Ali_xalil.jpg

تەنەکا گلێشی

عەلی خەلیل- دهۆک

 ل دەستپێکا هەبوونا من، پشتی ژ بەرمایکێن پەترۆلێ کریمە پۆلیمەر و پاشی ل کارگەهەکا پلاستیکی د قالبەکیدا کریمە لەگەنەکا هەڤیری، عەتارەکی بەر ب گوندان ڤە برم و دامە ب دوو مستێن مێویژان.

 ژنەکێ ل ڤی گوندی ئەز کرمە لەگەنا هەڤیری و بەندکەک ئێخستە لێڤکا من و ب سنگەکیڤە، د دیوارەکێ ئاخێرا هاتمە هەلاویستن، کابانیا مالێ رۆژانە هەڤیرێ خوە د زکێ من دا دکر، خوەشی هەر ئەو بوو، ل وی گوندی هەموو تشتەک سروشتی بوو و تنێ ئەز پلاستیک بووم.

 پشتی زەلامێ مالێ ژنا دووێ مارەکری، ئێدی رۆژانە ژنا مەزن ژ کەربێن هەویا خوە ژنا بچووکدا، ئەز وەسا ژ کەل ل ئەردی ددام، هەتا جارەکێ بوویمە دوو کەر و هاڤێتمە سەر گیفکی و لبەر سەرمایێ رەقرەقە دبووم، ل هاڤینان ژی لبەر گەرمێ د حەلیام و خاڤ و نەرم دبووم.

 ب وی زکێ دڕیایی، ئەز و چەندین پرتێن دی یێن پلاستیکی، ل کارگەهەکا دی یا پلاستیکی هاڤێتینە ناڤ گەرمێ و حەلاندین، هەتا ژ گەرما ئەز بێهۆشبووم.

 جارەکێ هشیاربووم، ئەز یا بوویمە تەنەکا گلێشی. پشتی ماوەیەکی هندەک خرخال ئێخستنە بن من و ل سەرێ کولانا باژێرەکی دانام، ب شەڤەک و رۆژەکێ ئەز ژ گلێشی پڕ دبووم و دوبارە ژلایێ زەلامێن پاقژکرنێڤە دهاتمە ڤالاکرن. ب شەڤێ کتکێن کولانا مە، سەرا هەستیێ ماسیەکێ کفکف دکرن، هەر چیێ تێر مەی ڤەخواربا و سەرخوەشبا، دا هێت و تەنشتێن من دەتە بەر پەحنیا. یێن من دیتین ئەوبوون سەرا خیانەتا دەستگرتیا خوە وەسا ل من دکرن، نێ نزا من چ کریە؟!

 پشتی چەند پەحنیێن سەرخوەشان و شەڕێ کتکان ل سەر سەرێ من، سەحار ب سەر من دا دهات، دیسا جیران دا پیساتیێ خوە ئینن و هێشتا چەند مەتران ژ من دوور، ب سەرێ من داکەن و بلەز چن، دفن و دەڤێ خوە ژی دگرتن و ناڤچاڤێن خوە تێک دبرن، تو دبێژی ئەڤ پیساتی نەیێ وانە، بەلکو من یێ ژ زکێ خوە ئینایەدەر!

 سال دەربازبوون، تەنشتێن من هەموو بوونە پۆستەرێن کۆمپانیان، دەمێ دبوونە هەلبژارتن تەنشتێن من ژ وێنەیێن بەربژێران پڕ دبوون، گەلەک ژ ئەوێن چووینە پەرلەمانی، پۆستەرێ وان لسەر تەنشتا من بوو، ئێدی پشتی هەلبژارتنان ژی کەسێ ژێڤە نەدکرن، هەتا باران د سەردا دهاتن و پێڤە د پەڕتین، ژیان ل ڤی وەلاتی وەسا دچیت، ژ سەر تەنشتا تەنەکا گلێشی بۆ پەرلەمانی دچن!

 ئێدی هەموو ئێڤاریان ژی، پیرەژنەک بەری تاریگەهێ دهێت، دکەڤتە ناڤ وان تیرکا و بەرمایکا و چ کەرەکێ نانێ هشک بیت، یان لەعبیکەک بیت ژبۆ نەڤیێن خوە دبەت، ئەز ناڤێن نەڤیێن وێ دزانم. دەما لەعبیکەکا شکەستی ددیت، دا بێژیت ئەڤە بۆ نازێ یان ترومبێلکەکا بێ خرخال با، دا کەتە د گینیکێ خوەدا و بێژیت: ئەڤە بۆ واریکێ منە.

ئێڤاریەکێ کەرێن نانی ب لێڤکا کراسێ خوە، ڤەدمالین و دکرنە د تیرکەکی دا، جارەکێ پرتا کێکەکێ بوو و من ژی نەشیا خوە و گۆت:

- پیرێ، وی کەرێ کێکێ نەدەیە نەڤیێ خوە..

پیرەژنێ نەزانی دەنگ ژ کیڤە هات، لدۆر خوە زڤڕی و کەس نەدیت، وەسا هزرکر ئەو دەنگ یێ د سەرێ وێدا دەنگڤەددەت، جارەکا دی، من گۆت:

- پیرێ، ئەڤە ئەز لبەر تەنشتا تە، وی نانی و پرتا کێکێ نەدە نەڤیێن خوە، دێ پێ نەخوەش کەڤن.

هێشتا دەنگێ من ب داوی نەهاتی، پیرێ رابوو و لدۆر خوە زڤڕی و گوپالێ خوە دوو سێ جاران ل بای وەشاند، پاشی دوو ل تەنشتا من دان، داکو دەنگەکی دروستکەت و ئەوی دەنگی نەبهیست، جارا سیێ، من گۆت:

- پیرێ، ئەز تەنەکا گلێشیمە وی نانی..

پیرێ نەهێلا ئاخفتنا خوە تمامکەم، ئەو تشتێن کۆمکرین ب سەرێ من داکرن، دەست هاڤێتە کرێتیان و کەرێن گوندان داپیڤانە سماهیلی، کو کریە د ڤی حالی دا. نزانم سماهیل کیبوو، لێ هەتا پیرێ ژ کولانێ بەرێڤەبووی ژی پتپتا وێ بوو و دلێ خوە هین دکر.

چەند سال دەربازبوون، ئەڤە پیرێ ل وێ قوتێ چووی و نەهاتیەڤە، نزانم مریە مایە؟ لێ هەردوو نەڤیێن وێ یێ لسەر هزرا من، گەر د ساخبن، نوکە مەزنبووینە!

ژبلی کو پلاستیکم و لبەر تاڤێ من رەنگێ خوە یێ ژ دەستدای، دزانم من عەمرەکێ کێم یێ مای، تایبەت پشتی جگارکێشەکی قوپکەکێ جگارێ فتفتاندی و شاراندی و ڤیای خوە ب مرۆڤەکێ ساخلەم و پاک بدەتە دیارکرن، قوپکێ جگارا خوە هاڤێتە سەر سەرێ من و دگەل هندەک کەفیکێن کاغەزێ و بوویە ئاگرەک و کەڤتە هناڤێن من و کونەکا مەزن کەڤتە هناڤێن من و ئێدی گلێش دبن من دا دچیت. هەتا جارەکێ بەرپرسەکێ گلێشی بڕیارێ ددەت و من ژی دگەل گلێشی ببەت و د هاڤێژت.


ئەم بابەتە 108 جار خوێندراوەتەوە