیی بەشێوەیەك زامدارە، كە دەشێت بە چەندەها زانای سانا چارەسەر نەكرێت. بەم ڕۆژگارە هونەری كوردیی هەتك دەكرێت و هەمووشمان تەماشاكەرین. لەم هەتكردنەدا هەموومان بەشدارین، چونكە نەك بێدەنگین، بەڵكوو پەسەندێتیش دەدەین بە كارەكانی خەڵكانێك، كە ناویان هونەرمەندە. بەم ڕۆژگارە نەك گوێمان لە موسیكی ناڕەوا دەبێت، بەڵكوو شەرمیش دەكەین لەوەی، كە دەنگە دەنگ و تەقە تەقێكی ئاوهاش ناوبنرێت موسیك و مۆركی كوردیشی پێوە بنرێت. بەم ڕۆژگارە گوێمان لە تێكستی وەها دەبێت، كە تەریق دەبینەوە، ئەمجۆرە تێكستانە چ وەك لیریك بناسێنین و چ بشیانبكەین بە موڵكی كورد. لێرەدا دەتوانین تەنها بڵێین، سووپاس بۆ وەزارەتی ڕۆشنبیریی، كە لە دوای ڕاپەڕینەوە هەتا ئێستا هونەری كوردیی بەم ئاقارەدا بردووە.

لە چەند ڕۆژی ڕابردوودا ئاشنای تیپی مۆسیقای پاییز بووم، ئەم تیپە بەشێكی گەورەیان منداڵ و گەنجن. ئەمانە خاوەنی بەهرەیەكی گەورەن، خاوەنی توانایەكی گەورەن، دەشێت تەمەنێكی كەمیان هەبێت، لێ بە دڵنیاییەوە كۆمەڵێك ڕۆحی پیرن، كە تەنها و تەنها بۆ ئەوە لەدایك دەبنەوە، كە درێژە بە بوونیان بدەن، درێژەدان وەك بوونەوەری موسیك، وەك چ خودی دیۆنیسۆس و چ نەوەكانی. كارزان میرانیی گەنجتریین هونەرمەندی ئەم تیپەیە، خاوەنی دەنگێكی بەسۆز و زێڕیینە. كاتێك دەڵێ، بەفرێك بە "با"ی دەبارێت ڕێگای كانی لێگرتووم، نەك بە تەنها مووی جەستەت گرژ دەبێت، بەڵكوو تامەزرۆیەكی ڕۆحییت تێدا دروستدەبێت، كە چەندیینجار لەسەر یەك گوێت لەم ڕستە هەژێنەرە بێت.

بەشێكی گەورەی تازە پیاكەوتوانی باشووری كوردستان، بەشێكی گەورەی تەقەتەقكەرەكانی باشووری كوردستان پێویستە تەماشای ئەم تیپە بكەن و شەرم لە خۆیان بكەن، گوێ لە كارزانی میرانیی بگرن و شەرم لە خۆیان بكەن. شەرم بكەن و بڕیاربدەن، كە دەستبەرداری موسیك بن و لەوە زیاتر هونەری كوردیی هەتك نەكەن. چ بەختەوەرییەكی گەورەیە، كە لەناو ئەم هەموو نائومێدییەدا، ئومێدێكی ئاوها دەردەكەوێت. وەك هەمیشە لە خۆرهەڵاتەوە مژدەی پاراستنی هونەری كوردییمان پێدەدرێت. كاكە ناسری ڕەزاریی چەند ساڵێك پێش ئێستا گووتی، هونەر لە سنە لەدایك دەبێت، لە سلێمانیی گەشە دەكات و لە هەولێر دەمرێت. ئەمە غەدرێكی گەورە بوو لە هەولێری كرد. ئاخر ئەوەندەی هونەر لە سلێمانییدا هەتكدەكرێت بە چارەكی ئەوە لە هەولێردا نەكراوە.

بۆچیی گرنگیی بە قووتابخانەی هونەریی نادرێت؟ بۆچیی گرنگیی بە قووتابخانەی موسیك نادرێت؟ بۆچیی یاسایەك بۆ بەرهەمی كوردیی چێناكرێت؟ نەك بۆ ئەوەی سانسۆر بخەینە سەر هونەر، بەڵكوو بۆ ئەوەی هونەر و موسیكی كوردیی بپارێزین لە هەتككردن. دواجار هونەر و موسیكی كوردیی بەشێكە لە ڕۆحمان، غەدرێكی گەورەیە بە بەرپرسیارێتییەوە مامەڵەی لەگەڵدا نەكەین. ئاخر كاتێك پێویستمان بە ئارامیی و گەڕانەوەیە بۆ قوڵایی خود، هەمیشە پەنا دەبەینە بەر موسیك، ئەگەر موسیكێكیش شكنەبەین، كە پەنای بۆ بەرین، ئەوا تەنهاتریین تەنهاكانی جیهان خۆمان دەبین.


ئەم بابەتە 116 جار خوێندراوەتەوە